Boso timba heni Lamatuak halan fo mana nasala'e nala hataholi neme sala-singgon mai
2
Huu ndia de ita musi to'u tea-tea hata fo ita tamanenen so la'e-neu Manetualain Anan, fo boso ita tafalende henin. 2 Makahulun Manetualain pake ata nusa sodan, fo nafada Ndia hehelun neu ita bei-ba'in nala. Ndia teteben, ita bisa tamahele basa heheluk ndia, huu ndia tetebes nakandoo. Mete ma ala la'o lena Ndia palendan, na, neu ko ala hambu huhukuk no mandaan. 3 Memak makahulun leo ndiak. Tehuu hatematak ia Manetualain Anan soi dala beuk so, fo nasala'e nala hataholi. Ana nafada hala malole ia neu Ndia hataholin fo mana ono-lau Ndia nai dae-bafok. Basa boe ma ala lafada ita, suek ita tamahele. Tehuu mete ma ita ta mbalin, na, ita soe tetebes ia so! 4 Manetualain boe fee koasa, fo ala tao tanda heran mata-matak. Ndia boe nakonda Ndia Dulan neu sala, ma fee sila koasa fo ala ono-lau tungga Ndia hihiin. Huu basa sila, de ita bubuluk tae, hala malole fo la'e-neu Manetualain nakambo'ik hataholi neme sala-singgon mai, memak tetebes.Hatina de Manetualain Anan tao nakadadaek aon fo dadik hataholi?
5 Au kokolak la'e-neu dae-bafok mata beuk fo sangga mai. Tehuu Manetualain ta nafada nitak Ndia ata nusa sodan nala nae, sila ndia lakaneni dae-bafok ndia. Te neu ko hambu Hataholi fo dei fo nakanenin. 6 Nai Manetualain Susula Malalaon, ba'i Dauk natane nitak la'e-neu hataholi belin nae,
“Manetualain!
Hatina de Manetualain tao matak neu hataholi?
Hatina de Manetualain sue sala?
Huu sila kada hataholi basa faik!
7 Tehuu Manetualain fee koasa neu sala so,
fo ala dadik hihii sama leo ata malai nusa sodak.
Manetualain boe fee hada-holomata neu sala,
ma so'u sala,
8 fo ala palenda basa hata fo Manetualain nakadadadik so.”a
De tungga ba'i Dauk susulan ndia, na Manetualain tao hataholi dadik malanggan, fo ala lakaneni basa hata fo Ana nakadadadik so. Naa te, ita bei ta bubuluk see ndia palenda basa-basan leo ndiak.
9 Tehuu hatematak ia ita bubuluk so tae, hambu Esa fo bisa palenda basa-basan. Ndia ndia, fo ndia Yesus. Ana mai leo tataak nai dae-bafok, fo dadik neu hataholi, fo lemba doidosok losa maten. Ana mate leo ndiak, fo natudu Manetualain dale malolen neu hataholi. Basa boe ma Manetualain koa-kio Ndia ma so'u dema-demak Ndia, fo Ana palenda basa hata fo Manetualain nakadadadik so. 10 Manetualain nakadadadik basa-basan, ma basa masodak kala huu Ndia. Huu ndia de, nandaa Manetualain soi dalak fo nakambo'ik ita teme ita sala-singgon mai tungga Yesus Ana lemba doidosok. Manetualain tao leo ndiak huu Ana nau hataholi no'uk lasoda sama-sama lo Ndia.
11 Neu ko Manetualain simbok hataholi no malole fo Yesus taon dadik malalaok, fo ala dadik leu Manetualain anan nala. Manetualain boe oo Yesus Aman. No leo ndiak, Yesus no sila, Amak esa. Huu ndia de Yesus ta mae so fo noke sala nae,
“Ei ia, Au tolanoo heheling.”
12 Yesus nafada Ndia Aman so nae,
“Au nau afada Au tolanoo nggala,
la'e-neu Ama malolen!
Au sangga koa-kio nai sila laladan nala,
la'e-neu Ama koasa ina-huun!”b
13 Yesus boe kokolak tuti nae,
“Au sangga amahele akandoo neu Manetualain.”
Basa boe ma Yesus kokolak bali nae,
“Mita dei! Au nai ia,
sama-sama ua Manetualain anan nala,
fo Ana fee sala neu Au so, fo Au akaneni sala.”c
14 Huu Lamatuak anan nala, hataholi basa faik, de Yesus boe oo musi dadik hataholi sama leo sila. Te Ana musi dadik hataholi dei, bei fo Ana bisa mate. Nesik Ndia mamaten ndia, bei fo Ana bisa neu namoa nala koasa neme nitu la malanggan mai. Te malangga manggalauk ndia, mana to'u koasa fo nakaneni dede'ak kala fo nana mba'ak no mamates. 15 Ma ndia boe tao hataholi bii la'e-neu mamates, losa ala tungga ndia hihiin, sama leo ata. Tehuu hatematak ia, Yesus bisa nakambo'ik hataholi leme sila bibiin mai so. 16 Te manggaledok so, Yesus ta mai, fo tulu-fali Manetualain atan nala nai nusa sodak. Tehuu Ana mai fo tulu-fali ita, fo ndia ba'i Abraham numbu-sadun. 17 Huu ndia de Yesus dadik sama leo ita, fo mana dadik Ndia tolanoon so. No leo ndiak, na Ana bisa dadik ita malangga anggaman manai lain seli, fo tulu-fali ita tungga Manetualain hihiin. Ndia boe natudu namemeda kasian neu ita. Ma Ana kokolak hata, na Ana tao tunggan. Makahulun ita bei-ba'in nala, loke malangga anggama la malangga ina-huun tao tunu-hotuk, fo Lamatuak koka heni sila sala-singgon nala. Hatematak ia Yesus mesak kana dadik tunu-hotuk so, fo Manetualain koka heni ita sala-singgon nala. 18 Neu faik fo Yesus nasoda nai dae-bafok ia, Ana hambu doidosok makadotok. Hambu mana fufudi Ndia boe, fo tao salak. Mae leo ndia boe oo, tehuu Ndia ta tuda. Huu ndia de, mete ma hambu mana fufudi ita fo tao salak, na, Yesus bisa tulu-fali ita fo ita boso tuda.