16
Au afada emi hihii-nanau' ia ra, ela emi boso' heo' meme Au mai. 2 Neu' ko lahenda Yahudi ra usi heni emi, meme sira uma mamaso na mai. Ta noi ria, te kalu tepo-lele' fo ri' lahenda raisa emi, neu' ko ara afi rae sira tao malole soa-neu' Manetualain. 3 Ara tao leo naa' soa-neu' emi, nana huu ta ralela' matetu' Au. Ara ta ralela' Au Papa Ka boe'. 4 Tehuu Au afada emi hihii-nanau' ia ra, fai bea ma hihii-nanau' ia ra dadi, sona neu' ko emi bisa mafarene mae, Au afada mema' emi neme ulu' mai. Neme masososa na mai Au ta afada emi fa, nana huu Au bei sama-sama oo emi.”Manetualain Dula-dale Na nonoi-tataon
5 Yesus nanori-nafada tamba nae, “Besa' ia, Au fali uu leo Ria fo ri' nadenu Au leo dae-bafo' ia mai. Tehuu ta hapu emi esa natane Au nae, ‘Ramatua' a saka' leo bea' muu?’ 6 Huu no Au afada emi hihii-nanau' ia ra, de emi teisusa-dalehedi. 7 Tehuu hata fo Au afadan neu' emi a, nana la'e. Kalu Au uu, sona malole a soa-neu' emi. Huu fo kalu Au ta uu fa, sona Manalea-mananore a ta mai natudu emi eno'. Tehuu kalu Au uu, sona Au fee Ria leo emi mai.
8 Kalu Ana mai, sona neu' ko Ana natudu lahenda nai dae-bafo' ia nae, sira dale nara ma nonoi-tataon, sala. Ana lea-nore si fo tuka eno masoda roo-tetu'. Ma Ana fee si nafarerene' nae, neu' ko Manetualain uku-sudi si ma naetu' nae, sira la'e do sala. 9 Manalea-mananore ria natudu sira sala-sikon, nana huu ara ta ramahere Au. 10 Ana natudu eno masoda' roo-tetu' a. Huu fo Au fali leo Papa Ka uu, de neu' ko emi ta mita Au so'. Huu ria naa, Manalea-mananore a mai kati Au. 11 Ana natudu nae, Manetualain saka' naetu' lahenda ra nonoi-tataon no matetu', nana huu Manetualain huku nitu ra malakan fo ri' pareta nai dae-bafo' a.
12 Au nau afada emi hihii-nanau' dodou', tehuu besa' ia emi bei ta bisa bubulu'. 13 Tehuu kalu Dula-dale matudu hihii-nanau' roo-tetu' a mai, sona Ana lea-nore emi, ela bisa bubulu' basa hihii-nanau' roo-tetu'. Ana ta dedea neme Ria ao-ina heheli na, tehuu nafada hata fo Ana namanene neme Au Papa Ka mai. Ma Ana nafada emi hata fo ri' neu' ko dadi. 14 Ana nau io-oa Au, nana huu Ana nau tui-beka ma natudu emi, basa hihii-nanau' roo-tetu' la'e-neu' Au. 15 Basa-basan fo dadi reu' Au Papa Ka nuu-enan, dadi reu' Au nuu-ena Ki boe. Huu ria naa, bisinaa' a Au afada ae, neu' ko Manetualain Dula-dale Na tui-beka ma natudu emi, basa hihii-nanau' roo-tetu' la'e-neu' Au.”
Emi muste teisusa-dalehedi dei, besa' ko mamaho'o
16 Yesus nafada tamba nae, “Ta doo' a so', te emi ta mita Au. Tehuu ta doo' a boe', te emi mita selu' Au.”
17 Boe ma Ria ana mana tuka dean hida, esa dedea no esa rae, “Ubea' taon, de Ramatua' a nae ‘Ta doo' a so', te emi ta mita Au. Tehuu ta doo' a boe', te emi mita selu' Au.’ Ma ubea' taon, de Ana dedea nae, ‘Nana huu Au saka' leo Papa Ka uu’?” 18 Boe ma ara ratatane ao' rae, “Maksud Na leo bea' de nae, ‘Ta doo' a so'’? Ita ta bubulu'.”
