Susulak ia neme au mai, Paulus, fo Manetualain atan, ma Yesus Karistus nadedenun. Ana nadenu au fo tao atetea hataholi la fo Ndia hele nalak kala namahehelen nala so. Ana nadenu au atudu dala ndoos boe fo ala lasoda tungga Manetualain hihiin. No dalak ndia, Manetualain hataholin nala bisa lamahena lae, dei fo ala lasoda sama-sama lo Ndia lakandondoo henin. Manetualain bei ta nakadadadik dae-bafok ia, tehuu Ana helu memak so nae, dei fo Ndia hataholin nala lasoda lakandoo lo Ndia. Ma memak Ana ta nasapepeko. Nandaa no fain, Manetualain natudu no manggaledok nae, Ana nau nasala'e nala hataholi la leme sila sala-singgon nala mai, fo ala bisa lasoda lakandoo lo Ndia. Basa boe ma Ana palenda au fo la'ok uu tui-bengga Hala Malole neu basa hataholi la sudi lai bee mesan.

Titus! O sama leo au ana bongging so, huu o mua au tamahele no'u neu Karistus. De au hule-haladoi uu Manetualain ita Aman, ma Yesus Karistus fo lasala'e lala ita, suek latudu sila dale malolen leu o, fo o masoda mua sodak, mole ma ndoo-ndoo.^a

5 Fai makahulun, au la'o ela o muma pulu Kreta, fo ela o bisa makaneni dede'ak hida, fo bei paluu nai ndia. Ma ela o so'u mala hataholi la fo landaa dadik malangga salanik kala malai esa-esak kotan. Boso lilii heni heti-heuk ndia, fo au afada elan neu o la'e-neu hataholi mana dadik malangga salanik kala. Nae: 6 mete ma sangga so'u hataholi dadik malangga salanik, na, ndia sodan ta bole hambu salak faa boe. Ana musi nasoda dalen katemak no kada sao inak esa. Hataholi ndia anan nala musi lamahele neu Yesus Karistus boe. Boso losak hataholi la lae, anan nala lambue tao naodek, ma tao nahuuk. 7 Huu malangga salanik kala sila lakalala'ok Manetualain uen, de musi lasoda lo ndoos, ma laena nade malole. Boso so'u hataholi mana soso'uk aok, daa sa'ek, nasa ba'u, mana mafuk, mana mahuuk, ma balena'o doik. 8 Hataholi mana makalala'ok salanik kala musi lahiik simbok hataholi nai uman nala no dale malenggak. Ala musi hii kada dede'a malole, musi dudu'a naluk, musi tungga kada ndoon, musi dale malalaok, ma bisa heti lalelak aon nala. 9 Ala musi to'u tea-tea Manetualain Dede'a-kokolan, fo fai makahulun ita tanoli sala so. No leo ndiak, ala bisa latudu Manetualain dala ndoon neu hataholi fe'ek, ma bisa tao landoo nanonoli pepekok kala.^b

10 Hambu hataholi no'uk, lahiik laban nanonoli ndoos. Dede'a-kokolan nala huu-okan taa, ma ala lahiik kada pepekok. Lenak bali hataholi Yahudi fo lae basa hataholi mana nau hambu nasalala'ek kala, musi sunat. 11 Ala le'a leni bobonggin nala luma, dook leme Lamatuak nanonoli teteben mai, lenik sila nanonoli pepekon. Ala kada sangga doik, lenik dala naputak! Ka'i sala fo boso fee nanonoli kasalak lakandoo. 12 Faik esa, hataholi sila mana tao binin esa neme pulu Kreta mai, tui la'e-neu ndia hataholi hehelin nala nae, leo iak:

13 Memak hataholi la sila leo ndiak! De o musi hela falik hataholi nana kedi nalak kala sila, fo tao matetea seluk sila namahehelen nala neu Lamatuak. 14 Kokoe sala fo boso lamanene seluk hataholi Yahudi la tutui dongeng sila, ma ala musi hahae tungga palenda neme hataholi mana nggali heni nanonoli ndoos boe.

15 Masanenedak matalolole! Soa-neu hataholi dale malalaok, na basan malalaok. Soa-neu hataholi dale manggenggeok, ma ta mana namahele neu Lamatuak, na ta hambu hata esa malalaok boe. Huu sila dalen nala ma dudu'an nala manggenggeok memak so. 16 Ala manaku lae, sila lalelak Manetualain. Tehuu sila sodan nala leo bali ta lalelak Ndia. Ala kokolak fe'ek, tehuu tao fe'ek. Memak hataholi manggalauk kala! Ala ta nau tungga Manetualain hihiin. Boso mamahena hataholi matak leo sila bisa tao hata neulauk!