5
Hataholi fo ala so'un dadik malangga anggama ina-huuk so, ndia uen musi tulu-fali hataholi fo nakaneni sila natututin lo Manetualain. Ana musi simbo sila fefeen, ma banda tunu-hotun nala fo fee Manetualain. Ndia boe oo musi fee banda tunu-hotuk, fo Manetualain koka heni hataholi sala-singgon nala. 2 Mete ma hambu hataholi fo ta nalelak dala sodak tetebes, do hataholi mana heok neme dalak ndia mai so, na, malangga anggama ndia, ta tao nakatoto'ak kasa. Ndia dalen malole no sala, huu ndia boe oo hataholi fo lofo anak tuda sama leo sila. 3 Huu ndia boe oo hataholi, fo tuda sama leo sila, de malangga anggama ndia boe oo, musi fee banda tunu-hotuk fo Manetualain koka heni ndia sala-singgo hehelin.a 4 Hataholi ta bole so'uk aon fo dadik malangga anggama ina-huuk. Te kada Manetualain naena haak, fo hele hataholi leo ndiak, sama leo makahulun ele, neu faik fo Ana so'u nala Musa ka'an Harun.b5 Leo ndiak boe no Karistus. Ana ta so'u aon fo dadik malangga anggama ina-huuk. Te makahulun, Manetualain mesak kana so'u nalan nae,
“O ia, Au Anang,
faik ia, Au so'u ala O, fo to'u palenda.”c
6 Nai baba'e fe'ek nai Manetualain Susula Malalaon, Ndia kokolak boe nae,
“O dadik malangga anggama fo matak esa mua Melkisedek makahulun ele ndia,
tehuu O dadik malangga anggama losa dodoon neu.”d
7 Neu faik fo Yesus sodan sangga basan nai dae-bafok ia so, Ana hule-haladoi ta no hahaek, ma namatani, noke tulu-falik neme Manetualain mai, fo natetea Ndia. Te Ana bubuluk nae, Manetualain koasan bisa nasala'e nala Ndia. Boe ma Manetualain namanene Yesus, huu Ndia tungga tebe-tebe Manetualain hihiin.e 8 Te Yesus ndia, Manetualain Anan. De Ana musi nanoli tungga Manetualain hihiin, leo mae Ana hambu doidosok. 9 De memak Ana tao tungga tebe-tebe basa Manetualain hihiin. Huu ndia de hatematak ia, Ana dadik Ai Sodak Huun, neu basa hataholi fo mana lamahele neu Ndia so, suek ala bisa lasoda lakandondoo henin lo Manetualain. 10 Manetualain so'u nala Yesus so, dadik malangga anggama, fo matak esa no malangga anggama Melkisedek lele uluk.
Ei namahehelem neu Karistus, boso nggali henin
11 Bei hambu dede'ak no'uk, fo au sangga kokolak la'e-neu Karistus ma Melkisedek, tehuu au akato'a tao anggaleledo dede'ak kala sila, huu ei bei sama leo kakana nggoak, fo bei ta bisa nalelak no teteben. 12 Naa te ei ia mamahele dook ia so. Tungga teteben, na ei musi dadik mesen so, fo bisa manoli hataholi fe'ek. Tehuu titak tae, ei ia bei sama leo kakana mbimbila anak fo bei ta bisa na'a, bei fo kada bisa ninu inan susu oen. Ei bei paluu hataholi fo nanoli ei dede'ak huu-okan neme Manetualain Susula Malalaon mai. 13 Au bisa akasasamak ei mia kakana mbimbila anak leo ndiak, huu ei bei ta malelak no teteben nanonolik huu-okan la'e-neu Karistus, fo ei bisa masoda ndoos.f 14 Tehuu mete ma kakana mbimbila anak ina-huu mai so, na, ta ninu inan susu oen bali, tehuu na'a nana'a matea. Ndia sama leo hataholi fo nanoli losa nalelak no teteben Manetualain nanonolin so, fo suek ana bubuluk bee ndia malole, ma bee ndia manggalauk kala.