Karistus mate kada la'i esak, fo hataholi bisa nasoda malole no Manetualain losa dodoon neu
10
Mete ma ita nau bubuluk tebe-tebe Manetualain hihiin, na, heti-heuk fo Ana feen neu ita bei-ba'in nala, bei ta manggaledok. Huu ndia kada salaok neme dede'a malole mai, fo Manetualain sangga fee ita. De mae hataholi tungga heti-heuk kala sila, ma leni banda tunu-hotuk taa-taa boe oo, ndia ta bisa tao nalalao tetebes sila sala-singgon nala. 2 Mete ma heti-heuk ndia, bisa tao namopo sila sala-singgon nala tetebes, na, ala ta leni banda tunu-hotuk bali, huu ala ta lameda salak so nai sila dalen nala bali. Naa te ta leo ndiak. 3 Te tungga teuk, ala lambue loke bali-bali, fo Manetualain koka heni sila sala-singgon nala, 4 huu ta bisa banda daan naena koasa, fo nggali heni hataholi sala-singgon nala tetebes.5-6 Huu ndia de Karistus kokolak leo iak neu faik fo Ana neni dae-bafok ia mai:
“Manetualain!
Manetualain ta namahoko no banda tunu-hotuk, ma fefee fe'ek fo ala lenik ndia.
Ala hala lisa banda makadotok,
fo dadik tunu-hotuk.
Basa de ala tunu banda makadotok,
fo loke ambon.
Mae leo ndiak boe oo, tehuu Manetualain dalen ta namahoko.
Huu ndia de Manetualain nadenu Au uni dae-bafok ia mai,
fo dadik hataholi sama leo sila.”
7 Boe ma Karistus kokolak boe nae,
“Manetualain! Au nai ia so!
Au mai fo tao tungga Manetualain hihiin,
sama leo Manetualain mana kokolan sulak memak la'e-neu Au so.”a
8 De Karistus kokolak sososan ndia, na ndia:
“Manetualain ta namahoko no banda tunu-hotuk, ma fefee fe'ek fo ala lenik ndia.
Ala hala lisa banda makadotok,
fo dadik tunu-hotuk.
Basa de ala tunu banda makadotok,
fo loke ambon.
Mae leo ndiak boe oo, tehuu Manetualain dalen ta namahoko.”
De mae ala tao tungga no matetuk ba'i Musa heti-heun nala so, tehuu Manetualain dalen ta namahoko. 9 Neu faik fo Karistus kokolak nae,
“Au mai, fo tao tungga Manetualain hihiin.”
Ndia ndandaan nae, Karistus mai, fo koka heni dala laak, boe ma nggatin no dala beuk. 10 Te Manetualain hihiin, na ndia, Yesus Karistus dadik tunu-hotuk fo maten la'i esak soa-neu ita hataholi. No leo ndiak, Ana tao ita dadik hataholi malalaok losa dodoon neu.
11 Tungga faik, malangga anggama mata laak kala lambue lakalala'ok sila uen, ma lambue hala lisa banda tunu-hotuk kala. Naa te tunu-hotuk kala sila, ta laena litak koasa, fo nggali heni hataholi sala-singgon no tetebes.b 12 Tehuu ita Malangga Anggama Ina-huun, fo ndia Karistus fee Ndia aon, fo maten dadik tunu-hotuk soa-neu ita. Ma Ana dadik tunu-hotuk kada la'i esak, ma Ana soi dalak so, fo bisa nggali heni basa ita hataholi sala-singgon nala. Basa ndia, bei fo Ana neu nanggatuuk neu Manetualain boboa konan, nai mamanak fo nana hadak nalan seli. 13 Nai ndia, Ana nahani losa Manetualain tao Ndia musun nala do'ok neu Ndia.c 14 Ndia tunu-hotun fo la'i esak ndia, tao naketu nakandondoo henin sala-singgok koasan, soa-neu hataholi fo Karistus tao nalalao sala.
15 Manetualain Dula-dale Malalaon nafada dede'ak fo bei sama leo ndiak neu ita boe. Huu Ana kokolak nitak nae,
16 “Ei Lamatuam nafada leo iak:
Au mba'a hehelu beuk ua Au hataholi nggala,
Au tao Au heti-heung nai sila dudu'an nala,
ma Au sulak Au palendang nai sila dalen nala.”d
17 Basa de Ana nafada nakadaik nae,
“Dei fo Au ta asaneda sila sala-singgon nala bali.
Ma Au afalende heni sila tatao-nono'in,
neu faik fo ala la'o lena Au heti-heu nggala”.e
18 Ndia ndandaan nae, mete ma Manetualain koka heni hataholi sala-singgon nala so, na, hataholi ta paluu leni tunu-hotuk so bali, fo tao makasufu Manetualain dalen.
