3 Yesus nataa nae, “Lahenda ia poken nana ta huu ria sala-sikon, ma ta ina-ama nara boe'. Ria bokin leo naa', ela basa lahenda bisa rita Manetualain nonoi-tatao malolen nai ria. 4 Manetualain nadenu Au. De ita muste talala'o Ria nonoi-tataon bei hapu fai leledo'. Huu fo maiu' a mai, sona lahenda ta bisa noi nonoi' so'. 5 Tepo' fo Au bei nai dae-bafo' a, Au sama leo' makaledo', de nahaa-nakaledo soa-neu' basa lahenda ra.”^a

6 Yesus dedea basa nae leo' naa, boe ma Ana mudi ape neu' dae a. Ana naloe aon, de eepo' nabuan noo dae a dadi tane. Boe ma Ana lame tane ria neu' lahenda poke' a mata na. 7 Ana nafadan ni nae, “Leo kolam Siloam muu, marou mata ma nai naa.” (Nai dedea Ibrani, Siloam sosoa na nae, ‘nadenun’.) Boe ma lahenda poke' ria neu narou mata na nai naa. Ana fali main, te nita dae so!^b

8 Boe ma uma kotia-kotai' ara, ma lahenda fo parnaa rita ni soa nalamemei' a, mulai ratane rae, “Lahenda poke' fo ri', maulu na soa nalamemei' a nana ria', hete?”

9 Lahenda ruma rae, “Hoo! Ri naa' so te!”

Lahenda ruma rae, “Ta'a! Noi ana nahope leo' lahenda ria!”

Tehuu lahenda ria nafada aon nae, “Ta'a! Maulu na poke' a, nana ri' au ia so te!”

10 Ara ratane ni rae, “Tao leo' bea, de losa' o bisa mita dae?”

11 Ana nataa nae, “Leo ia'! Lahenda fo ri' nade Yesus a, eepo' na tane de lame neu' au mata ka. Boe ma Ana nadenu au nae, ‘Leo kolam Siloam mu, marou mata ma nai naa.’ Huu no au tao tuka ria, de besa' ia au ita dae so!”

12 Boe ma ara ratane ni rae, “Te Lahenda ria nai bea?”

Ana nataa nae, “Au ta bubulu'!”

13-14 Fai fo Yesus eepo' na tane, de tao na lahenda poke' ria bisa nita dae a, nana la'e lahenda Yahudi ra fai hahae aon. Boe ma ara roo lahenda fo parnaa poken a, neu nataa nai partei agama Farisi a lahenda nara. 15 Lahenda Farisi ra ratane ni rae, “Soba o mafada dei! Ubea' taon, de besa' ia o bisa mita dae?”

Ana nataa nae, “Leo ia'. Lahenda ria tao tane neu' au mata ka. Basa de au uu arou mata ka. Besa' ia au bisa ita dae.”

16 Boe ma lahenda Farisi ruma rae, “Lahenda fo ri' puli na o, ta neme Manetualain mai fa. Ami bubulu', nana huu Ana nalena-laka atoran la'e-neu' fai hahae ao'.”

Ruma bali rae, “Hapun nai bea lahenda masala' a, bisa tao tanda heran leo naa'?” Boe ma ara ralelena ao' losa' rabika-rabati'.

17 De ara ratane selu' lahenda fo maulun na poke ni a rae, “Tuka o, sona Lahenda fo ri' tao na o mita dae a, lahenda rupa leo bea' ria?”

Ana nataa nae, “Tuka au, sona Ria nana Manetualain mana nesi matan esa rian.”

18 Tehuu lahenda Yahudi ra malaka nara ta ramahere, lahenda ria parnaa poken, ma besa' ia bisa nita dae. Boe ma ara fee lahenda reu raloo ina-ama nara mai rataa. 19 Ara mai boe ma malaka sira ratane rae, “Emi anam ia, do? Tebe boki ni, te poke mema' do, ta'a? Boe ma tao leo' bea, de besa' ia nita dae?”

