3 Dae-bafok ma lalai fo ita titan hatematak ia, ita tamahele tae, Manetualain tao basa ia la. Tehuu Ana ta doki pake liman fo sama leo ita tita hataholi la tao pake liman nala, te kada Ana kokolak pake Ndia Dede'a-kokolan, boe ma basa sala dadi.^a

4 Habel namahele neu Manetualain. Huu ndia de, ana neni fefee malolen lena heni ka'an Kaen. Manetualain simbok Habel ma fefeen no malole, huu dalen ndoos. De mae ana mate dook so, tehuu ita bei bisa tanoli neme ndia mai, huu ndia namahehelen.^b

5 Henok namahele neu Manetualain boe. Huu ndia de Manetualain so'u laik kana neni nusa sodak neu, fo ela ana boso mate. Hataholi la lasanggak ndia boe, tehuu ta latonggon, huu Manetualain so'u laik kana so. Manetualain simbok ndia no malole, huu Manetualain nafada nae, “Henok ia, hataholi mana tao namahoko Au daleng.”^c

6 De leo iak tolanoo nggala ei! Manggaledok so, Manetualain ta simbok no malole hataholi fo ta namahele neu Ndia. Te hataholi fo nau neni Manetualain neu, na musi namahele nae, Manetualain memak kasodak. Ma ndia boe oo musi namahele nae, Manetualain nau tulu-fali hataholi fo mana mai sangga Ndia.

7 Noh boe oo namahele neu Manetualain. Huu ndia de, Noh namahele neu Manetualain neu faik fo Ana nafada memak nae, “Noh! Masaneda bou! Dei fo Au tao akalulutu heni dae-bafok ia unik faa tuak fo hataholi bei ta lita litak.” Mae Noh bei ta nita nitak mata leo ndiak boe oo, ana namanene neu Manetualain, ma ana tao ofak fo nasala'e nala ndia uma isin nala. Huu ndia namahehelen ndia, de Manetualain taok ndia hataholi dale ndoos. Tehuu basa hataholi fo ta mana lamahele, na Manetualain huku belak neu sala.^d

8 Ba'i Abraham boe oo namahele neu Manetualain. Huu ndia de, Manetualain noke nalan nae, “Abraham! Kalua la'o ela o nggolom fo muni mamanak esa muu, dei fo Au atudun neu o. Te dei fo dae ndia dadik pusaka soa-neu o tititi-nonosim mala.” Ana namanene leo ndiak, boe ma tao tungga Manetualain hihiin, mae ana ta bubuluk sangga bee neu.^e 9 Neu faik fo ana losa dae ndia, boe ma nambadedei ndia tendan, de ana leo sama leo hataholi deak nai dae ndia, fo Manetualain helu sangga fee ndia so. Basa de ndia anan Isak ma umbun Yakob leo lai ndia boe, te Manetualain helu so, fo fee dae ndia dadik sila pusakan.^f 10 Ana namahena, dei fo ana leo nai kota esa fo ana seli. Huu Manetualain mesak kana tao gambar fo nambadedei kota ndia.

11 Sara, fo ba'i Abraham saon, namahele neu Manetualain boe. Mae ndia bei ta bonggi nitak, ma namalasi nalan seli so, tehuu Manetualain tao fo ana bisa dadik bei neu hataholi nusa ina-huuk esa. Huu ana namahele nae, neu ko Manetualain tao tungga hata fo Ana heluk so.^g 12 Huu ndia de mae namalasi nalan seli so boe, ana bei bisa hambu numbu-saduk makadotok, losa ta hambu hataholi hingga nala sala. Te sila no'un sama leo nduuk malai lalai, ma salaek malai tasi bifi.^h

13 Ita ba'in nala, fo ba'i Abraham, ba'i Isak, ma ba'i Yakob boe oo lamahele lakandoo neu Manetualain losa ala mate. Tehuu ala bei ta simbo dae pusaka, fo Manetualain heluk ndia so. Mae leo ndiak boe, tehuu ala lamahena lakandoo no dale namahokok, huu ala lita dae ndia neme dook mai so. Te ala manaku so lae, sila kada hataholi nusa deak, fo leo tataak nai dae-bafok ia.ⁱ 14 Naa te manggaledok so, hataholi fo mana kokolak matak leo ndiak, ala dokodoe so, fo hambu mamanak esa dadik neu sila dae hehelin. 15 Mete ma dae pusaka fo ita ba'in nala dokodoek ndia so, fo ndia ba'i Abraham dae fua funin, na, neu ko ala hambu fai lelak no'uk, fo ala fali leni ndia leu. 16 Tehuu dae pusaka fo ala dokodoek ndia so, na ndia dae pusaka fo ana seli nai nusa sodak. Huu ndia de Manetualain simbok kasa no malole, fo ala dadik Ndia hataholin. Te Ana sadia memak kota esa so, fo fee sala nai nusa sodak.

