3 Fai ria hapu ra ina' esa hohoke, de hopu raan. Boe ma mesen agama hida, ma lahenda Farisi hida hela roon leo Yesus neu. Ara raseti ina' ria, napadei neu' sira basa matan. 4 Boe ma ara rafada Yesus rae, “Papa Mesen. Ami hapu ma ina' ia hohoke, de hopu maan. 5 Tuka ba'i Musa atoran nara, hapu pareta nae, ‘Lahenda hohoke, sona muste pia naisan.’ Tuka Papa, sona leo' bea?”^a 6 Ara saka' soba Ni, ela hapu eno' fo rahihii' Ana.

Yesus ta sisipo' asa, tehuu Ana natele de dui' dae a neni' lima u'u Na. 7 Ara ratane Ni la'o naroo. Boe ma Ana foa napadei' de nafada si nae, “Leo ia'. Kalu neme emi mai, bea ta parnaa tao sala', sona ria ri' pia naulu' ina' ia neni' batu.” 8 Boe ma Ana natele bali, de dui' dae a.

9 Ara ramanene Ni dedea nae leo' naa, boe ma ara mae'. Huu fo nai dale nara, bubulu' raan sira boe parnaa tao sala'. Boe ma sira esa-esa la'o mulai neme lasi' a mai, losa muri-ana' ara. Mate'e na, ela noi Yesus no ina' ria mesa' asa reu' naa. 10 Boe ma Yesus foa napadei' bali, de natane nae, “Te bea' reu so? Ta hapu lahenda esa huku o boe', do?”

11 Ana nataa nae, “Ta'a, Papa.”

Boe ma Yesus nafada ni nae, “Au boe ta huku o. Fali leo. Tehuu mafarerene'. Boso' tao sala' bali!”]^b

12 Boe ma Yesus dedea no lahenda dodou' bali nae, “Au sama leo' makaledo' soa-neu' lahenda nai dae-bafo' a. Lahenda bea tuka Au ta nasoda nai maiu' a, tehuu ana leo nai makaledo' mana neni soda matetu'.”^c

13 Lahenda Farisi hida radedea laka rae, “O sakasii selu' la'e-neu' ao-ina heheli ma, do? Ta bisa! Tuka ita atoran na, muste lahenda feke' ri' dadi sakasii fee lahenda, ta lahenda ria sakasii selu' ao-ina na. De ami ta sipo', ma ta mamahere.”^d

14 Yesus nataa si nae, “Leo ia'. Leo mae Au sakasii selu' la'e-neu' Au ao-ina heheli Ka, tehuu Au dedea-nafada Ki la'e. Huu fo Au bubulu' matetu' Au eme bea' mai, ma saka' leo bea' uu. Emi ta bubulu' Au eme bea' mai, ma ta bubulu' Au saka' leo bea' uu. 15 Emi uku-sudi lahenda pake lahenda dae-bafo' a uuku-susudin. Tehuu Au ta pake lahenda dae-bafo' a uuku-susudin, fo uku-sudi lahenda esa boe'. 16 Kalu Au uku-sudi lahenda, Au uuku-susudi Ki la'e. Au ta mesa' Ka uku-sudi, tehuu Au tao basa-basan sama-sama oo Papa Ka fo ri' nadenu Au a. 17 Boso' mafarene henin. Huu fo mana dui' nai emi Atoran agama ma nae, ‘Kalu lahenda sakasii dua tui hihii-nanau' esa' a, sona matetu na ri naa'.’ 18 De ta noi Au mesa' ka sakasii selu' la'e-neu' ao-ina heheli Ka. Au Papa Ka fo ri' nadenu Au a, sakasii la'e-neu' Au boe.”

19 Boe ma ara ratane Ni rae, “Te O Papa Ma nai bea?”

Yesus nataa si nae, “Emi ta malela' matetu' Au. Emi boe ta malela' Au Papa Ka. Kalu emi malela' matetu' Au, tantu emi malela' Ana boe.”

20 Yesus nafada basa ia ra, fai' fo Ana nanori-nafada nai Uma Mamaso Yahudi Ina a, nananea' peti kolete. Ta hapu esa hopu Ni boe', nana huu bei ta naraa la'e ledo-fain.

21 Yesus nafada selu' asa nae, “Neu' ko Au foa ela emi fo leo mamana feke' uu. Emi saka Au, tehuu ta hapu Au, huu fo emi ta manuu haak leo mamana' ria meu. Neu' ko emi mate meni sala-siko mara.”

