12
De talo bee no ita fo bei kasodak hatematak ia? Ita sama leo hataholi mana tungga nakasusudik nalaik so. Ita bei-ba'i makahulun nala, fo lamahele neu Manetualain, ala sama leo mana manilu, fo lambadeik ndule fo fufu'a ita samanen. Tehuu mete ma ita bei nana mba'ak to sala-singgok kala, na, ndia tao nala ita talai koe-koe. Huu ndia de ita musi nggali heni basa sala-singgok kala sila, fo suek ita bisa talai no tean. Huu Manetualain mesak kana hele nala ita so, fo tungga nakasusudik ia, de ita musi takatataka fo talai losa too-lane. 2 Ma ita musi talai no ta suli kii-konak, tehuu kada suli Yesus. Te Ndia ndia soi dalak fo ita bisa tamahele neu Manetualain. Ma dei fo Ana tulu-fali fo ita bisa tamahele takandoo losa babasan. Masaneda, do taa? Neu faik fo Yesus doidoso nai ai ngganggek, hataholi haumemeen, tehuu Ana nakatataka nakandoo. Huu Ana bubuluk, mete ma basa Ndia doidoson so, dei fo Ndia dalen namahoko. Tetebes ndia. Te neu faik fo Ana mate so, boe ma Manetualain so'u nala Ndia fo nanggatuuk neu Manetualain boboa konan, de Dua sala palenda sama-sama. 3 Mae hataholi tao manggalauk neu Ndia, tehuu Ana nakatataka nakandoo. De ei boso mafalende heni Yesus doidoson ia, fo suek ei bisa makatataka makandoo, ma ta mameda manggu.Manetualain nau ka'i fo nanoli ita, sama leo amak esa nanoli anan
4 Ei laban soba-douk kala so, tehuu ei bei ta laban tingga-tingga losa ei daan faa. Tetebes, hetu? 5 Fama ei mafalende heni Manetualain Dede'a-kokolan so, fo Ana nafada ei, sama leo amak esa kokolak no anan nae,
“Ana, ei!
Mete ma ita Lamatuan nanoli o nenik huku-dokik, suek o masoda tungga dala tetebes,
na, o boso tao makadadaek!
Ma mete ma Ana ka'i fo nanoli o,
na, o dalem boso kadi'i.
6 Te ita Lamatuan ka'i fo nanoli hataholi fo Ana suen.
Memak basa hataholi fo Ana simbon dadik Ndia anan,
na, neu ko Ana ka'i fo nanoli sala.”a
7 De, mete ma Manetualain ka'i fo nanoli ei fo masoda tungga dala ndoos, na, kada makatataka. Ana tao leo ndiak, huu ei dadik Ndia anan so. Te amak esa-esak musi ka'i fo nanoli ndia anan, losa kakanak ndia nasoda tungga dala ndoos. 8 Te mete ma Manetualain ta ka'i fo nanoli ei sama leo Ndia ana fe'en nala, na, ndandaan nae, ei ia, ta Ndia anan.
9 Ita tateme fee hada-holomata neu ita ama bonggin nai dae-bafok ia, huu ana ka'i fo nanoli ita neu faik fo ita bei kadi'ik. Tetebes ndia so. Tehuu lena-lenak bali, ita musi tamanene neu Manetualain, huu Ndia ndia ita Aman manai nusa sodak, ma Ana nau ka'i fo nanoli ita, suek tasoda tungga Ndia dala ndoon. 10 Ita ama bonggin ka'i fo nanoli ita kada ta doo anak, tungga hata fo ana taok malole. Tehuu Manetualain bubuluk lena, hata fo ita paluu tanoli. Huu ndia de Ana ka'i fo nanoli ita, suek tasoda malalaok sama leo Ndia. 11 Memak ta malole, mete ma ita nana ka'ik. Tehuu doo-doo boe ma, ita dalen dadi ndoo-ndoo, huu ita bubuluk tasoda tungga Manetualain hihiin so.
12-13 Tolanoo nggala ei! Tao matetea ei limam mala fo mana mangguk ndia so, ma tao mamada'u ei eim mala fo mabela ndia so. Boso malaik peko-pakik, tehuu malaik ndoos makandoo, fo sila ta mana dadadik bali hambu fufu'a balakaik boe, suek bisa lalaik lakandoo. Ei musi tao matea ei dalem fo makatataka makandoo, ma mamahele neu Karistus.b
Boso timba heni Manetualain dale malolen neu ei
14 Tolanook mana mamahele neu Karistus! Ei musi mbalak eik fo masoda no mole esa no esa. Ma masusua tingga-tingga, fo masoda malalaok. Te hataholi fo ta malalaok, ta bisa nita Manetualain.
