Au sulak susulak ia

3 Au oke Amak Manetualain ma ita Lamatuan Yesus Karistus fo latudu Sila dale malolen neu ei, fo suek ei bisa masoda mia sodak, mole ma ndoo-ndoo.

4 Filmon! Neu faik fo au hule-haladoi fee o, na au oke makasi neu Manetualain huu o sodam. 5 Huu au amanene no'uk la'e-neu o namahehelem neu Lamatuak Yesus, ma o susuem neu hataholi kamahelek kala so. 6 O bisa masoda dalek esa mua hataholi kamahele fe'ek kala, huu o namahehelem ndia. Au hule-haladoi, fo mete ma ei matudu ei dale malolem esa no esa, na, ei bisa malelak neulalau basa dede'a malole, fo ita bisa taon soa-neu Lamatuak Yesus. 7 Ka'a! Huu o susuem ndia, de o tao mala au daleng namahoko, ma tao matetea au daleng. Ma o susuem ndia boe oo tao natea hataholi kamahelek kala no'uk dalen.

8-9 Ka'a! Au paluung leo iak: au dadik uu Karistus nadedenun. No leo ndiak, na au aena haak fo palenda o tao dede'ak ia. Tehuu au ta nau ambue kada palenda, de kada oke tulu-falik, sama leo hataholi lasik so, fo noke tulu-falik. Au dadik hataholi bui, huu au tungga Yesus Karistus. Huu ndia de au ambalani oke o tulu-falik, huu au bubuluk o susuem neu hataholi no'uk. 10 Au oke fo o matudu o susuem neu au anang, Onesimus. Ndia ndia, sama leo au ana heheling, huu ana dadi namahele neu Yesus neme au ueng mai, neu faik fo au nai bui ia dalek.^c

11 Au bubuluk Onesimus ndia, na o atam fo nalai neu fuik. Au boe oo bubuluk, makahulun ndia sosoan ta faa boe neu o. Tehuu hatematak ia, au amahele ndia kasosoak makadotok neu ita dua nggata.^d 12 Au sue ndia alan seli, tehuu elan neme naa, au haitua falik kana neu o.

13 Teteben, au nau elan fo ana bisa nggati o, fo ana ono-lau au nai ia. Huu au ta akambo'ik tao hata esa boe nai ia. Au dadik hataholi bui, huu au afada hataholi la'e-neu Lamatuak Yesus Tutui Malolen. 14 Tehuu au ta nau fo kada o makaheik, huu o mameda hataholi nakaseti o. Au hihiing, o tao dede'a malole ndia tungga o hihii hehelim. De mete ma o bei ta simbok no malole, na, au ta nau tao hata esa boe la'e-neu Onesimus ia, huu o haak ndia.

15 Fama o bisa dudu'a leo iak: Lamatuak hanuk Onesimus mopon neme o mai no faik keke'uk, fo ela ana fali main fo leo no o. 16 Neu faik fo ana nalai, na kada ana dadik neu o atam. Tehuu hatematak ia ana fali, de ndia boe dadik neu o fadi susuem. Au boe oo sue ndia alan seli! De hatematak ia, ndia sosoan boe tamba neu o. Ndia ta kada dadik o atam, tehuu ndia boe oo dadik neu o fadim fo sama-sama mamahele miu Karistus.

17 De leo iak ka'a. Mete ma o tao au ia, o nonoo mana tao uem esa, na, au oke fo o simbok mala ndia, sama leo au mana maik. 18 Tehuu leo Onesimus tao nasala o do, ana bei nahuta o, na elan fo au ndia tanggon. 19 Kada mete! Susula hutak, fo au sulak unik au lima heheling: Au, Paulus, dei fo bae nggati Onesimus hutan neu Filmon. Dai ndia so, do? Fama au ta paluu asaneda o hutam neu au fo no'un lena. Hutam ndia, au tulu-fali o, bei fo dadik Lamatuak hataholin.

20 Tetebes, ka'a! Elan fo ka'a tulun mala au nai dede'ak ia, huu ita ka'a-fadik nai Lamatuak dalek. Tao mandoo au daleng leo ndiak, huu ita sama-sama dadik Karistus enan.

21 Ka'a! Au sulak susulak ia fee o, huu au amahele o nau mamanene neulalau au. Au ameda, neu ko o tao lena heni hata fo au okek.

22 Hambu dede'ak esa bali. Tulun sadia fee au kama esa dei. Huu au amahele Lamatuak namanene ei huhule-haladoim, de dei fo Ana soi dalak fo kalua heni au uma bui ia mai, suek au uu tilo ei nai ndia bali.

23 Epafras nai ia. Ndia boe oo dadik hataholi bui sama leo au, huu nafada hataholi la'e-neu Yesus Karistus. Ndia boe oo haitua soda-molek neu o.^e 24 Markus, Aristarkus, Demas, ma Lukas lai ia boe. Sila uen esak lo au. Sila boe oo haitua soda-molek.^f

25 Au oke ita Lamatuan Yesus Karistus, fo natudu dale malolen neu ei basa nggei.

Kada leo ndiak!