22 Lahenda Yahudi ra malaka nara esa natane esa rae, “Ana dedea ubea' ia? Ana nau naisa aon, do? Huu fo Ana nae, ‘Emi ta bisa leo mamana' ria meu.’”

23 Boe ma Yesus nafada si nae, “Emi meme dae-ina' a, dae' mai. Tehuu Au eme lalai poin mai. Emi lahenda meme dae-bafo' ia mai. Tehuu Au ta lahenda eme dae-bafo' ia mai fa. 24 Huu ria naa, bisinaa' a Au afada ae, neu' ko emi mate meni sala-siko mara. Huu fo kalu emi ta mamahere mae, Au nana Kristus, fo ri' Manetualain feen mai, sona neu' ko emi mate meni sala-siko mara.”

25 Boe ma ara ratane Ni rae, “Te bea O?”

Yesus nataa si nae, “Au afada mema' neme masososa na mai so.^e 26 Au bisa afada hihii-nanau' dodou' la'e-neu' emi. Emi sala-sikom boe dodou'. Tehuu Au ta atudu hihii-nanau' sira. Ria fo ri' nadenu Au leo ia' mai a, kalu Ana dedea, sona dedea noi roo-tetu'. Ma afada lahenda nai dae-bafo' a, noi hihii-nanau' fo ri' Au amanene neme Ria mai a.” 27 (Ria maksud na nae, Papa Na nai nusatetu-ikutema' a. Tehuu ara ta rala Ria maksud Na.)

28 Boe ma Yesus dedea tamba selu' nae, “Kalu emi londa Au, Lahenda Dae-bafo' Tetea' a, nai ai kake' lain, sona besa' ko emi bubulu', Au ia Kristus. Ma Au ta bisa tao hata-hata esa neme ao-ina heheli Ka, tehuu Au anori-afada noi basa hihii-nanau' fo Papa Ka nai nusatetu-ikutema' a nanori-nafada Au a. 29 Ria fo ri' nadenu Au a, sama-sama no Au la'o naroo. Ana ta parnaa nataa' Au mesa' Ka, huu fo Au tao tuka Ria hihii-nanaun la'o naroo.”

30 Yesus nafada basa hihii-nanau' ia ra, boe ma lahenda dodou' ramahere Ni.

31 Boe ma Yesus nafada lahenda Yahudi fo ri' ramahere Ni a nae, “Kalu emi masoda mahere nai Au Hara-dasi Ki dale', ma emi manori maroo neme Au mai, sona emi dadi Au ana mana tuka dea matetu kara. 32 Emi bisa bubulu' basa hihii-nanau' roo-tetu'. Ma hihii-nanau' roo-tetu' sira si' po'i-tata ra emi, de emi ta dadi ata so'.”

33 Ara radedea laka rae, “Ami ta lahenda atan fa! Huu fo ami nana ba'i Abraham tititi-nonosin! Ubea' taon de O mae, neu' ko ami dadi nanapo'i-nanatata'?”^f

34 Yesus nafada si nae, “Tebe-tebe Au dedea. Basa lahenda masala' ara, dadi sama leo' sala-siko' a atan, de noi tuka-tuka' sala-siko' a hihii-nanaun. 35 Tehuu biasa na, leo ia': ata ra ta biasa leo rahere rai uma esa. Noi malaka a ana na ri' leo nahere nai naa. 36 De kalu Au, Manetualain Ana Na, sae-safe heni emi sala-siko mara, sona emi nanapo'i-nanatata', ma ta dadi meu' sala-siko' a atan so'. No ria naa, emi nanapo'i-nanatata' matetu', ma ta tuka sala-siko' a hihii-nanaun so'.

37 Au bubulu' emi nana, ba'i Abraham tititi-nonosin. Leo mae leo' naa, tehuu emi saka eno' fo maisa Au, nana huu emi ta nau sipo' Au Hara-dasi Ki. Huu fo nai emi dale mara ta hapu mamana', ela mapeda-mahinda Au Hara-dasi Ki. 38 Au afada basa hihii-nanau' fo ri' Au ita Papa Ka natudu Au si. Ma emi tao tuka hihii-nanau' fo ri' mamanene neme emi papa ma mai.”

39 Ara rataa Ni rae, “Ami nana, ba'i Abraham tititi-nonosin!”

Yesus nafada si nae, “Kalu emi nana ba'i Abraham tititi-nonosin matetun, sona emi muste tuka ria leleo-lala'on. 40 Tehuu ba'i Abraham ta parnaa tao sala' sama leo' emi tao a! Emi saka eno' fo maisa Au. Sekonaa te Au afada emi basa hihii-nanau roo-tetu' fo amanene neme Manetualain mai. 41 Emi nonoi-tataom mema' ta oosi-babasa' neme emi papa ma mai.”