15 Ei musi esa toba esa fo suek boso losak hambu neme ei mai nakadedeak losa ta nameda Manetualain dale malolen. Manea matalolole fo boso mbo'i hataholi mana dale hedik toda nai ei laladam mala. Te ndia sama leo laso makaheduk, fo ana tao nakalulutu hataholi no'uk.c 16 Mata neuk, ma manea fo boso hambu mana maeok. Boe ma mata neuk, ma manea fo boso hambu mana masoda ta mbali Manetualain, sama leo Esau. Esau ndia, ba'i Isak ana ulun. Faik esa, Esau fali neni uma neu, te ana ndoe nalan seli. Ana noke nana'ak pinggak esa neme fadin Yakob mai, ma ana bae nenik ndia haak ka'an.d 17 Tehuu ta dook boe ma, ita bubuluk Esau fale dalen so. Huu neu faik fo ama Isak nau noke Manetualain fee baba'e-babatik ana uluk neu Esau, tehuu Isak ta bisa noke so bali, huu Esau fee hiak heni ndia haak. Huu ndia de mae namatani boe oo, ana ta bisa hambu falik hata fo makahulun ana nggali henin so.e
18 Leo iak tolanoo nggala ei! Ita bisa teni Manetualain matan teu, tungga dala beuk fo Ana soi fee ita so. Tehuu makahulun ele, ita bei-ba'in nala bei ta bisa leo ndiak. Huu neu faik fo Manetualain mba'a heheluk no sala, ala ladekak lo letek esa, nade Sinai. Nai letek ndia lain, hambu ha'i mana mbilak. Hambu ani sanggu boe. Ma nai letek ndia boe oo, nana mbotik no makiu-mumuuk, losa tao nala sala bii lalan seli. 19 Sila boe lamanene to'ik liin, boe ma Manetualain halan fo ana seli kalua neme letek ndia mai. Lamanene Manetualain kokolan, boe ma ala boe bii, losa loke ba'i Musa lae, “Awii! Ai ta bisa makatataka mamanene halak ia so bali!”f 20 Sila memak ta bisa lakatataka, huu hata fo Manetualain palendak ndia, belan seli. Te Ana nafada nae, “Ta bole hambu mana heta ein nai letek ia! Mae hataholi, do banda! Te see fo heta ein nai letek ia, musi nana mbiak nenik batu losa maten.”g 21 Hata fo ala litan nai letek ndia, memak tao nala aon nala mumulu. Losa ba'i Musa mesak kana dele mbuse makasufuk boe.h
22 Tehuu hatematak ia, dalak neni Manetualain neu nana soik, ma ita kokolak matan to Ndia so. Hatematak ia, ita teni letek esa teu, nade Sion. Ma nai ndia, hambu kota Yerusalem. Kota Yerusalem ta manai dae-bafok, tehuu kota Yerusalem beuk manai nusa sodak, fo ndia Manetualain mamana leleon. Nai ndia, Manetualain atan nai nusa sodak makadotok, losa lifu-lifuk fo tao feta lakasoe. 23 Kota ndia dadik neu mamana nakabuak boe, soa-neu basa hataholi mana lamahele neu Karistus. Te Manetualain tao daftar so, fo sulak sila esa-esak naden nai nusa sodak. Manetualain nai ndia boe, fo dei fo palisak, ma timba-tai basa hataholi sodan. Ma nai ndia boe hambu nakabubuak basa hataholi, fo makahulun ele Manetualain simbok kasa no malole, huu ala lamahele neu Ndia. Nai ndia ala dadi matetuk. 24 Ma nai ndia boe hambu Yesus fo dadik lelete soa-neu Manetualain no hataholi. Yesus maten, nafaa heni Ndia daan, fo suek Manetualain bisa mba'a hehelu beuk no ita. Huu ndia de Yesus daan, tao makasufu Manetualain dalen. Tehuu ia fe'e neme Habel daan nai Tutui Sososak. Huu neu faik fo Kaen tao nisa Habel, Habel daan fo ana faa ndia, tao nala Manetualain dalen natobi, losa Ana huku Kaen.i
25 Pasa neulalau ndi'i dook, fo mamanene hata fo Manetualain sangga kokolak neu ei. Boso tao sama leo ita bei-ba'in nala, fo timba heni ba'i Musa kokolan, neu faik fo ana dadik Manetualain mana kokolan nai dae-bafok ia. Basa de Manetualain huku sala. Nakalenak no ita! Mete ma ita ta nau tamanene Ndia kokolan neme nusa sodak mai, na, neu ko Ana huku ita belan lena!j 26 Neu faik fo ita bei-ba'in nala lambadeik nai lete Sinai, Manetualain halan fo ana seli ndia, tao nala dae nangge'o. Hatematak ia Ana helu nae,
“Dei fo Au tao dae nangge'o la'i esa bali,
tehuu ta kada dae nagge'o,
te lalai nangge'o tungga boe”.k
27 Neu faik fo Manetualain kokolak nae, Ana sangga tao basan nangge'o “la'i esa bali”, na ndia ndandaan nae, Manetualain sangga tao nangge'o basan, fo Ana nakadadadik nai lalai ma dae-bafok ia ta bisa lahele so, de mopo heni sala. Tehuu basa manai nusa sodak isin ndia bisa lahele, de ala leo lakandoo.
28 Manetualain to'u palenda nai nusa sodak. Nusa sodak ndia ta bisa nakalulutuk. Kada ndoo-ndoo! Huu Ana nau simbok ei, fo ei maso dadik Ndia hataholin nai ndia, na mai fo toke makasi neu Ndia, takaluku-takatele neu Ndia, ma so'u dema-demak Ndia, huu Ndia mandela-masa'an! 29 Tehuu ita boe oo mata neuk, huu Manetualain nasan sama leo ha'i fo na'a heni basan.l