Manetualain pake Karistus fo mba'a hehelu beuk, fo malolen lena heni hehelu laak
8
De au kokolang fo penting leo iak: hatematak ia, ita taena malangga anggama ina-huuk fo koasan lena heni malangga anggama makahuluk kala. Ndia ndia, Yesus. Ana nanggatuuk to'u palenda nai Manetualain fo Naden Manai Lain Seli boboa konan, nai nusa sodak.a 2 Ma Ana nakalala'ok Ndia uen, nai mamana huhule-haladoik tetebes. Mamanak ndia, Manetualain mesak kana taon, ta hataholi taon.3 Malangga anggama ina-huuk nateme neni fefeek ma tunu-hotuk fee Manetualain. Huu ndia de Yesus boe oo musi neni tunu-hotuk. 4 Tehuu Yesus ta nakalala'ok Ndia uen nai dae-bafok. Huu nai dae-bafok hambu malangga anggama so, fo fee fefeek ma tunu-hotuk neu Manetualain, tungga ba'i Musa heti-heun. 5 Ala lakalala'ok sila uen nai Tenda Huhule-haladoik, fo matan sama leo mamana huhule-haladoi teteben nai nusa sodak. Te neu faik fo ba'i Musa nau tao Tenda ndia, Manetualain tao nasanenedak ndia nae, “Masaneda neulalau! O musi tao tebe-tebe tungga matak fo Au atudu neu o neme letek ndia lain so!”b 6 Tehuu Yesus uen ana seli lena heni malangga anggama mata laak kala. Te hatematak ia, Manetualain mba'a heheluk fo malolen lena so. Ndia boe oo, pake Yesus dadik lelete fo hataholi bisa mole-dame lo Manetualain.
7 Makahulun ele, Ana mba'a heheluk no ba'i Musa, neu faik fo Ana nakonda heti-heuk kala sila. Mae leo ndiak boe oo, tehuu hataholi ta bisa nasoda malalaok tetebes tungga heti-heuk ndia. Huu ndia de ala ta bisa malole lo Manetualain. De hatematak ia, paluu heheluk beuk fo malolen lena bali. 8 Makahulun Manetualain ta hii Ndia hataholin nala, huu ala la'o lena bali-bali Ndia heti-heu laan so. Neu faik fo ta nakatataka bali, boe ma Ana luli, de Ana nafada nae,
“Mamanene neulalau, Au ia, mana maena haak palenda basan!
Neu ko Au mba'a hehelu beuk
ua hataholi nusa Israel,
ma leo Yahuda.
9 Heheluk fo dei fo Au mba'a ua sila ndia,
ta sama leo heheluk fo makahulun Au mba'a
ua sila bei-ba'in nala so.
Te makahulun Au to'u sila liman
fo akalala'ok kasa kalua mima dae Masir mai.
Tehuu ala ta tao tungga
hata fo ala heluk lo Au so.
Huu ndia de Au ta nau mbali sala so bali.
10 Heheluk fo dei fo Au sangga mba'a ua hataholi nusa Israel ndia,
isin leo iak:
Dei fo Au tao Au heti-heung neu sila dudu'an.
Dei fo Au sulak Au palendang neu sila dalen.
Boe ma Au dadik sila Lamatuan,
ma sila dadik Au hataholing.
11 De ei basa nggei malelak neulalau Au,
mulai neme kadi'i anak nalan seli mai, losa ina-huu nalan seli.
De ei ta paluu manoli ei nonoom mala,
ma ei tolanoom mala bali mae,
‘Ei musi malelak Lamatuak!’
12 Huu Au sangga atudu Au namemeda kasian neu sala,
huu ndia de Au afalende heni basa sala-singgon nala.”c
13 Neu faik fo Manetualain kokolak nae, Ana nau mba'a hehelu beuk no sala, na ndandaan nae, hehelu laak ndia, ta nana pakek so bali. Ta dook bali, te mopo henin so.