19 Yesus bubulu' ara saka' ratane Ni hihii-nanau' esa. Boe ma Ana nafada si nae, “Bisinaa' a Au dedea ae, ‘Ta doo' a so', te emi ta mita Au. Tehuu ta doo' a boe', te emi mita selu' Au.’ Emi matatane ao' leo naa', hete?
20 Kalu emi nau matane leo naa', sona malole a. Au nau afada emi leo ia': neu' ko emi dola ma teisusa-dalehedi, tehuu lahenda feke' rai dae-bafo' ia ramaho'o. Leo mae emi susa, tehuu neu' ko emi mamaho'o-matadale. 21 Sama leo' ina' esa tei na nanoso boboki'. Fai fo ana boki, teisusa-dalehedi naan seli. Tehuu kalu boki heni ana' a, sona susa na mopon. Ana namaho'o huu fo boki lahenda bebeu' esa leo dae-bafo' a mai. 22 Leo' naa boe soa-neu' emi. Besa' ia, emi dola ma dale hedi. Tehuu neu' ko Au mai dama selu' emi, boe ma emi dale mara ratafali dadi namaho'o. Fai bea ma hihii-nanau' ria dadi, sona ta hapu lahenda esa nalea na emi namaho'o-natadalem boe'.
23 Fai bea ma hihii-nanau' ria dadi, sona emi ta matane Au hata-hata esa so boe'. Tebe-tebe! Au afada selu' emi ae, kalu emi hule sudi ubea' neme Papa Ka mai meni' Au nade Ka, sona neu' ko Ana fee emi.a 24 Losa' besa' ia, emi bei ta hule hata-hata esa meni' Au nade Ka. De hule leo, te emi sipo. No ria naa, emi mamaho'o matetu'.”
Ramatua Yesus naseki basa kuasa nai dae-bafo' ia
25 Yesus dedea tamba nae, “Losa' besa' ia, Au biasa anori-afada emi pake dedea nasasama'. Tehuu neu' ko losa ledo-fain, te Au anori-afada ta pake dedea nasasama'. Huu fo Au dedea ledo-ledo la'e-neu' Au Papa Ka. 26 Kalu losa ledo-fai ria, sona emi hule-haradoi hule mata' neu' Papa Ka, meni' Au nade Ka. Boso Au ri' hule-haradoi fee emi. 27 Au Papa Ka sue-lai emi, nana huu emi sue-lai Au. Ma emi mamahere mae, Manetualain ri' nadenu Au. 28 Maulu na, Au foa ela Papa Ka, fo Au leo nai dae-bafo' ia. Tehuu besa' ia, Au saka' foa ela dae-bafo' a, fo fali selu' uu leo oo Ni.”
29 Yesus ana mana tuka dea nara ramanene leo' naa, boe ma rafada rae, “Besa' ia Ramatua' a dedea neu' loan, ma manori-mafada ta pake dedea nasasama'! 30 Ami mamahere, Ramatua' a bubulu' katema' hihii-nanau'. Ta parluu lahenda ratane Ramatua' a hata esa boe', huu fo Ramatua' a bubulu' naulu' ara saka' ratane ubea', ma natataa na leo bea'. Ria natudu fee ami nae, Ramatua' a neme Manetualain mai.”
31 Yesus natane si nae, “Tebe, do? Besa' ia emi mamahere Au, do? 32 Leo ia'. Ta doo' a so', ri' selubai' ia, te emi basa matakela-matakari. Emi foa ela Au, fo meu funi' esa' ko mamanan. Leo mae leo' naa, tehuu Au ta mesa' Ka, huu fo Au Papa Ka sama-sama no Au. 33 Neu' ko lahenda nai dae-bafo' ia tao rasususa' ma doidoso emi. Tehuu matetea dale mara, huu fo Au aseki basa kuasa rai dae-bafo' a so! Au afada emi hihii-nanau' ia ra, ela emi dale mara bisa tama, nana huu emi mabua-maesa moo Au.”