Tehuu ara radedea laka rae, “Ami nana ana' makaledo'! Boso' mae ami, ana' maiu'! Huu fo ami Papam noi esa' a, ri' Manetualain!”

42 Yesus nafada si nae, “Tehuu kalu tebe-tebe Manetualain nana emi Papam, tantu emi sue-lai Au. Ma Au nai ia, huu fo Au eme Ria naa' mai. Au mai ta tuka Au hihii-nanau mesa Ka. Tehuu Au mai, nana huu Ria ri' nadenu Au. 43 Ubea' taon, de emi ta bubulu' Au dedea Ka? Bate huu no emi ta nau mamanene fa!

44 Emi rupa' esa moo nitu ra malaka na. Huu fo emi mahii' tao tuka ria hihii-nanaun! Neme masososa na mai, ria kanisa lahenda'. Ana nalena-laka hihii-nanau' roo-tetu', huu fo ana tipa heni basa roo-tetu'. Ria biasa na ri' napuputa' a. Huu fo ria mana mapuputa', ma dedea fufudi na seli! 45 Au afada hihii-nanau' roo-tetu' a. Tehuu emi ta mamahere Au. 46 Soba neme emi mai, bea bisa natudu buti nae, Au tao sala'? Heran! Kalu Au dedea roo-tetu', ubea' taon de emi ta mamahere Au?

47 Lahenda bea neme Manetualain mai, sona ana namanene Ria Hara-dasin. Tehuu emi ta meme Manetualain mai fa, huu ria naa emi ta mamanene Au.”

48 Lahenda Yahudi ra malaka nara rataa Ni rae, “Tebe leo' ami nafada ma, lahenda Yahudi ta O fa, tehuu O lahenda Samaria. O boe nitu heke'!”

49 Yesus nataa nae, “Au ta nitu heke'. Au hada-horomata neu' Papa Ka nai nusatetu-ikutema' a. Tehuu emi ta hada-horomata neu' Au. 50 Au ta io ao Ka, fo atudu Au kahere Ka. Tehuu Esa ri' nau natudu Au kahere Ka. Kalu Au dedea la'e do ta'a, Ria ri' naetu'.

51 Au Dedea-nafada Ki, mema' tebe! Lahenda bea namanene, ma tao tuka Au Dedea-nafada Ki, neu' ko ana ta mate.”

52 Lahenda Yahudi ra malaka nara ramanene leo' naa, boe ma rafada Ni rae, “Besa' ia ami bubulu' O dedea kamulu', nana huu nitu heke' O. Huu fo ba'i Abraham, mate ni. Manetualain mana nesi mata fai ulu nara boe, mate. Tehuu O mae, ‘lahenda bea namanene ma tao tuka Au Hara-dasi Ki, neu' ko ana ta mate.’ Mema' O kamulu'! 53 Do, O afi mae, O kahere' lena neme Abraham mana mate' a? Do, O kahere' lena neme Manetualain mana nesi matan mana mate' ara? O afi mae, O nana bea?”

54 Yesus nataa si nae, “Kalu Au io Ao Ka, sona lahenda ta sipo'. Sekonaa te Au ta io Ao Ka, tehuu Au Papa Ka ri' io Au. Emi manaku mae, Ria nana emi Manetualain ma. 55 Tehuu emi ta malela' Ana. Au alela' Ana matetu'. Kalu Au ae ta alela' Ana, sona Au maa masarole-masarali' sama leo' emi. Tehuu Au alela' Ana, ma Au tao tuka Ria Hara-dasin. 56 Tepo' fo emi ba'im Abraham nahani nau nita Au mamai Ka, namaho'o-natadale. Tebe ana nita, de dale na loa' a.”

57 Lahenda Yahudi ra malaka nara rafada Ni rae, “O teum bei ta losa lima hulu boe'! Tehuu O mae mita ba'i Abraham so. Tebe, do?”

58 Yesus nafada si nae, “Tebe! Huu fo Au aulu', besa' ko ba'i Abraham.”

59 Boe ma lahenda sira here batu nau pia Ni, huu fo Ria dedea Na natudu nae Ria nana Manetualain. Tehuu Ana la'o nafufuni', de kalua ela Uma Mamaso Yahudi Ina a kintal na.^g