17-18 Ba'i Abraham boe oo namahele tebe-tebe neu Manetualain, neu faik fo Manetualain sangga uku-sudi ndia namahehelen. Huu ndia de ana tao tungga Manetualain palendan, fo fee anan Isak dadik tunu-hotuk.^j Naa te makahulun Manetualain helu so la'e-neu kakanak ndia nae, “Neme o anam Isak ia mai, dei fo o hambu numbu-saduk no'uk, losa ala dadik hataholi nusak fo ana seli”.^k 19 Tehuu ba'i Abraham dudu'a so nae, Manetualain naena koasa fo tao nasoda falik hataholi kamates. Memak tetebes ndia, te faik ndia sama leo ana hambu falik ndia anan fo mana dadik tunu-hotuk so.

20 Ba'i Isak boe oo namahele neu Manetualain. Huu ndia de, ana hule fo ela dei fo Manetualain fee baba'e-babatik neu ndia anan Yakob ma Esau.^l

21 Ba'i Yakob boe oo namahele neu Manetualain. Huu ndia de, neu faik fo ana sangga mate, nambadeik luku-luku to'u tete'e-aik, fo nakaluku-nakatele neu Manetualain. Basa de ana hule Manetualain fee baba'e-babatik neu ndia umbun, fo neme anan Yusuf mai.^m

22 Ba'i Yusuf boe oo namahele neu Manetualain. Neu faik fo ana sangga mate, ana namahele nae, Manetualain dei fo noo Ndia hataholi Israel asa kalua leme nusa Masir mai. Huu ndia de ana helu sala, fo ala musi leni falik ndia dui-loun, mete ma ala la'o ela dae Masir.ⁿ

23 Ba'i Musa ina-aman boe oo lamahele neu Manetualain. Neu faik fo inan bonggi nala ndia, boe ma lafunin losa bulak telu, huu ala lita aon nombe-nombe. Ma ala ta bii mane nusa Masir, mae ana palenda ndia hataholin nala nae, “Tao misa memak basa kakana tou anak, fo nana bonggik neme hataholi Ibrani mai”.^o

24 Neu faik fo ba'i Musa ina-huu mai so, ndia boe oo namahele neu Manetualain. Te makahulun mane Masir ana fe'on so'u nala ndia, fo dadik anan so. Mae leo ndiak boe oo, tehuu ana ta nau hataholi taok ndia leo mane Masir bobonggin.^p 25 Te ana dudu'a nae, malolenak ana nasoda to'a-taa no'u no Manetualain hataholin nala, neme kada ndia nasoda namahoko no dede'a manggalauk fo kada nakatataka ta dook. 26 Ana ela hataholi lakadadaek ndia, huu namahena neu Karistus, fo ndia Hataholi fo Manetualain heluk so, sangga nadenun mai. Ana nakatataka leo ndiak, huu ana bubuluk dei fo Manetualain bala fee ndia seseba malole lena heni basa hata-heto malai dae Masir.

27 Ba'i Musa boe oo namahele neu Manetualain, neu faik fo noke mane Masir nakambo'ik fo noo ita bei-ba'in nala la'ok kalua leme ndia daen mai. Mae manek manggalau nalan seli, tehuu ba'i Musa ta biin. Ba'i Musa namahele nakandoo neu Manetualain fo ta nana nitak, sama leo Musa nita aon Ndia so.^q

28 Ba'i Musa boe oo namahele neu Manetualain, neu faik fo ala lahehele so, fo sangga la'o kalua leme dae Masir mai. Te ana tao tungga Manetualain palendan, ma nadenu ita bei-ba'in nala tao Paska sososak, ma hala bi'i-lombo, de ala ha'i lala bi'i-lombo ndia daan fo ala tao tanda neu sila uman nala. Le'odaen ndia, Manetualain ata nusa sodan mai, fo tao nisa basa kakana ka'ak manai dae Masir. Tehuu ana ta maso neu tao nisa nai ita bei-ba'in uman nala, huu ana nita daak ndia nai sila uman lelesun.^r

