Au sulak susulak ia, fee ei hataholi Yahudi mana tungga Lamatuak Yesus so, fo mana taik sudi nai bee.^{a b}

2 Tolanoo nggala ei! Au sangga afada leo iak: mete ma ei hambu toto'ak mata-matak, na, boso ei samanem mala male. Kada simbok no dale namahokok, te dei fo buna-boan malole. 3 Ita bubuluk tae, mete ma ei makatataka nai toto'ak leo ndiak, ma makambo'ik neme soba-douk mai so, ma ei bei mamahele makandoo neu Manetualain, na, ndia tao nala ei dalem tamba ndoo-ndoo, mete ma hambu soba-dou fe'ek. 4 Ei ta bole heok masadea toto'ak. Tehuu ela ei bisa manoli makatataka nai toto'ak losa ei dadik mana daik. No leo ndiak, na ei dadik matetuk, ma ta kulan hata esa boe.

5 Mete ma hambu luma leme ei mai, lameda tala bubuluk dala kaluan neme toto'ak mai, na, ei bisa matane neu Manetualain fo mana bubuluk basan. Ndia ndia, bisa natudu ei dala kaluan. Ana soi dalak no dale namahokok, ma ta namanasa ei, mete ma ei hule neu Ndia. 6 Tehuu mete ma, ei hule neu Ndia, na, boso hule no dale makandaak. Ei musi mamahele tebe-tebe mae, Ana bisa fee hata fo ei hulek. Te mete ma hataholi hule no dale nakandaak, na, ndia sama leo lii fo ani fuun loe-nda'e ta no matetun. 7-8 Hataholi fo dalen lofo anak nanggongga leo ndiak, na ta natetu no basa dede'ak. Boso mamahena mae, ana hambu hata-hata neme Manetualain mai.

9 Hataholi kasian fo mana lamahele neu Lamatuak Yesus so, ala musi lamahoko, huu Manetualain so'u nala sala dadik Ndia bobonggin. 10-11 Ma hataholi kamasu'ik fo mana namahele neu Lamatuak Yesus so, ana musi namahoko boe, huu Lamatuak nanolin fo boso koao. Hatematak ia, ana bubuluk nae, ndia hata-heton nala dei fo mopo heni sala, sama leo bungga nula nabuna malole, tehuu ta dook boe ma ledo haan, de male henin. Leo ndiak boe oo, neu hataholi kamasu'ik. Mae ala lasambute lo sila uen, tehuu mopo heni sala boe.^c

12 Manetualain fee baba'e-babatik neu hataholi mana makatataka soba-douk losa nala deak. Basa boe ma ana simbo nala nggadi sodan fo Manetualain helu elan so, feen neu hataholi mana sue Ndia. Ana simbo nala nggadin sama leo hataholi mana senggik simbo makota.^d

13 Masanenedak matalolole! Mete ma hambu luma leme ei mai, hambu soba-douk ma lahiik tao salak, na, boso makasasa'ek mae, “Manetualain ndia, soba au.” Te Manetualain ta nahiik nitak tao salak. Ma Ndia ta soba nitak hataholi, fo tao salak. 14 Te salak ndia kalua neme hataholi dale hehelin mai. Sososan, ndia dalen nahiik tao manggalauk, boe ma ana pode langga uten, fo sangga tao manggalauk. 15 Boe ma ana tao tungga ndia dudu'a manggalaun ndia. Ndia mate'en, Manetualain natuda huku mate neu hataholi mana tao manggalauk.

16 Tolanoo susue nggala ei! Boso ei nana kedi nalak la'e-neu basa ia la.

17 Dede'a manggalauk kala, ta kalua leme Manetualain mai. Tehuu Ana fee basa baba'e-babatik malole ma basa dede'a malalaok. Ndia ndia nakadadadik ledo, bulak, ma nduuk kala. Basa sala lali-lali mamanak lai lalai, ma tao sila sa'o-mafon nala lamata fe'ek taa-taa. Kada Manetualain mesak kana, ta namata fe'ek. 18 Manetualain hihiin soa-neu ita leo iak: Ana fee Ndia Dede'a-kokolan fo ndoos neu ita. Ma Ana pake Dede'a-kokolan ndia, fo tao nasoda ita. Neme basa hata fo Ana taon nai dae-bafok ia, Ana hele nala ita dadik Ndia mbule ulun so.

19 Tolanoo susue nggala ei! Masanenedak dede'ak ia: hataholi boso kada kokolak nabalok. Malolenak, mete ma hataholi fe'ek kokolak malole, na, ana pasa ndi'i doon fo namanene natalolole dei. Ma hataholi boso hailai namanasa. 20 Te mete ma hataholi namanasa, na, ana ta bisa tao dede'a malole, tungga Manetualain hihiin.

21 De ei musi hotu heni basa ei sala-singgom mala. Sama leo hataholi tofa nalalao osin, de ana hotu heni kadafun nala. Ma ei boe oo musi simbok Manetualain Dede'a-kokolan no dale taidaek. Dede'a-kokolak kala sila sama leo bini fo nana selek nai ei dalem. Mete ma ei simbok mala Manetualain Dede'a-kokolan, na, dei fo Manetualain nakambo'ik heni ei, neme ei sala-singgom mala mai, ma Ana simbok ei fo masoda makandondoo henin mia Ndia.

22 Ma mete ma ei simbok mala Manetualain Dede'a-kokolan so, na, ei musi tao tunggan. Boso kada mamanene! Mete ma kada ei mamanene, tehuu ta tao tunggan, na, ei masapepeko ei ao hehelim. 23-24 Mete ma hataholi namanene nala Dede'a-kokolak ndia so, tehuu ta tao tunggan, na ndia nonook leo hataholi titilo matan neu titilok. Bei fo heok nasadea la'o ela titilok ndia, boe ma ana lilii heni tutik ndia heo-hilun. 25 Tehuu ei boso hahae palisak neulalau Manetualain Dede'a-kokolan mana daik, fo bisa nakambo'ik hataholi neme sala-singgon nala mai. Dei fo Manetualain fee baba'e-babatik nai basa dede'ak fo ei taok, sadi ei mamanene ma tao tungga Dede'a-kokolak sila. Boso kada maso tungga ndi'i doo kiik, boe ma kalua tungga ndi'i doo konak!

26 Mete ma hambu hataholi taok aon malalaok, tehuu ta nanea nalelak ndia bafan, na, hataholi ndia kedi seluk ndia ao hehelin! Ndia anggaman sosoan taa. 27 Te anggama malalaok ndia, ta hambu manggenggeok faa boe. Ndia ndia tao namahoko Amak Manetualain dalen. Anggama fo ndoos leo ndiak, tao hataholi nahiik tulun ina falu la ma ana maak kala. Hataholi fo naena anggama mata leo ndiak, ta ela hataholi nai dae-bafok ia le'a-nole sala no dede'a manggalauk.