6
De ei musi manoli nanonolik lutu-lutuk, huu ei manoli nanonolik huu-okan nala dook so la'e-neu Karitus. Huu ndia de hatematak ia, ta paluu manoli bali-bali nanonolik huu-okan, la'e-neu hataholi musi la'o ela sala-singgon nala; nanonolik la'e-neu hataholi namahele Manetualain; 2 nanonolik la'e-neu salanik; nanonolik la'e-neu so'uk limak fo fee baba'e-babatik neu hataholi, fo ana simbok Dula-dale Malalaok koasan; nanonolik la'e-neu Manetualain dei fo tao nasoda falik hataholi mana matek; ma nanonolik la'e-neu hataholi dei fo nasale Manetualain, fo simbok Ndia nakeketun nae, see bole nasoda nakandoo no Ndia, ma see taa. 3 Tehuu mete ma Manetualain mbo'i, na, mai ita tamba ita nanonolin leo. Te au nau fee nanonolik la'e-neu dede'ak lutu-lutuk ma deman seli.4-6 Naa te hambu hataholi bubuluk Karistus nanonolin, ma lameda Manetualain dale malolen so, losa Ana haitua Ndia Dula-dale Malalaon neu sala. Ala bubuluk Manetualain Dede'a-kokolan, ma lameda Ndia koasan so, fo dei fo Ana paken mete ma dae-bafok basan so. Mae leo ndiak boe oo, tehuu ala nggali heni sila namahehelen so, ma ala heok lasadea la'o ela Karistus so. Huu ndia de ta bisa hambu dalak, fo ala bisa fali loke ambon, boe ma lasoda malole lo Manetualain bali. Te mete ma hataholi ta nau hondak leo ndiak, na, ndia sama leo sila mesak kasa mbaku lisa seluk Manetualain Anan nai ai ngganggek, basa boe ma ala haumemeen nai hataholi no'uk kala matan.
7 Hataholi mata leo ndiak, sama leo dae fo ana kalua buna-boak ta malole. Naa te, mete ma uda mai so, na, dae neulauk bisa kalua buna-boak fo kasosoak neu hataholi mana tao ue daek. Boe ma Manetualain nakonda baba'e-babatik, fo tao dae ndia buna-boan boe namano'u. 8 Tehuu hataholi mana heok nasadea Karistus, sama leo dae fo kada kalua dila-nggauk. Ma dila-nggauk sila sosoan ta faa boe. Ta dook boe ma Manetualain mai, de natuda huhukuk neu dae ndia. Basa boe ma Ana hotu heni buna-boak ndia, fo sosoan ta faa boe.a
9 Tolanoo susue nggala ei! Mae au kokolak belak faa leo ndiak, tehuu au boe oo bubuluk ae, ei ta heok masadea Karistus. Te ei mamahele neu Ndia so, ma ei sodam hambu buna-boa malole boe. 10 De masanenedak te Manetualain dalen ndoos, ma Ana ta nafalende heni ei mbuse titin. Te ei tao ues tingga-tingga so, fo tulu-fali Ndia hataholin ma sue sala. Neme makahulun mai, memak ei makalala'ok Ndia uen so. Ma ei bei tao leo ndiak. 11 Tehuu hatematak ia, au nau fo ei basa nggei tao ues tingga-tingga lena bali, fo tao tungga makandoo leo ndiak losa basan. No leo ndiak, na dei fo ei simbo basa dede'a malole, fo ei mamahenan neme Manetualain mai. 12 Sadi ei boso dadik mbela-tua! Ei musi tao tungga hataholi la fo lamahele dook so neu Manetualain. Huu ala lamahena lakandondoo henin neu Ndia, losa ala simbok lala hata fo Ana heluk ndia so.
13-16 Conto leo ita ba'in Abraham. Makahulun ele Manetualain mba'a heheluk no ndia nenik sosook. Mete ma hataholi so'uk sosook, na, ndia nateme pake Manetualain naden, fo Manetualain dadik sakasii, huu Manetualain lena heni ndia. Ma mete ma hambu dede'ak, na, basa hataholi bubuluk lae, hataholi ndia kokolan tetebes, huu ana soo pake Manetualain naden so. Ndia memak hataholi dala tataon. Tehuu neu faik fo Manetualain tao sosook no ba'i Abraham, Ana pake nade hehelin, huu ta hambu esa boe lena heni Ndia. Ana helu nae,
“Dei fo Au fee baba'e-babatik makadotok,
neu o ma o tititi-nonosim.
Dei fo ala boe lamano'u,
losa ta hambu hataholi bisa hingga nala sala”.b
Manetualain helu nate'e leo ndiak, boe ma ba'i Abraham namahele ma namahena nakandoo neu Manetualain, mae dook bei fo ana simbo nala hata fo Manetualain heluk ndia so. 17 No leo ndiak, na ita bubuluk so, mete ma Manetualain tao heheluk no Ndia hataholin, na, Ana mba'a heheluk ndia nenik sosook, fo tanggon nae, hata fo Ana heluk, memak tetebes ma ta tao nasafalin. 18 Te hambu dede'ak dua ta bisa tao nasafalin. Kaesan, ndia Manetualain hehelun. Ma kaduan, ndia Ndia sosoon fo Ana paken fo tanggon heheluk ndia. De mete ma Manetualain helu dede'ak esa, na, neu ko Ana tao tunggan so, huu Ana ta bisa kokolak lou-latak. De ita boso bii Ndia hehelun. Ita talai teu sangga sodak nai Ndia so, de hatematak ia, kada ita tahani fo tamahena takandoo kada neu Ndia. 19 No leo ndiak, na ita dalen ndoo-ndoo so, sama leo ofak esa kalua neme lii mai, de see nai namo seseek so. Te ita tamahena neu Yesus Karistus, fo mana dadik neu ita malangga anggaman manai lain seli so. Makahulun, nandaa no hataholi Yahudi la fai malolen, malangga anggama manai lain seli maso nesik tema maloa fo mana babaa nala Kama Malalaok Nalan seli, fo nasale Manetualain nai ndia.c 20 Tehuu hatematak ia, Yesus maso nakahuluk so, fo soi dalak fee ita. Te Ndia boe oo malangga anggama manai lain seli fo matak esa leo Melkisedek nai makahulun ele. Tehuu Yesus ana seli lena heni malangga anggama mata laak, huu Ndia ta hahae nitak nakalala'ok Ndia uen.d