Susulak fee hataholi
Ibrani
fo bei fo la'o ela sila bei-ba'in nala anggaman fo lamahele neu
Yesus Karistus
Manetualain nadenu Ndia Anan so, fo koasan lena heni neme Ndia mana kokola laan nala mai
1
Makahulun ele, Manetualain pake mana kokolan nala, fo kokolak lo ita bei-ba'in hataholi Ibrani.a Ana pake dalak mata-matak fo kokolak la'i no'uk no sala.b 2 Tehuu hatematak ia Ana nadenu Anan mai so, fo kokolak matan no ita.Neme sososan mai, Manetualain hele nala Anan so,
fo palenda sama-sama no Ndia.
Neu faik fo Ana nakadadadik lalai no dae-bafok, no basa isin nala,
Ndia Anan ia nakadadadik sama-sama no Ndia boe.
3 Manetualain Anan ia, natudu Ndia Aman mandela-masa'an,
sama leo ledo sa'an nasafali neme titilok mai.
Huu Ndia mata-aok esa leo Ndia Aman.
Ma Ndia pake Dede'a-kokolan fo koasan ana seli,
fo nakalala'ok basa manai lalai ma dae-bafok.
Ndia boe oo soi dalak,
fo koka heni hataholi sala-singgon nala,
fo suek ala dadik malalaok.
Basa de Ana fali neni nusa sodak neu,
fo nanggatuuk neu Manetualain boboa konan,
nai mamana nana hadak nalan seli.
Manetualain Anan fo koasan manai lain seli, lena heni ata nusa sodak
4 Manetualain atan manai nusa sodak memak ana seli. Tehuu Ndia Anan, ana seli lena heni sila basa sala. Manetualain panggan ndia, deman seli. Ana fee Ndia pangga hehelin neu Anan so. Huu ndia de Ndia Anan, lena heni Ndia atan nala malai nusa sodak.
5 Manetualain kokolak nitak neu Anan nae,
“Faik ia, Au so'u ala O to'u palenda.”c
Manetualain boe oo kokolak nae,
“Au ia, Ndia Aman.
Ma Ndia ia, Au Anang.”d
Manetualain kokolak memak leo ndiak, la'e-neu Ndia Anan, tehuu Ana ta kokolak nitak leo ndiak, la'e-neu Ndia atan malai nusa sodak.
6 Neu faik fo Manetualain nadenu Anan fo koasan manai lain seli mai, na Ndia boe oo palenda ata manai nusa sodak nae,
“Wei! Ata la ei!
Ei musi miu fee hada-holomata,
ma makaluku-makatele neu Au Anang dei!”e
7 Manetualain boe oo, kokolak la'e-neu Ndia atan manai nusa sodak nae,
“Au tao Au ata nggala malai nusa sodak,
sama leo ani makaluluuk.
Au tao Au ata nggala,
sama leo ha'i.”f
Manetualain kokolak leo ndiak, huu sila ndia kada Ndia atan.
8 Tehuu Ana kokolak fe'ek bali, la'e-neu Ndia Ana hehelin nae,
“O ia, Manetualain.
Dei fo O manggatuuk nai kadela mana palenda losa dodoon.
Dei fo O to'u koasa fo palenda mua dale ndoos.
9 O dalem namahoko mita hataholi fo sodan ndoos.
Tehuu O dalem hedis mita hataholi fo sodan mana peko-pakik.
Huu ndia de O dalem namahoko,
de Au di'a mina neu O langgam,
fo so'u O dadi Manek lena heni fe'ek kala.”g
10 Manetualain boe oo kokolak neu Anan nae,
“Ana, ei!
O ia Lamatuak, fo palenda muma makahulun mai.
O ia, madenu lalai dadi memak.
O ia, palenda fo dae-bafok dadi memak.
11-12 Dei fo lalai ma dae-bafok lakalulutuk heni sala.
Dei fo lalai ma dae-bafok mopo heni sala.
Tehuu O mesa nggo masoda makandondoo henin.
Dei fo O mbia heni lalai ma dae-bafok,
sama leo hataholi mbia heni balo'a sidak.
Dei fo O tao nggati lalai ma dae-bafok,
sama leo hataholi nggati balo'a beuk.
Tehuu O mesa nggo ta leo ndiak.
Huu O masoda losa dodoon neu.”h
13 Manetualain boe oo kokolak no Anan nae,
“Ana, ei!
Manggatuuk mai ia, nai mamana nana hadak nalan seli,
nai Au boboa konang ia.
Dei fo Au tao O musum mala,
losak ala loke do'o neu O.”i
Manetualain kokolak memak leo ndiak la'e-neu Anan, tehuu Ana ta kokolak nitak leo ndiak, la'e-neu Ndia atan malai nusa sodak. 14 Ndia atan nala memak penting. Te Ana nadenu sala, leu lakaneni basa Ndia hataholin, fo dei fo Ana nasala'e nala sala leme sila sala-singgon mai. Mae leo ndiak, tehuu Manetualain Anan, bei lena heni basa sala.