29 Neu faik fo ita bei-ba'in nala kalua leme dae Masir mai, sila boe oo lamahele neu Manetualain. Huu sila namahehelen, de Manetualain tada ba'e oe manai Tasi Mbilas, fo ala lena no sodak leni dae madak leu. Tehuu soldadu Masir fo mana husi tungga sala, bolo mate ledo-eik fo ala soba lesik ndia.^s

30 Neu faik fo ita bei-ba'in nala maso nai dae Kana'an so, sila boe oo lamahele neu Manetualain. Huu ala tungga Ndia palendan, ma la'o e'o kota Yeriko tembo dean losa faik hitu. Boe ma tembok ndia tu'u henin tutik.^t

31 Hambu Rahab fo makahulun dadik ina kalabik nai kota ndia boe. Huu ana namahele neu Manetualain, de ana simbok no malole hataholi Israel mana mete-makun, ma nafuni sala nai ndia uman. Boe ma Manetualain tao nakalulutu basa hataholi Yeriko, huu ala ta nau lamanene Ndia. Tehuu Manetualain nasala'e nala Rahab, huu ndia namahehelen.^u

32 Au bei bisa kokolak naluk bali, la'e-neu hataholi fe'ek, fo mana lamahele neu Manetualain. Tehuu au faing taa, fo tui lutu-lutuk la'e-neu Gideon, Barak, Simson, Yefta, Dauk, Semuel, ma Manetualain mana kokola fe'en nala.^v 33 Sila basa sala lamahele neu Manetualain. Huu ndia de, hambu mana senggik laban manek kala. Hambu mana to'u palenda no dale ndoos, fo nasala'e hataholi fo ta kasalak, ma huku hataholi kasalak. Hambu mana simbo hata fo Manetualain heluk so. Ma hambu mana senggi meo-asu.^w 34 Hambu mana tao mate ha'i mana mbila ina-huuk. Hambu Manetualain nasala'e nala sala neme hataholi fo nau tao nisa sila nenik tafa. Hambu ta balakaik, tehuu Manetualain tao nala sala balakaik. Hambu Manetualain tao nala sala dadik ana seli fo latati, losa ala husi lakadedeak musu soldadun nala leme mamana fe'ek kala mai.^x 35 Hambu inak kala boe, fo simbo falik sila anan nala fo Manetualain tao nasoda falik kasa so.

Tehuu hambu nana doidosok, huu ala lamahele neu Manetualain. Ala lahiik mate, fo ela sila boso heok lasadea Manetualain. Te ala ta laketu natututin lo Ndia. De ala lamahena lae, dei fo Manetualain so'u sala fo hambu sodak malolen lena bali nai nusa sodak.^y 36 Hambu nana haumemeek, ma nana filok. Hambu fe'ek bali, ein nala nana kabik nai bui dale.^z 37 Hambu mana matek, huu nana mbiak nenik batu. Hambu mana matek, huu hataholi holo ba'e duak aon nala. Hambu mana matek, huu nana tatik nenik tafa. Hambu mana nasoda hata taak, ma kada pake balo'as neme banda louk mai, huu hataholi tao doidoso ma tao nakatoto'ak kasa, losa husi heni sala,^a 38 de ala lalai leu leo lai mamana nees, nai letek kala, nai luak kala, ma nai bolok kala malai dae dale. Hataholi lakadadaek kasa, ma husi heni sala leu leo lai mamana ta malole. Tehuu ta nandaa mete ma hataholi manai dae-bafok leo sama-sama lo sala, huu sila namahehelen nala ana seli.

39 Manetualain koa basa sala, huu ala lamahele neu Ndia. Tehuu losa sila mamaten boe, sila bei ta simbo hata fo Manetualain heluk so. 40 Ana nau tao tungga Ndia hehelun nenik dalak fo malolen lena. Huu Ana nau fo ita basa nggata bisa tasoda takandoo sama-sama to Ndia: fo ndia hatematak ia ita talelak Karistus so, ma sila fo mana mate lele uluk so.