3 Hambu tema maloa esa nana londak, fo babaa kama fe'ek esa, fo ala seseik lae, Manetualain Kama Malalaon Nalan Seli.^b 4 Nai tema maloa ndia matan, hambu mei lilo mbilas esa, fo dede boo menik fo naboo meni neu Manetualain. Ma nai Kama Malalaok Nalan Seli ndia, hambu peti lilo mbilas esa, fo ala seseik lae, Peti Heheluk. Nai peti ndia dalek, ala tao bua lele ulu laak, fo fee nasanenedak la'e-neu Manetualain hehelun, fo Ana mba'an no sala. Nai ndia hambu tofles lilo mbilas esa, nana isik no loti manna. Loti ndia, loti fo makahulun ele Manetualain nakondan neme lalai mai, feen neu ita bei-ba'in nala, neu faik fo ala ndoe leme mamana nees. Nai peti ndia boe oo, hambu ba'i Harun tete'e ain tuuk, fo makahulun nadoo. Ma hambu batu bebelak fo Manetualain paken fo sulak Ndia heti-heun, fo fai maneuk Ndia feen neu ba'i Musa.^c 5 Nai peti ndia tatanan, hambu bua nana dokik dua fo landela-lasa'a. Bua nana dokik sila mata-aon sama leo Manetualain ata kalidan nala leme nusa sodak mai, fo lambadeik ma lidan nala lakambela loan seli, de tatana lala peti ndia, huu mamanak ndia natudu Manetualain namemeda kasian neu hataholi. Tehuu hatematak ia au faing taa, fo kokolak losa lutu-lutuk la'e-neu buas sala sila.^d

6 Sila dalan fo heti buas nai Manetualain Tenda Huhule-haladoin ndia, na memak leo ndiak. Boe ma malangga anggama la maso-kalua tungga faik leni kama mata ndia leu, fo lakalala'ok sila uen nai ndia.^e 7 Tehuu kada malangga anggama Yahudi la malangga ina-huun bole maso neni Manetualain Kama Malalaon Nalan Seli ndia neu. Ma ndia ta bole maso sudi faik bee, te kada ana bisa maso teuk esa la'i esa. Ma mete ma ana maso, na, ana musi neni banda tunu-hotuk daan, fo neu mbilun neu Peti Heheluk ndia tatanan. Daak ndia maksut, suek Manetualain koka heni malangga anggama no basa ndia hataholin nala sala-singgon, mae sala-singgok fo ala taon ta no namemedak boe.^f

8 Manetualain pake Ndia Dula-dale Malalaon so, fo tao ita talelak tae, mete ma tema maloa ndia bei babaa dala masok neni Kama Malalaok Nalan Seli ndia neu, na, ndandaan nae, hataholi bei ta bisa maso neni Manetualain matan neu, mete ma heti-heu laak bei nana pakek. 9 Te basa sila dadik conto, fo Manetualain Dulan paken fo nanoli ita fo kasodak hatematak ia. Makahulun ita bei-ba'in nala leni sila fefeen, ma banda tunu-hotun fee malangga anggama, fo Manetualain koka heni sila sala-singgon nala. Tehuu mae leni tunu-hotuk makadotok leo ndiak boe oo, tunu-hotuk kala sila, ta bisa tao lala sila dalen dadik malalaok, ma ta bisa tao namopo sila namemeda salan nai sila dalen. 10 De hata fo ala taok ndia, tungga kada anggama heti-heun. Hambu heti-heuk fo palenda nae, ala ta bisa la'a ia, ma ta bisa linu ndia. Hambu heti-heu fe'ek lae, ala musi safe sila aon, ma sila buan tungga heti-heuk hihiin. Naa te basa heti-heuk kala sila, kada heti hataholi dean, te ta bisa heti hataholi dalen. Mae leo ndiak boe oo, tehuu heti-heuk kala sila musi la'ok lakandoo, losa Manetualain nggati heti-heu beuk.