Ita boso bii tasale Manetualain
19 De leo iak, tolanoo nggala ei! Yesus nafaa daan so, fo tao makasufu Manetualain dalen. Huu ndia de hatematak ia, boso bii bali tasale Ndia nai Ndia Mamana Malalaon Nalan Seli nai nusa sodak. 20 Masaneda Kama Malalaok Nalan Seli laak ndia! Nai ndia, hambu tema maloa fo babaa, fo hataholi ta bole maso nasale matak Manetualain. Tehuu no Yesus mamaten ndia, Ana soi dala beuk, fo hataholi bisa lakokola matan lo Manetualain. 21 Lena-lenak bali, Yesus boe oo dadik malangga anggama fo ana seli, fo ono-lau ma heti Manetualain uma isin nala. 22 Huu ndia dadik ita haak, de mai fo ita maso teu tasale ma kokolak matan to Manetualain. Tehuu ita musi tamahele tebe-tebe neu Ndia no dale ndoos. Te Yesus mamaten tao nalalao ita dalen so, losa ita ta dudu'a dede'a manggalauk so bali. Ma ita musi tasoda malalaok boe, sama leo malangga anggama mata laak kala, fo musi ladiu oe dei, bei fo maso ono-lau Manetualain.f 23 Mai fo ita to'u tea-tea basa hata fo ita manakun la'e-neu Manetualain boe. Ma ita boe oo musi tamahena teu Ndia, ma boso dudu'a, te neu ko Ana tao tungga Ndia hehelun. 24 Ma mai fo ita sangga dalak, fo kokoe ita tolanoo kamahelen nala, fo suek ita basa nggata tatudu susuek no'uk, ma tao dede'a malole mata-matak. 25 Te au amanene so, hambu luma ta nau lakabubua bali lo sila tolanoo hataholi kamahelen nala. Tehuu boso leo ndiak! Te ei musi makabubua, fo tao matea esa no esa dalen. Nakalenak bali, huu Lamatuak fai fafali main deka-deka so. Fee nasanenedak neu sala leo ndiak!
26 Tolanoo susue nggala ei! Ita bubuluk losa lutu-lutuk la'e-neu dede'ak Yesus Karistus dala teteben so. Tehuu mete ma ita heok tasadea Yesus, ma tasoda tao sala-singgok takandoo, na, ndandaan nae, ta hambu tunu-hotu fe'ek so bali fo bisa koka heni ita sala-singgon nala. 27 Ita kada tahani to bibiik, huu Manetualain mai huku ita. Te ha'i naraka fo mana mbila ana seli ndia, nahehele so, fo sangga tao nakalulutu heni basa hataholi mana laban Ndia.g 28 Makahulun, mete ma hambu hataholi esa timba heni ba'i Musa heti-heun, ma hambu hataholi dua do telu fo dadik sakasii leo ndiak, na hataholi mana tao salak ndia, musi huku maten, ma ta hambu ambon bali.h 29 Tehuu hatematak ia, mete ma hambu hataholi tao nakadadaek Manetualain Anan, na, ndia sama leo ana tao Yesus daan belin taa, fo Ana tao nafaan so, fo tao nalalao hataholi ndia. Ma ana ta mbali Manetualain hehelun, fo nana mba'ak no hataholi ndia nenik daak ndia. Ma ndia boe oo, tao Manetualain Dulan luli, fo natudu dale malolen neu hataholi ndia so. Dudu'a sudik! Te hataholi mata leo iak, neu ko lemba huhukuk fo belan seli bali, lena heni hataholi mana timba heni ba'i Musa heti-heun.i 30 Manetualain kokolak nitak nae,
“Au aena haak, fo bala hataholi manggalaun.
Ma neu ko Au tao tungga leo ndiak.”
Ma nana sulak bali nae,
“Manetualain ndia, mana naena haak palenda basan.
Neu ko Ana natuda huhukuk neu Ndia hataholin nala”.j
31 Masaneda te Manetualain nasoda nakandondoo henin! Neu ko hataholi bii, mete ma Manetualain humu nala sala so!
32 Ei musi masaneda, neu faik fo bei fo ei mulai bubuluk la'e-neu Karistus, boe ma ei dudu'am dadik manggaledok. Te faik ndia, mae ei hambu doidosok, ma toto'ak makadotok, tehuu ei makatataka ma mamahele makandoo neu Karistus. 33 Hambu hataholi nakadadaek, ma nakamamaek ei nai hataholi no'uk matan. Hambu hataholi tao leo ndiak neu ei nonoo hataholi kamahelem mala boe. 34 Ei mameda kasian, ma matudu dale malole neu hataholi fo nana nandeek neni bui dale neu. Mete ma hataholi namana'o neni ei buam, na, kada ei simbok no dale ndoo-ndook, huu ei bubuluk so mae, ei ia dei fo simbok dede'ak fo lolen lena, fo hataholi ta bisa lamana'o lenin. 35 Huu ndia de ei musi to'u tea-tea ei namahehelem. Te dei fo Manetualain bala fee ei makadotok. 36 De kada mahele! Te mete ma ei tao tungga Manetualain hihiin nakandoo so, na, dei fo ei simbo basa hata fo Ana helu feen neu ei so. 37 Manetualain mana kokolan nala sulak la'e-neu Hataholi fo sangga mai ndia so nae,
“Ta dook bali, te Hataholi fo sangga mai ndia, toda mai so.
Boso ma'a-male, te Ana sangga mai lai-lai.
38 Hataholi fo dale ndoos,
dei fo hambu nasalala'ek,
huu ana namahele Au.
Tehuu mete ma hambu mana heok neme Au mai,
na, Au daleng ta namahoko.”k
39 Tehuu ita ia, hataholi ta mana heok neme Manetualain mai. Te hataholi mata leo ndiak, dei fo naelak dook neme Ndia mai. Tehuu ita ia, hataholi kamahelek neu Manetualain. De ita hambu nasalala'ek takandoo to Ndia.