3 Leo ndiak boe, no ina lasik kala. Mafada sala fo lanea neulalau sila nanggatutuu-nambadedein, ma lasoda tungga taa-taa kada Manetualain hihiin. Boso kokolak maboboo hataholi naden. Boso mba'a aok no ala-lalu. Tehuu ala musi lanoli hataholi la fo lasoda no malole. 4 No leo ndiak, ala lanoli ma fee natutudu dala malole neu basa ina muli-soluk kala sila, fo sue saon ma anan nala. 5 Ala musi lanoli sala fo lasoda lo dudu'a naluk ma malalaok; faduli uma-loon nala no malole; fee hada-holomata neu sao toun nala; ma fee sila sao toun nala lalangga uma-loon nala. Mete ma ala lasoda leo ndiak, na, neu ko ta hambu hataholi esa boe bisa kokolak lakatutudak Manetualain Dede'a-kokolan.

6 Leo ndiak boe, fee nanoli-nafadak neu ta'e anak kala, fo suek lasoda lo dudu'a naluk.

7 Titus! O musi masoda no malole, fo dadik neu natutuduk soa-neu hataholi fe'ek kala. O tao sudi hata, na o musi tao no ndoos, sama leo o manoli hataholi boe. Boso makamiminak mua o uem mala. 8 Mete ma o manoli hataholi, na, o musi pake netes matea, fo suek hataholi ta hambu dalak fo bisa sapa o. No dalak ndia, hataholi la fo mana laban ita, ala mae aon nala, huu tala hambu to'ok fo habo ita.

9 Manoli ata la fo lamanene neu sila malanggan sudi nai matak bee, ma tao lamahoko malanggan nala dalen. Ala boso lasisimbo bafak lo malanggan nala. 10 Ala ta bole lamana'o lala sila malanggan buan. Sila musi lasoda lo ndoos, losa dadik leu sila malanggan hataholi namahehelen nala. Sila ndia musi dadi hataholi neulauk ma dale katemak. Mete ma hataholi deak kala timba-tai ata la sodan nala leo ndiak lo basa hata fo ita fee nanonolik kala, na, neu ko ala manaku lae, nanonolik kala sila, ana seli. Te ita fee nanonolik la'e-neu Manetualain, fo mana nasala'e nala ita so.

11 Manetualain natudu dale malolen neu basa hataholi la so, ma soi dala nasalala'ek fee hataholi leme sala-singgon nala mai. 12 Huu ndia de ita musi timba heni sodak ta malole, ma basa ao-mbaak nasuu manggalaun nala. Ita leo nai dae-bafok lelek ia, ma musi takatataka talelak tala ao nggata, fo tasoda no malalaok, ma ita dalen nala musi katemak neu kada Manetualain. 13 Hatematak ia ita tamahehenak tae, Yesus Karistus fali main no mandela-masa'an! Ndia dadik neu baba'e-babatik soa-neu ita basa nggata. Ndia ndia, ita Manetualain fo naena koasa ina-huuk, fo nasala'e nala ita so. 14 Ana fee aon dadik tunu-hotuk fo nakambo'ik ita teme basa ita sala-singgon nala mai. Ana tao ita dadik Ndia hataholin nala, fo tasoda to dale malalaok, ma tahiik kada tao malole.^a

15 Titus, manoli basa ia la neu salanik kala. Fufu'a dalen nala, fo ala tungga nanonolik kala sila. See ndia tao salak, na matudu dala malole neu sala. Hataholi la ta bole lakadadaek o, huu o maena haak fo tao dede'ak kala sila.