Melkisedek ndia, malangga anggama esa fo ina-huuk lena malangga anggama Lewi no ndia tititi-nonosin nala
7
1-3 Makahulun ele, Melkisaedek dadik manek kota Salem. Ndia boe oo dadik malangga anggama neu hataholi fo mana makaluku-makatele neu Manetualain fo Naden Manai Lain seli. Ndia naden ndandaan, “Manek Dale Ndoos”. Ma Mane Salem ndandaan, “Mane Mole-dame”. Ta hambu esa boe bubuluk Melkisedek ia dadadin. Ta hambu esa boe bubuluk ndia ina-aman, ma bei-ba'in nala. Ta hambu esa boe bubuluk ndia fai bobonggin ma ndia mamaten. Kada hataholi bubuluk ndia manek kota Salem, ma malangga anggama neu Manetualain. Tehuu ndia boe oo sama leo Manetualain Anan, huu ndia boe malangga anggama, fo nakalala'ok nakandondoo henin ndia uen.La'i esa, hambu manek hida mai lo sila soldadun nala, de lamoa lala buas leme ba'i Abraham nonoon nala mai. Basa boe ma ba'i Abraham neu natati sama-sama no ndia nonoon nala, losa ala senggi manek kala sila. Boe ma ba'i Abraham asa ha'i lala falik basa buas sala sila. Neu faik fo ba'i Abraham fali so, boe ma Melkisedek kalua neme kota Salem mai, fo neu soluk ndia. Boe ma ana kokolak fee baba'e-babatik neu ba'i Abraham nae, “Ela Manetualain fo Naden Manai Lain Seli, fee baba'e-babatik neu o.” Basa boe ma ba'i Abraham ba'e fee Melkisedek baba'ek esa neme baba'ek sanahulu mai, neme basa buas fo ana namoa falik kasa so. Ana fee leo ndiak, huu Melkisedek ndia malangga anggama neme Manetualain fo Naden Manai Lain Seli mai.a
4 Naa, dudu'a neulalau la'e-neu Melkisedek ia! Ba'i Abraham ba'e fee ndia baba'ek esa neme baba'ek sanahulu mai, neme basa buas neulauk nalan seli mai, fo ana namoa falik so. De manggaledok so, Melkisedek ndia, hataholi ina-huuk. 5 Naa te faik ndia, Manetualain bei ta so'uk hataholi, fo dadik malangga anggama. Losa hambu ba'i Abraham solon Lewi, bei fo Manetualain so'u nala ndia, ma tititi-nonosin nala, fo dadik malangga anggama neu basa ba'i Abraham tititi-nonosin. Basa boe ma Manetualain boe oo nakonda heti-heuk nae, hataholi neme leo Lewi mai, naena haak simbo baba'ek esa neme buna-boak baba'ek sanahulu mai, neme sila tolanoo leo fe'en nala nai Israel.b 6 Tehuu Melkisedek ndia, ta Lewi tititi-nonosin. Mae leo ndiak boe oo, tehuu ba'i Abraham ba'e fee ndia baba'ek esa neme baba'ek sanahulu mai, huu ana taok Melkisedek ndia, hataholi fo ana seli. Faik ndia, ba'i Abraham simbo heheluk neme Manetualain mai so, fo fee baba'e-babatik neu ndia. Mae leo ndiak, tehuu Melkisedek boe oo kokolak nae, “Ela Manetualain fo Naden Manai Lain Seli, fee baba'e-babatik neu o”. 7 Ia boe oo dadik buti nae, Melkisedek ndia hataholi ina-huuk. Huu hataholi fo mana kokolak fee baba'e-babatik, neu ko ina-huuk lena neme hataholi mana simbo baba'e-babatik mai.
8 Malangga anggama basa sala laena haak, fo simbok lala baba'ek esa, neme baba'ek sanahulu mai. Tehuu sila kada hataholi basa faik, de doo-doo boe ma ala mate. Malangga anggama Melkisedek boe oo simbo baba'ek esa neme baba'ek sanahulu mai. Tehuu ana nasoda nakandoo, huu Manetualain Susula Malalaon ta nafada nae, ndia mate. 9-10 Huu ba'i Abraham ba'e fee Melkisedek baba'ek esa neme baba'ek sanahulu mai, neme bua sala sila mai, na hataholi bisa dudu'a sudik lae, ndia boe oo tanggon ndia tititi-nonosin, fo bei ta nana bonggik kala. No leo ndiak, na ita bisa taok ndia bae memak solon Lewi baba'en esa neme babaek sanahulu mai so.c
Ita paluu malangga anggama mata beuk, huu malangga anggama mata laak ta nabe'i koka heni hataholi salan no teteben
11 Neu faik fo Lewi tititi-nonosin nala dadik malangga anggama, Manetualain hele nala ba'i Musa ka'an Harun, fo dadik neu malangga anggama ina-huu makasososak. Malangga anggama la uen, na ndia latudu dalak fo hataholi bisa nasoda malalaok, ma malole no Manetualain. Mae ala tao tungga basa heti-heuk kala boe oo, tehuu malangga anggama matak leo Harun, ta nabe'i tao sala malalao ndoos. Huu ndia de ala paluu malangga anggama fe'ek, fo matan sama leo Melkisedek. 12 Tehuu mete ma malangga anggama mata beuk, nggati malangga anggama mata laak, na, musi nggati heti-heu laak boe.