11 Tehuu hatematak ia, hambu Hataholi fo Manetualain helu memak kana neme makahulun mai so. Ndia ndia, Karistus. Ana mai so, fo dadik ita malangga anggama ina-huun, ma Ana tao dede'a malole fee ita so.^g Ana nakalala'ok Ndia uen, sama leo malangga anggama laak, tehuu Ana naue nai mamana huhule-haladoik fo malole nalan seli. Ndia mamana huhule-haladoin ndia, ta nai dae-bafok, huu hataholi ta tao mamanak ndia. 12 Karistus maso neni Kama Malalaok Nalan Seli ndia neu boe, fo nasale Manetualain sama leo malangga anggama ina-huuk mata laak kala, fo tao teuk esa la'i esa. Ma neu faik fo Ana maso, Ana neni daak fo fee Manetualain boe. Tehuu hambu mana kofe'ek. Te Karistus ta neni daak neme banda tunu-hotuk mai. Ana neni ndia, Ndia daa hehelin, huu Ana mate so, fo dadik tunu-hotuk fee ita. Tehuu Karistus neni Ndia daan kada la'i esak, fo tao ita takambo'ik teme ita sala-singgon mai, losa dodoon neu.

13 De Karistus daan ndia, memak koasan lena heni banda daan. Te tungga ba'i Musa heti-heun, na hataholi mana tao salak kala manggenggeok, ma ta landaa maso fo leu lakaluku-lakatele neu Manetualain. Musi leni malangga anggama leu, fo tao tunu-hotuk, suek tunu-hotuk ndia daan tao nalalao falik kasa. Hambu tunu-hotuk no'uk, fo loke bi'i-aek daan, ma sapi daan. Hambu heti-heuk esa boe nae, mete ma hataholi daba la'e hataholi kamates, na, ndia boe oo dadik manggenggeok nai Manetualain matan so. Mete ma hataholi ndia nau dadik malalaok fali, na, malangga anggama musi la'u nala afu elak neme sapi tenak nana hotuk mai. Boe ma ana neni afu ndia, fo mbolin neu hataholi manggenggeok ndia, suek ana dadik malalaok nasafali.^h

14 Naa! Mete ma banda daan bisa tao nalalao hataholi ao-inan dean fo manggenggeok, nakalenak bali no Karistus daan! Te Ndia daan ndia, tao nala ita takambo'ik teme ita sala-singgon nala mai so, ma tao nalalao ita dalen boe. Te ita sala-singgon tao nala ita taelak dook neme Manetualain mai. Neu faik fo Karistus maten, Manetualain Dulan fo mana nasoda nakandondoo henin tulu-fali Ndia, fo Ana fee aon neu Manetualain, sama leo banda tunu-hotuk, fo salan ta faa boe. De hatematak ia, ita bisa takaluku-takatele no teteben so, neu Manetualain fo mana nasoda nakandondoo henin.

15 Huu Karistus daan fo ana seli ndia, de Manetualain pake Ndia, fo tao hehelu beuk no basa hataholi, fo Manetualain noke sala so, fo dadik Ndia hataholin. Huu neu faik fo Karistus mate fo nasala'e nala hataholi, Ndia boe oo tifa nala ita bei-ba'in neme sala-singgok fo ala taon nai lele uluk ele, neu faik fo Manetualain mba'a hehelu laak no sala. Huu ndia de sila bisa lasoda lakandondoo henin lo Manetualain so.

