Hataholi Salanik kala soda ndoon nala
3
Fee nasanenedak neu salanik kala fo lamanene mana palenda la, ma hataholi mana to'u koasa la. Ala musi tungga basa heti-heuk kala boe. Ala musi lahehele fo tao tatao malole taa-taa. 2 Boso ala popode maan nala fo tao laboboo hataholi naden malolen. Boso hii lasisimbo bafak, te malolenak lasoda neulalau no dale malole neu basa hataholi la.3 Makahulun, neu faik fo ita bei ta talelak Lamatuak Yesus, ita boe oo bei ta bubuluk hata-hata, boe ma lofo anak nana kedi nalak. Ita ta nau tamanene hataholi fe'ek. Ita tasoda tungga kada ita dale manggalaun, losa ita mba'a ita aon no ao-mbaa nasuun mata-matak kala. Ita dale manggalauk to hataholi fe'ek. Ita sodan henuk no dale hedik. Ita tahiik kada tambeda dalek, de hataholi la lambeda dalek lasafali lo ita boe.
4 Mae ita sodan nakalulutuk leo ndiak boe oo, tehuu Manetualain nasala'e nala ita, natudu Ndia susuen, ma Ndia dale malolen neu ita so. 5 Ana nasala'e nala ita, ta huu ita tatao malolen, tehuu Ndia susuen neu ita. Ana safe nalalao ita sala-singgon nala nenik Dula-dale Malalaon, fo nabebeu ita sodan, sama leo bonggi seluk ita. 6 Huu Yesus Karistus maten so, fo nasala'e nala ita teme sala-singgok mai, de Manetualain nadenu Dula-dale Malalaon neu ita, ta no nakaleleek hata esa boe. 7 Huu Yesus dale malolen, de Ana tao neulalau ita natututin to Amak Manetualain, sama leo Ndia anan. De ita bubuluk tae, dei fo ita tasoda takandondoo henin to Ndia. Ndia, dadik neu ita pusakan! 8 Hata fo au kokolak ia, memak tetebes leo ndiak.
Hata fo au anoli neu ei ia, kasosoak neu basa hataholi la. Huu ndia de o musi tumbunee hataholi la fo tungga tebe-tebe nanonolik kala sila. Basa hataholi kamahelek kala neu Manetualain, musi sangga dalak taa-taa fo tao malole. 9 Boso muu seseok mua dede'a sosoa taak, fo leo: nasisimbo bafak la'e-neu dede'a huu-oka taak, miu matuik madabak mia hataholi la, fo male'a la'e-neu ei leom mala tititi-nonosin deman lena, ma mahuu la'e-neu hataholi Yahudi la hadan heti-heun nala. Soa-neu hata? Basa sila sosoan ta faa boe. Ngganggali heni fai no sosoa taak! 10 Muu manoli-mafada hataholi mana tao lasida salanik kala. Mete ma ana bei tao leo ndiak bali, na, sapan no hala belak. Mete ma ana bei tao nakandoo, na, makadodook muan. 11 Hataholi mata leo ndiak, dudu'an ta ndoos so. Ndia tatao-nono'i hehelin, natudu ndia salan neu basa hataholi la.
Paulus nate'e susulan
12 Au sangga adenu Artemas do Tikikus, fo neti natonggo no o nai pulu Kreta. Mete ma ana losa so, na, o masusua mai lai-lai fo matonggo mua au nai kota Nikopolis. Te fai makasufun ia, au ahiik uu leo nai ndia.a 13 O malelak hataholi mana malela heti-heuk, manade Senas ndia, ma nonoon Apolos, hetu? Ala sangga la'o leni dae dook leu. De tulu-fali sala, fo boso ala to'a sudi hata nai dalak.b 14 Hataholi fo mana tungga Lamatuak Yesus, ala ta bole langgatuuk kada ifa limak. Ala musi lanoli fo tao dede'a malole, ma tulun hataholi fo mana tebe-tebe paluu tulu-falik. No leo ndiak, na sila sodan nala kasosoak.
15 Titus, ai basa nggai nai ia haitua soda-molek neu o, ma neu ita nonoon nala fo sama-sama tamahele neu Lamatuak Yesus.
Au hule-haladoi oke Manetualain natudu dale malolen neu ei basa nggei.
Kada leo ndiak,
Paulus