Manetualain Anan koasan lena heni ba'i Musa
3
De leo iak tolanoo nggala ei! Manetualain hele nala ei so, ma kee-dede ei dadik hataholi dale ndoos, fo dei fo ei masoda sama-sama mia Ndia nai nusa sodak. Huu basa dede'ak sila, de ai musi dudu'a lutu-lutuk la'e-neu Yesus. Te ita manaku so tae, Ndia ndia, Manetualain Nadedenun, ma Ndia boe oo ita Malangga Anggama Ina-huun. 2 Neu faik fo Manetualain nadenu Yesus, Yesus tao tungga basa Manetualain hihiin. No leo ndiak, Ana dadik sama leo ba'i Musa. Huu ba'i Musa boe oo tao tungga Manetualain hihiin, neu faik fo ana ono-lau ita bei-ba'i lele ulun nala.a 3 Mae leo ndiak boe oo, tehuu Yesus koasan lena heni ba'i Musa. Te Yesus ndia, sama leo malangga uma-loo. Ma manggaledok so, malangga uma-loo koasan lena heni ata manai uma ndia. 4 Hataholi esa-esak nambadedei ndia uma-loo hehelin. Tehuu Manetualain nambadedei basa-basan. 5 De ba'i Musa tao tungga Manetualain hihiin, neu faik fo ana dadik ata soa-neu Manetualain uma isin nala. Te faik ndia, ana nafada memak hata fo dei fo Manetualain sangga taon. 6 Yesus boe oo tao tungga Manetualain hihiin, tehuu Ndia ta ata sama leo ba'i Musa. Huu Ndia ndia, Karistus, fo Manetualain Anan, fo Ana hele memak kana neme makahulun mai so, fo sangga nadenun neni dae-bafok ia mai. Ma Karistus nakaneni nalelak tebe-tebe Ndia Aman uma isin. De mete ma ita to'u tea-tea ita namahehelen, ma ita tamahena takandoo neu Karistus, na ita boe oo bisa maso dadik Ndia uma isin.Boso masadea ela ei namahehelem sama leo bei-ba'i la, huu ala ta bisa maso hahae sosotak nai dae, fo Manetualain heluk ndia so
7 Huu ndia de ei musi pasa ndi'i dook fo mamanene neulalau, hata fo Manetualain Dula-dale Malalaon kokolak so nae,
“Faik ia, mete ma ei mamanene Manetualain kokolan,
8 na, ei boso langga batu,
sama leo hataholi la sila,
fo ala la'ok leu-mai losa teuk haa hulu nai mamana nees.
Te ala ta nau mbali Musa bali,
losa Manetualain mesak kana uak,
ta bisa nggale loak no sala so.
9-10 Dudu'a sudik kana dei!
Teuk haa hulu Au tao tanda heran mata-matak
nai sila mata de'en!
Tehuu ala lambue soba Au nakandondoo henin.
Huu ndia de Au boe luli sala ae,
‘Ei ia, ana seli!
Te ei heok masadea ela Au dalang so,
fo tungga ei dalam, fo kada mana peko-pakik ndia!’
11 Au ta akatataka ita ei manggalaum leo ndiak so bali.
Huu ndia de, Au sumba-soo ei ae,
‘Ei ta bole maso so bali, fo hahae sosotak sama-sama mia Au.”’b
12 De tolanoo nggala ei! Mata neuk fo boso losak hambu neme ei mai, mana tao manggalauk, losa ana ta namahele bali, boe ma ana heok nasadea ela Manetualain mana masoda nakandoo. 13 Malolenak, tungga faik ei tao matea esa no esa dalen. Boso mahahanik bali! Huu ei lofo anak nana kedi nalak fo tao salak, losa ei dadik langga batu boe, ma ta mbali Manetualain. 14 Ita bisa dadik tia-laik fo eik esa to Yesus Karistus so, sadi ita tamahena takandoo neu Ndia, sama leo neu faik fo ita bei fo mulai tamahele neu Ndia.
15 Manetualain Dula-dale Malalaon kokolak leo ndiak boe nae,
“Faik ia, mete ma ei mamanene Manetualain kokolan,
na, ei boso langga batu, sama leo hataholi la sila,
fo ala la'ok leu-mai losa teuk haa hulu lai mamana nees,
huu ala laban Musa.”c
16 Naa, hatematak ia au sangga atane leo iak: hataholi la fo mana lamanene neu Musa so, boe ma ala heok lasadea ela ndia, sila see? See bali, mete ma ta sila ita bei-ba'in fo Musa mesak kana bei fo ana noo sala kalua leme dae Masir mai. 17 De hataholi fo mana tao nala Manetualain dalen natobi losa teuk haa hulu ndia, sila see? See bali, mete ma ta ita bei-ba'in. Te ala lasoda peko-pakik lai mamana nees, losa ala mate, boe ma latoi sala lai ndia. 18 Boe ma hataholi la fo nana sumba-sook neme Manetualain mai, losa ta bole maso nai dae ndia, fo hahae sosotak sama-sama lo Ndia ndia, na see? See bali, mete ma ta ndia ita bei-ba'in. Huu ala ta nau lamanene neu Manetualain.d 19 De manggaledok so, hetu! Ita bei-ba'in ta bisa maso nai dae ndia, fo hahae sosotak sama-sama lo Manetualain, huu ala ta lamahele leu Ndia.