16 Au pake conto, hataholi mana simbo pusaka, sama leo amak esa tao susula baba'ek fo dei fo fee pusaka neu ndia anan. Tehuu kakanak ndia, bei fo bole ha'i nala pusaka ndia, mete ma aman maten so. 17 Te mete ma aman bei kasodak, na, ndia anan bei ta bisa simbo pusaka, fo aman helun nai susula baba'ek ndia so. 18 Leo ndiak boe, no Manetualain hehelu sososan fo Ana mba'an no ita bei-ba'in nala. Sila bei fo bisa simbo lala hata fo Manetualain heluk ndia, mete ma hambu mana mate makahuluk. Huu ndia de sila tunu-hotun fo pake banda daan, fo dadik buti, hambu mana matek so. 19 Fai maneuk, ba'i Musa nakabubua nala ita bei-ba'in nala, fo nafada basa palenda fo manai heti-heuk ndia, fo Manetualain nakondan so. Basa boe ma ba'i Musa hala sapi ma bi'i-aek, fo ha'i nala daan nala, de seseok kana no oe. Ndia boe oo pake tali mbilas fo mba'a ai ndana doo lutuk, boe ma ana bolon neu daak ndia dalek, fo mbimbilun neu Manetualain Susulan fo Musa sulak nalak ndia lain, ma neu basa lau-inggu la. 20 Neu faik fo ba'i Musa mbimbilu daak ndia, boe ma ana kokolak nae, “Daak ia dadik tanda nae, Manetualain mba'a heheluk no ei. Mete ma ei tao tungga basa Ndia palendan, dei fo Ana fee basa hata fo Ana heluk so.”ⁱ 21 Ba'i Musa boe oo mbimbilu daak neu Tenda Huhule-haladoik, ma basa buas malai ndia, fo ala paken lakaluku-lakatele neu Manetualain.^j 22 Te tungga Manetualain heti-heun, hambu no'uk nalan seli musi tao nalalao sala lenik daak. Huu ndia de mete ma hataholi nau dadik malalaok leme sila sala-singgon mai, na, musi hambu tunu-hotuk daan.^k

23 Hata fo au tuik la'e-neu ita bei-ba'in, ma sila Tenda Huhule-haladoin ndia, na basa sila kada conto, fo suek ita bisa bubuluk Manetualain mamana huhule-haladoi teteben nai nusa sodak. Te mete ma malangga anggama mata laak nau maso neni Tenda ndia dalek neu, fo nakaluku-nakatele neu Manetualain, na, ala musi tao lalalao basa-basan dei, pake banda tunu-hotuk daan. Manetualain mamana huhule-haladoin nai nusa sodak boe oo, musi malalaok. Tehuu musi pake tunu-hotuk daan fo ana seli lena neme banda daan mai. 24 Kama Malalaok Nalan Seli, fo Karistus maso neu ndia, ta ndia kama manai Tenda Huhule-haladoik, fo hataholi taok. Te Tenda manai dae-bafok ndia, kada conto neme Tenda isi-isik mai. Tehuu Karistus maso neni nusa sodak neu, fo nasala'e ita nai Manetualain matan. 25 Makahulun malangga anggama manai lain seli, musi maso taa-taa tungga teuk neni Kama Malalaok Nalan Seli ndia neu, ma neni banda daan fee Manetualain. Tehuu Karistus ta leo ndiak. Ndia paluu kada maso la'i esak, ma neni Ndia daa hehelin. 26 Te mete ma Ana musi maso tungga teuk, sama leo malangga anggama mata laak ndia, na, ndandaan nae, Ana musi mate taa-taa mulai neme dae-bafok sososan mai, losa hatematak ia, fo suek Ana koka heni hataholi esa-esak sala-singgon. Tehuu Ana ta tao leo ndiak. Te nandaa no fain Ana mate dadik tunu-hotuk kada la'i esak, fo koka heni basa sala-singgok fo hataholi taok. 27 Manggaledok so, hataholi kada mate la'i esak. Tehuu basa de ana musi mai nasale nai Manetualain matan, fo Manetualain palisak ndia. 28 Leo ndiak boe oo, Karistus. Ana mate ma fee aon, fo dadik tunu-hotuk kada la'i esak. Ma Ndia boe oo, dei fo fali main. Tehuu Ana ta nakaneni hataholi sala-singgon bali, huu Ana tao nabasa ues ndia so. Tehuu dei fo Ana nau nakanenik ndia, na ndia Ana nau nasala'e nala basa hataholi, fo mana lamahena neu Ndia.^l