20 Lahenda ria ina-ama nara rataa rae, “Tebe, ami anam ia. Ma bokin, te ana poke' mema' so. 21 Tehuu ami ta bubulu', ana pake ubea' de besa' ia bisa nita dae. Ma bea ri' tao naan nita dae, ami ta bubulu' boe'. Bau-ina' ana so, de matane ni, huu fo ana bisa tui aon.” 22 Ara dedea rae leo' naa, nana huu ara bii' lahenda Yahudi ra malaka nara. Huu fo ara bubulu' malaka sira rala hara' rae, “Kalu lahenda manaku, Yesus nana Kristus, sona lahenda fo ri' manaku nae leo naa', ami usi henin neme ita lahenda Yahudi a uma mamaso na mai.” 23 Huu ria naa, lahenda ria ina-ama nara rataa rae, “Bau-ina' ana so, de matane mata' ana.”

24 Boe ma ara raloo selu' lahenda fo maulu na poken a. Ara ratane ni rae, “Leo ia'! O muste tui roo' nai Manetualain matan, ela manea Ria nade malole Na. Huu fo ami bubulu' matetu' Yesus nana, lahenda tadalu'.”

25 Lahenda fo parnaa poken a nataa nae, “Papa sara boso' mamanasa! Au ta bubulu' Ria lahenda tadalu' do, ta'a. Matetu na, au bubulu' noi maulu na au poke'; tehuu besa' ia au bisa ita dae.”

26 Ara ratane ni rae, “Te Ana tao ubea' neu' o? Ana tao o mata ma leo' bea, de mita dae?”

27 Ana nataa nae, “Bisinaa' a au tui so, tehuu emi ta nau mamanene. Ubea' taon, de emi nau au tui selu' bali? Bate papa sara boe nau dadi Ria ana mana tuka dean, do?”

28 Boe ma ara ramumulu-ramamae' ana rae, “Ela noi o dadi muu' Ria ana mana tuka dean! Huu fo ami nana, ba'i Musa ana mana tuka dea nara. 29 Ami bubulu' Manetualain dedea no Musa. Tehuu ami ta bubulu' Lahenda ria neme bea' mai.”

30 Lahenda fo parnaa poken a nataa si nae, “Heran! Emi ta bubulu' Ria neme bea' mai. Sekonaa te Ria ri' tao na au besa' ia bisa ita dae. 31 Ita basa bubulu', Manetualain ta namanene neu lahenda tadalu', hete? Tehuu Manetualain namanene neu' lahenda dale roos, fo ri' tao tuka Ria hihii-nanaun.^c 32 Mulai neme Manetualain adu lalai no dae-ina' a, losa' besa' ia bei ta parnaa hapu tutui' esa, la'e-neu' lahenda puli na lahenda fo poken neme bokin a, ela ana bisa nita dae. 33 De kalu Yesus ta neme Manetualain mai fa, tantu Ana ta bisa tao hata esa boe', hete?”

34 Ara rataa rae, “O lahenda tadalu' neme boki o a! Tao leo' bea, de o bisa manori-mafada matafali' ami?” Boe ma ara usi henin neme sira uma mamaso na mai.

35 Yesus namanene ara usi heni lahenda fo ri' parnaa poken a, neme uma mamaso Yahudi a mai, boe ma Ana neu saka lahenda ria losa hapun. Ana nafada ni nae, “Leo' bea! O mamahere Lahenda Dae-bafo' Tetea' a, do?”

36 Ana natane natafali' nae, “Ramatua', te Ria nana bea? Mafada, ela au amahere Ni.”

37 Yesus nafada ni nae, “O maneta moo Ni so. Ria nana ri' Au, fo besa' ia dedea no o.”

38 Lahenda ria nae, “Ramatua', au amahere!” Boe ma ana sunda' undulaka na, de do'o-tabe Yesus.

39 Yesus nafada ni nae, “Au leo dae-bafo' ia mai, ela atudu lahenda ra sala-sikon, ela lahenda poke' a bisa nita dae, ma lahenda mana nita dae, bisa dadi poke'.”

40 Lahenda Farisi hida rai naa, ramanene Ria dedea Na. Boe ma ara ratane Ni rae, “Leo bea' ia? Tea na, nana ami ta poke', hete?”

41 Yesus nataa si nae, “Leo ia'. Kalu tebe emi poke', sona ta hapu esa sale emi boe'. Tehuu emi mae, emi lahenda mana nita dae. Huu ria naa, emi lepa-masaa mahere sala-siko mara.”