Ita musi tasoda malole esa no esa
13
Tolanoo susue nggala ei! Hambu dede'ak luma fo au sangga fee nasanenedak neu ei.Boso mafalende masue ao makandoo, mia ei tolanoo kamahelem mala.
2 Boso mafalende malengga dalek, fo simbok hataholi fo ei ta malelak nai ei umam. Te hambu tolanook luma fo simbo litak hataholi leo ndiak, ta bubuluk te hataholi la sila, Manetualain ata nusa sodan.a
3 Boso mafalende tao matak neu hataholi manai bui, te sila nana humuk huu lamahele neu Karistus. Huu ndia de ei musi tulu-fali sala, sama leo ei mesa nggei fo nana humuk.
Ma boso mafalende tulu-fali hataholi mana hambu doidosok. Makaneni sala no malole, sama leo ei mesa nggei simbo doidosok ndia.
4 Sasaok ndia malalaok. Tehuu boso losak sasao malalaok ndia, dadik manggenggeok. Te neu ko Manetualain huku basa hataholi mana hohonggek kala lo hataholi fo ta sila saon.
5 Boso balena'o doik. Tehuu ei musi masoda no mana daik mia hata fo ei enam. Te Manetualain kokolak so nae,
“Au ta afalende heni ei.
Au ta la'o ela ei”.b
6 De tao matetea ei dalem, sama leo hataholi sulak nitak nae,
“Au Lamatuang nau tulu-fali au,
huu ndia de au ta bii.
De ta hambu hataholi esa boe,
fo bisa babalik au”.c
Boso fali tungga heti-heu anggama laak, tehuu mamahele makandoo neu Karistus
7 Boso mafalende heni ei malanggam mala, fo lanoli litak ei Manetualain Dede'a-kokolan. Dudu'a neulalau sila dala sodan, ma conto sila namahehelen. Te hata fo ala lamahelek ndia, na ndia:
8 Yesus Karistus ndia, ta nasafali nitak.
Neme sososan mai, losa hatematak ia, ma losa dodoon neu,
Ndia bei sama.
9 Huu ndia de ei boso matungga dea mia nanonoli kasalak. Manetualain tao natea ei dalem, huu Ndia natudu dale malolen neu ei so. Ta huu ei tungga heti-heuk la'e-neu nana'a-nininuk. Huu heti-heuk leo ndiak sosoan taa.
10 Makahulun ele, nai Manetualain Tenda Huhule-haladoin pasan, hambu mei tunu-hotuk esa soa-neu banda tunu-hotuk kala. Malangga anggama mana ono-lau nai ndia, naena haak na'a mbaa elak neme mei ndia mai. Tehuu hatematak ia, ita taena mei fe'ek.d Ma malangga anggama laak ta naena haak na'a nai ndia. 11 Makahulun, tungga teuk, na malangga anggama manai lain seli, neni banda tunu-hotuk daan, fo taon neu Manetualain Kama Malalaon Nalan Seli dalek. No leo ndiak, na Manetualain nafalende heni sila sala-singgon nala. Boe ma ala leni banda ndia, fo tunun nai nggolo deak.e 12 Leo ndiak boe no Yesus. Ndia dadik tunu-hotuk boe, fo Manetualain bisa koka heni basa hataholi sala-singgon. Ma neu faik fo Ana doidoso, ala hela loon, fo leu tao lisan nai kota Yerusalem deak. 13 Huu ndia de, mai fo ita teni Yesus teu, fo tamahele takandoo neu Ndia. Mae hataholi lakadadaek ita, tehuu ita musi tahehele simbok, sama leo Ndia boe. 14 Te ita kada leo tataak nai dae-bafok ia. Tehuu ita tamahena, fo leo nai kota beuk nai nusa sodak losa dodoon neu. 15 Huu Yesus dadik tunu-hotuk neu ita so, de ita ta paluu teni banda tunu-hotuk fo fee Ndia bali. Tehuu hambu fefee fe'ek fo ita musi teni takandoo fo fee Manetualain, na ndia fefee koa-kiok, fo so'u dema-demak Ndia naden. 16 Ma boso mafalende tao dede'a malole neu hataholi fe'ek. Mete ma ala paluu hata, na, tulu-fali sala. Te basa sila dadik sama leo fefeek fo tao namahoko Manetualain dalen boe.
17 Ei musi mamanene neu basa hataholi fo mana makaneni ei. Te sila lanea ei samanem leledo-le'odaen. Dei fo ala musi lataa sila uen nai Manetualain matan. De mamanene neulalau sala, fo ala bisa tao ues ma lafada no dale namahokok. Boso losak ala lafada lo dale makalulutuk, huu ei la'o ela Yesus Karistus dala sodan so. Te no leo ndiak, na ei ta hambu nanalak so bali.
Mana sulak susulak ia, noke sukuur ma hule-haladoik neu hataholi Ibrani la
18 Tulun hule-haladoi makandoo fee ai. Huu memak ai dalen ndoos, ma ai nau tao dede'a malole makandoo. 19 Lena-lenak bali, tulun hule-haladoi fo au bisa fali lai-lai uni ei uu.
20-21 Manetualain ndia tao ita dalen ndoo-ndoo. Au oke fo Ana tulu-fali ei, fo ei bisa tao tungga basa Ndia hihiin. Au boe oo hule fo Ana tulu-fali ita basa nggata, fo dadik hataholi mana tao namahoko Ndia dalen. Te Manetualain pake Yesus Karistus daan mana faak ndia so, suek mba'a hehelu beuk no ita. Heheluk ndia la'o nakandoo ta namaketuk. Boe ma Manetualain tao nasoda falik ita Lamatuan Yesus Karistus. Hatematak ia, Yesus nanea ma nakaboi ita, sama leo mana hoo fo ana seli. Huu ndia de ita so'u dema-demak Ndia naden, ma koa-kio Ndia takandondoo henin! Tetebes, ndia.
Soda-molek
22 Tolanoo susue nggala ei! Au oke fo ei simbok no malole au nanoli-nafadang ia no dale malenggak. Te susulak ia, kada keke'uk. 23 Hambu halak fo au nau ei basa nggei bubuluk. Fo ndia: ita tolanoon Timotius kalua neme bui dale mai so. Mete ma ana mai lai-lai neni au mai, na, dei fo ai dua nggai sama-sama mini ei miu.
24 Au haitua soda-molek neu ei malanggam mala, ma soda-molek neu ei basa nggei, fo mana mamahele neu Yesus Karistus. Tolanook kala maleme propensi Itali mai boe oo haitua sila soda-molen.
25 Au oke fo Manetualain natudu Ndia dale malolen neu ei basa nggei.
Kada leo ndiak!