Boe ma ina' esa neme bendar a mai aso oe nai oe-dodolu' ria. Yesus hule ni nae, “Susi. Fee Au oe bai' inu dei, do?”

9 Tehuu ina' ria kekes ara, nana huu lahenda Yahudi ra ta biasa rabua ro lahenda Samaria ra. Boe ma ana natane natafali' Yesus nae, “To'o lahenda Yahudi. Ma au lahenda Samaria. To'o hule au oe minu. Ta sala ia, do?”^b

10 Yesus nafada ni nae, “Leo ia'. Susi muste bubulu' Manetualain babati-papalan neu' basa lahenda ra, ma malela' Au mana hule oe ia nana Bea. Kalu susi bubulu', tantu susi hule Au oe, sona Au fee oe mana neni soda'.”^c

11 Ina' ria nafada Ni nae, “To'o ta manuu hai' dodolu'. Ma oe-dodolu' ia boe dema' a. To'o hapu oe mana neni soda' ria neme bea' mai? Te oe ria nai bea bali? 12 To'o ta bisa kahere' lena ita ba'in Yakob! Ria ri' fee ami oe-dodolu' ia. Ma ria boe ninu neme oe-dodolu' ia mai. Ria ana nara, ma banda nara boe leo naa'.”

13 Yesus nataa ni nae, “Mafarerene'! Lahenda bea ninu oe neme oe-dodolu' ia mai, neu' ko mamada-metihedu selu'. 14 Tehuu lahenda bea ninu oe fo Au fee a, neu' ko ta mamada-metihedu so'. Huu fo Au fee oe a, nana sama leo' oe mata' mana bubu' esa. Oe ria neni soda' matetu' mana basa taa' a.”

15 Ina' ria nafada Ni nae, “Kalu leo' naa, sona To'o fee au oe ria leo, ela boso' au maa ka mada' a bali! No ria naa, au ta mai dolu oe kokosen nai ia so'.”

16 Yesus nadenu ni nae, “Leo ia'. Susi fali, fo maloo moo sao ma leo ia' mai dei.”

17-18 Ana nataa nae, “Tehuu au ta anuu sao'.”

Yesus nafada ni nae, “Tebe, o tui tea' ria. Huu fo o parnaa manuu sao' lima. Ma besa' ia tou' fo nai naa, nana o saom ta ria.”

19 Ina' ria nataa Ni nae, “Besa' ia au bubulu', To'o nana, Manetualain mana nesi matan esa ian. 20 Au saka' atane. Ami lahenda Samaria a bei-ba'i mara do'o-tabe Manetualain nai lete' Gerisim ia.^d Tehuu emi lahenda Yahudi a mae, kalu nau do'o-tabe Manetualain, sona basa lahenda ra muste reu' Yerusalem. Tuka To'o, sona matetu na ri' ubea'?”

21 Yesus nataa ni nae, “Susi mamahere Au dedea Ka, huu fo tea na ria' dei. Do'o-tabe Manetualain nai lete' ia, do nai Yerusalem, neu' ko losa ledo-fain, te dua si sosoa-raraa' taa'. 22 Emi lahenda Samaria ta bubulu' dodou', la'e-neu' emi do'o-tabe bea. Tehuu ami lahenda Yahudi a bubulu' dodou' la'e-neu' Manetualain fo ri' ami do'o-taben a. Huu fo Ana nau pake ami, fo soi eno' ela lahenda bisa hapu popo'i-tatata' reme sala-siko nara mai. 23 Losa ledo-fain, ri' mulai neme besa' ia, lahenda manado'o-manatabe matetu' a do'o-tabe ita Papa na nai nusatetu-ikutema' a, tuka Ria Dula-dale Na, ma tuka matetu na. Huu fo Ama' a nai nusatetu-ikutema' a nahii' lahenda rupa leo naa' a do'o-tabe Ni. 24 Manetualain nana, Dula-dale'. Lahenda bea do'o-tabe Ni, muste do'o-tabe tuka Ria Dula-dale Na, ma tuka matetu na.”

25 Ina' ria nafada Ni nae, “Au bubulu' Mesias saka' mai, ri' lahenda hule rae, ‘Kristus’, fo Manetualain helu mema' nau feen mai. Kalu Ana mai, sona tui-beka basa-basan neu' ita.”

26 Yesus nataa ni nae, “Ria ri' Au, fo besa' ia mana dedea' ia.”

27 Naraa no hatemata' ria boe, Ria ana mana tuka dea nara fali reme bendar a mai. Ara heran, nana huu rita Ni dedea no ina Samaria esa. Tehuu ta hapu esa natane ina' ria nae, “O mahii' ubea'?” Ma ta hapu esa natane Yesus nae, “Ubea' taon de Papa dedea moo ina' ia?”

28 Boe ma ina' ria foa ela kusi na neu' naa, de fali leo bendar neu. Ana tui lahenda fo rai naa nae, 29 “Mai mete maneni lahenda ia dei! Ana nafada neu' loan, basa-basan fo au parnaa tao a. Bate ia nana Kristus, fo ri' Manetualain helu nau feen mai a!” 30 Boe ma lahenda ra kalua reme bendar mai, reu dama Ni.

