Ramatua Yesus sama leo' anggor a huu na
15
Yesus dedea nae, “Nenene! Emi mabua-maesa moo Au. Au sama leo' ai anggor huu' esa. Tehuu Au ai anggor huu matetu'!a Ma Au Papa Ka, sama leo' mana noi oka'. 2 De lahenda fo noi nafada' a nae, ria nabua-naesa no Au, tehuu ta tao hata-hata esa boe', sona Au Papa Ka tu'u-tapa henin, sama leo' mana noi oka' a beta heni basa doo-rana' maboa taa' ara. Tehuu lahenda fo nabua-naesa matetu' noo Au, sona Ama' a kakai makamomoi kekeo' ara reme ria dale na mai, sama leo' mana noi oka' a seseru e'etu doo-rana' ara, ela naboa dodou'. 3 Au Hara-dasi Ki, tao lalao-lalafu emi dale mara, sama leo' mana noi oka' a seseru makamomoi ria ai huu na doo-ranan. 4 Emi muste mabua-maesa mahere moo Au, sama leo' Au abua-aesa oo emi. Huu fo doo-rana' bea seki henin neme ria huu na mai, ta bisa naboa so'. Leo' naa boe emi. Kalu emi ta mabua-maesa mahere moo Au, sona emi ta bisa tao hata malole esa boe'.
5 Au sama leo' ai anggor huu' esa. Emi sama leo' ria doo-ranan. De lahenda bea nabua-naesa nahere no Au, ma Au boe abua-aesa ahere oo ni, ria sama leo' doo-rana' fo boa' dodou'. Kalu emi ta mabua-maesa mahere moo Au, sona emi ta bisa tao hata malole esa boe'. 6 Lahenda bea ta nabua-naesa nahere no Au, ria sama leo' doo-rana' sosoa-raraa taa' esa. Doo-rana rupa leo naa' a, biasa lahenda beta henin, fo neme' naa ela namatuu. Boe ma lahenda rabubua ra doo-rana' sira, fo tu'u si leo ai-pila' a reu ela hotu heni si. 7 Tehuu kalu emi mabua-maesa mahere moo Au, ma Au Hara-dasi Ki nahere nai emi dale mara, sona emi bisa hule sudi ubea' neu' Manetualain, neu' ko Ana fee emi.
8 Manetualain nade Na nana io-oa', kalu emi tao hihii-nanau' malole dodou', sama leo' doo-rana' maboa dodou'. No ria naa, emi boe matudu mae, emi nana Au ana mana tuka dea kara.
9 Sama leo' Ama' a sue-lai Au, leo' naa boe Au sue-lai emi. Emi muste mabua-maesa mahere moo Au, ela Au sue-lai emi. 10 Kalu emi tao tuka Au pareta kara, sona emi mabua-maesa mahere moo Au, boe ma Au sue-lai emi. Sama leo' Au tao tuka Papa Ka pareta Na, de Ana sue-lai Au la'o naroo.
11 Neme ulu' mai Au afada emi hihii-nanau' ia ra, ela emi bisa mamaho'o-matadale, sama leo' Au amaho'o-atadale. Huu fo Au ahii' emi mamaho'o-matadale dodou'! 12 Au pareta Ka leo ia': emi muste masue-malai ao esa no esa, sama leo' Au boe sue-lai emi.b 13 Kalu lahenda esa sue-lai matetu' ria tia-lain, sona ana sadia mate ela ria tia-lain bisa soda'. Ta hapu susue-lalai' kahere' lena neme ria mai so'. 14 Kalu emi tao tuka Au pareta Ka la'o naroo, sona emi dadi meu' Au tia-lai kara. 15 Au ta nau hule emi ae, Au ‘ata’ Ki so'. Huu fo ata a ta bubulu' matetu' ria malaka na hihii-nanaun. Tehuu Au hule emi ae, Au ‘tia-lai Ki’, nana huu Au afada matetu' basa-basan fo Au Papa Ka nafadan neu' Au a. 16 Emi ta teka-here Au fa, tehuu Au teka-here ma so'u emi malala'o nonoi-laka' ia. De emi muste meu tao hihii-nanau' malole mana basa taa'. Ria sama leo' ai anggor huu' esa naboa naroo boa malole. Kalu emi tao leo naa', sona emi bisa hule sudi ubea' neu' Au Papa Ka meni' nade Ka, neu' ko Ana fee emi. 17 De Au pareta emi a, leo ia': emi muste masue-malai ao esa no esa.”
Lahenda nai dae-bafo' ia ete' ao nara ro Ramatua Yesus lahenda nara
18 Yesus dedea tamba nae, “Kalu lahenda nai dae-bafo' a ete' ao nara ro emi, sona mafarerene', te sira ete' ao nara raulu' ro Au ria. 19 Kalu emi sama leo' lahenda feke' nai dae-bafo' ia, tantu ara sue-lai emi. Tehuu emi ta sama leo' sira fa. Huu fo Au teka-here emi fo heo heni emi meme' sira mai. Huu ria naa, sira ete' ao nara ro emi.
20 Boso' mafarene heni hata fo ri' Au afada emi ae, ‘Ata esa ta kahere' lena neme ria malaka na mai.’ De Kalu ara tao doidoso Au, tantu ara tao doidoso emi boe. Kalu ara ramanene Au Hara-dasi Ki, sona ara ramanene emi ria boe.c 21 Neu' ko ara tao doidoso emi, nana huu emi mabua-maesa moo Au. Sira boe ta ralela' Ria fo ri' nadenu Au. 22 Kalu Au ta parnaa mai dedea oo si, ma atudu si eno masoda matetu', sona ara afi rae, sira sala' ta'a. Tehuu Au mai, de dedea leo naa'. De kalu besa' ia ara tao sala', sona ara ta hapu nete' fo dedea rae, ‘Ami ta bubulu' mae, ami tao a, nana sala.’
23 Lahenda bea ete' ao na no Au, sona ana ete' ao na no Au Papa Ka ria boe. 24 Nai sira matan Au tao tanda heran rupa', fo ri' ta parnaa lahenda feke' taon. Kalu Au ta tao hihii-nanau' sira, sona leo mae ara ta sipo' Au boe, sira ta sala. Sekonaa te ara rita tanda heran fo ri' Au tao si a. Leo mae leo' naa, tehuu sira bei ete' ao nara ro Au oo Papa Ka nai nusatetu-ikutema' a. 25 Tehuu basa hihii-nanau' ia ra dadi, ela natetu na hata fo mana dui' nai Manetualain Atoran na nae, ‘Sira ete' ao nara ro Au. Sekonaa te sira ete' aon ria nete' ta'a.’d
26 Tehuu neu' ko Manalea-mananore a mai. Ria nana Dula-dale' fo ri' tao na emi bubulu' roo-tetu'. Ria neme Au Papa Ka mai. Kalu Au leo Papa Ka uu, sona neu' ko Au fee Ria Dula-dale Na mai soa-neu' emi. Ana nafada emi la'e-neu' Au. 27 Neu' ko emi boe mafada lahenda la'e-neu' Au, nana huu emi sama-sama mo Au neme masososa na.