Mete ma ita tamahele neu Yesus Karistus, na, ita bisa tasoda mole-dame to Manetualain, sama leo ita hahae ita sosotan to Ndia
4
Tehuu hatematak ia, ita musi dudu'a naluk, huu Manetualain bei helu nae, Ndia hataholin nala bisa hahae sosotak sama-sama lo Ndia. De boso losak hambu neme ei mai, timba heni hata fo Manetualain heluk so. 2 Ita tamanene hala malole ndia so, sama leo ita bei-ba'in nala boe oo lamanene. Tehuu ala ta lamahele halak ndia, de tala hambu nanalak faa boe. 3 Tehuu mete ma ita tamahele, na, ita bisa hahae sosotak sama-sama to Manetualain. Te makahulun, Ana helu leo ndiak neu ita bei-ba'in nala so, tehuu basa de Ana luli, ma nafada sala nae,“Au ta akatataka ita ei manggalaum leo ndiak so bali.
Huu ndia de Au sumba-soo ei ae,
‘Ei ta bole maso so bali,
fo hahae sosotam sama-sama mia Au.”’
Naa te ita bubuluk tae, neu faik fo Manetualain nakadadadik lalai ma dae-bafok, Ana heti memak so, fo Ndia hataholin nala bisa hahae sosotak, fo lasoda sama-sama lo Ndia.a 4 Nai tutuik la'e-neu Manetualain nakadadadik lalai ma dae-bafok, nana sulak la'e-neu Manetualain hahae sosotak nae,
“Manetualain tao nala basa-basan,
boe ma neu fo'a mai, nandaa no fai kahitun,
Ana hahae aon.”b
5 Ma nai baba'e fe'ek bali, Manetualain kokolak neu ita bei-ba'in nala nae,
“Ei ta bole maso so bali,
fo hahae sosotam sama-sama mia Au.”c
6 De Manetualain nau fo Ndia hataholin nala, hahae sosotak fo lasoda sama-sama lo Ndia. Tehuu ita bei-ba'in fo lamanene lakahuluk hala malole ndia, ala ta bisa maso, huu ala ta tao tungga Manetualain hihiin. 7 Tehuu doo-doo, boe ma Manetualain hele fai fe'ek, fo Ndia hataholin bisa maso hahae sosotak sama-sama lo Ndia. Ana pake ba'i Dauk fo kokolak nae,
“Faik ia, mete ma ei mamanene Manetualain kokolan,
na, boso tao ei dalem latea leo batu,
tehuu mamanene neulalau leo.”d
8 Neu faik fo ba'i Dauk kokolak nae, “faik ia”, ana ta natudu faik ndia fo Yosua noo bei-ba'in, umbu-anan nala maso leni dae Kana'an leu. Neu faik fo ba'i Dauk kokolak leo ndiak, basa sala mate dook so.e 9 Huu ndia de ita bubuluk tae, Manetualain heti memak fai fe'ek so, fo Ndia hataholin nala bisa hahae sosotak, fo lasoda sama-sama lo Ndia. 10 Ma hataholi mana maso hahae sosotak sama-sama lo Manetualain, ana hahae neme ndia uen mai so, sama leo Manetualain boe oo hahae neme Ndia uen mai, nandaa fai kahitun, neu faik fo Ndia nakadadadik basa dae-bafok ia so.f 11 De mbalak eik fo ei bisa maso hahae sosotam, fo masoda sama-sama mia Manetualain. Boso losak hambu ta mana maso, huu ana ta nau namanene Manetualain Dede'a-kokolan, sama leo ita bei-ba'in sila.
12 Manetualain Dede'a-kokolan nala latudu dala soda tetebes. Dede'a-kokolak sila kasodak ma laena koasa fo maso neni ita dalen neu, ma natudu no manggaledok ita dudu'an ma ita hihiin neu ita mesa nggata. Dede'a-kokolak sila boe oo, tanden lena heni fela matande fo ana maso neni ao-mbaak neu, ana tete uak, ma fa'a ba'e duik fo tao basan nana bukak. 13 Basa hata fo manai lalai ma dae-bafok, ta hambu esa boe, nana nafunik neu Manetualain, te Ana bisa nita basa-basan no manggaledok. Dei fo ita musi teu tasale Ndia, fo tafada basa hata fo ita taon so.
Yesus dadik neu Malangga Anggama Ina-huuk so, fo koasan lena heni malangga anggama mata laak kala
14 Ita musi to'u tea-tea ita namahehelen, huu Manetualain Anan Yesus, dadik ita malangga anggama ina-huun so. Te Ana nai Manetualain matan, nai nusa sodak so, fo nasala'e nala ita. 15 Ana bisa nasala'e neulalau ita, huu Ana bubuluk nae, ita ia hataholi. Mete ma hambu mana fufudi fo tao salak, na, lofo anak ita tuda. Yesus hambu fufudik sama leo ita boe, tehuu Ana ta tuda nitak. 16 No Yesus sesenggin ndia, de mai fo ita tambalani deka-deka to Manetualain nai Ndia kadela mana palendan. Te Ndia ndia madale malole. De mete ma ita hule-haladoi neu Ndia, na, neu ko Ana nau natudu namemeda kasian, fo tulu-fali ita nandaa no fain.