Susulak ia neme au mai, Paulus. Manetualain mesak kana hele nala au dadik neu Yesus Karistus nadedenun so. Ala ladenu au uu afada sodak tetebes ndia, fo Manetualain helu elan fee basa hataholi kamahelek kala neu Yesus Karistus so.

Timotius! O sama leo au ana bongging so. De au hule-haladoi fo ita Aman Manetualain, no ita Lamatuan Yesus Karistus, Ala sue o fo latudu dale malolen nala, ma fee o masoda mua sodak, mole ma ndoo-ndoo.^a

3 Leledo-le'odaen, au hule-haladoi fee o. Au oke makasi neu Manetualain, huu o tungga makandoo Ndia. Au ono-lau Ndia no dale malalaok, sama leo ita ba'in nala ono-lau Ndia. 4 Au asaneda ita taelak nai fai makahulun, de o luum tuda. Au ahiik alan seli atonggo seluk ua o, suek au daleng namahoko.

5 Au boe oo asaneda fai makahulun o mulai mamahele tebe-tebe neu Lamatuak Yesus. Namahehelek mata leo ndiak, naoka memak nai o beim Luisa ma o inam Eunike dalen nala so. Ma au boe oo amahele tebe-tebe ae, namahehelek mata leo ndiak, nasoda nai o dalem boe.^b

6 Makahulun, neu faik fo au tao au limang neu o langgam, ma hule-haladoi fee o, de faik ndia Manetualain tao nala o fo suek o mabe'i tao ues fee Ndia. De hatematak ia, au oke fo o makalala'ok seluk baba'e-babatik fo Manetualain feek ndia so. 7 Manetualain Dulan ta tao ita dadik hataholi mana biik. Tehuu Ana tao ita dadik neu hataholi kabe'ik, ma mamahele aok, mana masue malelak, ma mana heti aok no malole. 8 De boso mae kokolak la'e-neu ita Lamatuan fo naena haak palenda ita. Ma boso mae, huu au ia hataholi bui boe. Tungga ndoon, na au maso bui ia, huu au ono-lau Ndia. Mete ma o muu tui-bengga Hala Malole ndia, na, o musi mahehele lemba mala doidosok, sama leo ai boe. Mete ma o hambu toto'ak leo ndiak, na, dei fo Manetualain tao natetea o.

11 De Manetualain so'u nala au, dadik neu Yesus Karistus nadedenun, fo au uu tui-bengga Hala Malole ma au anoli hataholi sudi lai bee mesan.^c 12 Basa sila la tao au doidoso nai bui ia dalek. Tehuu au ta mae! Huu au bubuluk see fo au amahele, na ndia Lamatuak Yesus. Ma au boe oo bubuluk tebe-tebe ae, Ndia ndia fee ues ia nai au limang, Ndia ndia nabe'i nanea ues ia, ma Ndia ndia tao au abe'i akalala'ok ues ia losa Ana fali main. 13 De tungga natutudu sodak neme nanonoli tetebes fo au atudu basan neu o so. Mete ma o mamahele makandoo, ma sue basa hataholi la leo ndiak, na ndia natudu nae, o dadik esa mua Yesus Karistus so. 14 Manetualain fee hata mabeli esa neu o, fo ndia nanonoli tetebes. De makaboi matalolole hata ndia bou! Pake Manetualain Dula-dale Malalaon manai ita dalen nala, fo suek Ana tulu-fali o fo makaboi matalolole hata ndia.

15 O mamanene so lae, Figelus no Hermogenes, ma hataholi fe'ek kala leme propensi Asia^d mai, ala heok lasadea la'o ela au so. 16-18 Tehuu Onesiforus na fe'e bali. Ana ta heok neme au mai. O mesa nggo bubuluk makahulun neu faik fo au bei nai kota Efesus, ana tulu-fali au nakandondoo henin. Neu faik fo ana losa kota Roma, ana sangga nafeok au sudi nai bee. Mate'en boe ma ana hambu au nai bui dale. Tehuu tana mae. Ana mai tilo au taa-taa nai bui ia, fo natetea au daleng.

De au hule-haladoi oke Manetualain natudu dale malolen neu Onesiforus no basa bobonggin nala. Nandaa no dae-bafok fai babasan, fo Manetualain naketu hataholi la dede'an nala, na au amahena Ana naketu fo malole neu Onesiforus asa.