31 Fai fo ina' ria besa' ko fali leo bendar neu, Yesus ana mana tuka dea nara lele'o Ni rae, “Papa Mesen! Mai mua dei!”

32 Tehuu Ana nataa si nae, “Au anuu nanaa-nininu' fo ri' emi ta bubulu'.”

33 Ria ana mana tuka dea nara esa natane esa rae, “Leo bea' ia? Bea ri' mai fee Ni nanaa-nininu'?”

34 Tehuu Yesus nafada si nae, “Leo ia'. Manetualain nadenu Au tao tuka Ria hihii-nanaun, ma alala'o nonoi-tataon losa' basa. Ria sama leo' nanaa-nininu' soa-neu' Au. 35 Emi biasa memete-rerelu nai oka-tine, boe ma takaseer mae, ‘Bei bula' haa bali, besa' ko bisa oru.’ Nenene, Au afada! Kalu emi memete-rerelu matalolole oka-tine ra, besa' ia ramatasa e'etu-o'oru'. Oka-tine ra, sama leo' lahenda makadoto' ara si ele' leo ita mai. Huu fo ara sadia ramahere Au. 36 Ta noi leo naa' fa, te manaetu-manaoru fo rabubua sira buna-boan nai mamana pepeda-fufua' dale', mulai sipo seseba-babae nara. Sira sama leo' lahenda natudu eno', fo lahenda ramahere Manetualain, ela hapu soda matetu' mana basa taa' a. No ria naa, lahenda manasele-manakari, ma lahenda manaetu-manaoru ra, bisa ramaho'o-ratadale bela'. 37 Tebe leo' dedea lasi' a rae, ‘Lahenda esa sele-kari, ma lahenda feke' a ri' etu-oru.’ 38 Au adenu emi meu etu-oru neme lahenda feke' a nonoi-tataon mai. Tebe emi ta moi-tao, tehuu emi ri' hapu neme sira sosota na.”

39 Fai ria, lahenda Samaria dodou' rai bendar ria ramahere Yesus, nana huu ina' ria tui nae, “Ana nafada neu' loa na basa-basan fo au parnaa taon a.” 40 Fai fo ara leo Yesus mai, ara hule Ni rae, “Ramatua', leo moo ami nai ia leo!” Boe ma Ana leo nai naa noi fai' dua' a.

41 Ma lahenda feke' dodou' ramahere Ni, nana huu Ria dedea-nafadan. 42 Boe ma ara rafada ina' ria rae, “Usele' a ami moi mamanene' o dedea ma. Tehuu besa' ia ami mamahere Ni, nana huu ami mamanene mata' neme Ana mai. Ami bubulu' matetu', Lahenda ia ri' bisa po'i-tata naa ita basa nai dae-bafo' ia, teme sala-siko' ara mai.”

43 Yesus asa leo fai' dua rai naa, boe ma ara leo propensi Galilea reu. 44 (Lai' esa de, Yesus parnaa nafada nae, “Lahenda ta fee hada-horomata neu' Manetualain mana nesi matan nai ria koro-tadun.”)^e 45 Tepo' fo bei ta losa fai feta Paska, lahenda Galilea dodou' leo kota Yerusalem reu fo tao feta malole ria nai naa. Huu no ara rita basa-basan fo ri' Yesus taon nai Yerusalem, de fai fo Ana fali leo Galilea neu losa boe ma ara sipo' Ana noo malole.^f 46 Boe ma Yesus asa la'o raroo fali selu' leo koro Kana nai propensi Galilea, mamana' fo parnaa Ana tao na oe a dadi anggor.

Fai ria, pegawe esa nai kota Kapernaum. Ana mane na namahedi.^g 47 Pegawe ria namanene rae, Yesus fali neme propensi Yudea mai leo Galilea neu, boe ma ana neu saka Yesus nai Kana. Naneta noo Yesus, boe ma ana hule Ni, mai puli ana na. Huu fo ana' ria noi mamaten.

48 Yesus nafada pegawe ria nae, “Kalu emi ta mita Au tao tanda heran rupa', sona emi ta mamahere Au!”

49 Pegawe ria nataa Ni nae, “Ramatua', tulu-fali au dei. Ta'a sona mate au ana ka.”

50 Yesus nafada ni nae, “Fali leo. Huu fo ana ma te'e so.”

Boe ma ana fali tuti' a, nana huu namahere Yesus dedea Na. 51 Fai fo ana fali, bei nai eno talada', te ata nara mai soru' ana, de rafadan rae, “Papa boso' susa bali, huu fo ana ma te'e na aon so.”

52 Boe ma ana natane si nae, “Ana' a te'e na aon ri' li'u hida?”

Ara rataa rae, “Usele' a ledo hanan ria, li'u esa boe ma ao-luu mai na mopon.” 53 Boe ma pegawe ria nafarene tuti' a nae, ana na te'e na aon mulai neme jam fo Yesus nafada nae, “Papa ana ma, te'e so.” Boe ma ria no basa uma isi nara ramahere Yesus.

54 De ia nana tanda heran kadua a, fo ri' Yesus tao, fai fo Ana kalua neme Yudea, leo Galilea neu.