13 Naa, manggaledok so, malangga anggama mata beuk ndia, na ndia Yesus. Te Ndia nana bonggik neme leo fe'ek mai, ta neme leo Lewi mai. Tungga ba'i Musa heti-heun, na malangga anggama matak leo Harun, kada neme leo Lewi mai, ta bole neme leo fe'ek mai. 14 Tehuu basa hataholi bubuluk lae, ita Lamatuan Yesus Karistus bonggin neme leo Yahuda mai. Tungga ba'i Musa heti-heun, na ta hambu malangga anggama neme leo ndia mai.
15 Tehuu Manetualain ta pake heti-heu laak ndia bali, huu hatematak ia, Yesus nai ia so, fo dadik malangga anggama mata beuk, matak leo Melkisedek. 16 Te tungga ba'i Musa heti-heun, na malangga anggama mata laak kala musi leme leo Lewi mai. Tehuu Yesus ta neme leo ndia mai. Mae leo ndiak boe oo, tehuu Manetualain so'u nala Ndia, fo dadik malangga anggama mata beuk, huu Ana naena koasa fo nasoda nakandondoo henin, ma ta hambu mana bisa tao nakalulutu Ndia. 17 Te Manetualain Susulan sulak nae,
“O dadik malangga anggama matak esa mua Melkisedek, nai lele uluk ele ndia,
tehuu O dadik malangga anggama losa dodoon neu.”d
18 Ndia ndandaan nae, heti-heu laak ta naena koasa, fo tulu-fali hataholi la. Huu ndia de Manetualain ta pake heti-heu laak ndia so, fo makahulun Ana feen neu ba'i Musa so. 19 Te mae hataholi nasoda ma tao tungga heti-heu laak kala sila, tehuu ala bei laena sala-singgok. Huu ndia de hatematak ia, Manetualain soi dalak fo malolen lena so, fo suek ita bisa tasoda mole-dame to Ndia.
Yesus ndia, Malangga Anggama fo ina-huuk lena heni malangga anggama mata laak kala
20-21 Makahulun, neu faik fo Manetualain so'u nala Lewi tititi-nonosin nala, fo dadik malangga anggama, na Ana ta helu ma ta so'u sosook hata-hata no sala. Tehuu neu faik fo Manetualain so'u nala Yesus dadik malangga anggama, Ana helu nae,
“Au ia, Lamatuak fo mana naena haak palenda basan!
Au soo, Au ta tao asafali hata fo Au heluk ndia so.
Au so'u ala O dadik malangga anggama,
fo O makalala'ok O uem nakandondoo henin.”e
22 Ma Ana helu leo ndiak, na Manetualain pake Yesus, fo tanggon fee ita nae, Ana nau mba'a heheluk, fo neulaun lena bali no ita.
23 Makahulun, malangga anggama mata laak musi nggati nakandoo, huu ala mate. Huu ndia de musi hambu malangga anggama no'uk. 24 Tehuu Yesus ndia, malangga anggama mata beuk esa, fo nasoda nakandondoo henin, ma Ndia boe oo, nakalala'ok uen nakandondoo henin. Huu ndia de ta paluu hataholi fo nggati Ndia. 25 Huu ndia de Yesus bisa nasala'e nala basa hataholi, fo nau leni Manetualain leu lesik Ndia. Ana bisa tao leo ndiak, losa dodoon neu. Ma Ana dadik neu sila hataholi nalelelan fo mana masale Manetualain nakandoo, suek tulu-fali sala.
26 Yesus ndia, malangga anggama fo manai lain seli, fo nandaa no ita. Huu Ndia ndia, Hataholi malalaok fo salan ta faa boe. Ndia ta sama leo hataholi basa faik, fo nalelak kada tao salak. Te Manetualain so'u dema-demak Ndia so, lena heni basa manai dae-bafok, ma manai nusa sodak. 27 Huu ndia de Yesus malolen lena neme basa malangga anggama mata laak mai. Makahulun, ala musi tao banda tunu-hotuk tungga faik, fo Manetualain koka heni sila sala-singgo hehelin nala. Basa ndia, bei fo ala tao tunu-hotuk fee hataholi la. Tehuu Yesus ta paluu tao leo ndiak bali-bali, huu Ana fee ao-inan kada la'i esak so, fo dadik tunu-hotuk. Ndia dai so, fo Manetualain koka heni basa hataholi sala-singgon nala.f
28 Tungga ba'i Musa heti-heun, na ala so'u lala hataholi basa faik, fo dadik malangga anggama. Tehuu ala bei laena sala-singgok. Huu ndia de Manetualain tao hehelu beuk nae, Ana nau so'u Anan, fo dadik malangga anggama ina-huuk. Te Ndia Anan ia, tungga nakandondoo henin Ndia hihiin.