Muu tui-bengga hataholi la la'e-neu Manetualain Dede'a-kokolan
4
1-2 Mate'en te Yesus Karistus fali neni dae-bafok ia mai fo to'u palenda leo manek. Mae hataholi bei kasodak, ma mae hataholi mana matek kala so, basa sala leu lataa Ndia, fo Ana naketu sila dede'an nala. De au adenu o tebe-tebe nai Manetualain ma Yesus Karistus matan, fo muu tui-bengga hataholi la la'e-neu Manetualain Dede'a-kokolan. Mahehele taa-taa! Boso dudu'a fain ndia malole do, taa. Matudu hataholi salan nala. Ma manoli-mafada neulalau sala no nggale loak. Matetea hataholi dalen nala munik nanonoli ndoos.3 Te dei fo mbila-binesak, hataholi la tala nau lamanene nanonoli ndoos bali. Ala lakabubua lala mesen nala, mana kokolak tungga sila hihiin, fo tao kada lamahoko dalen nala. 4 Ala susule ndi'i doon nala fo timba heni nanonoli ndoos. Tehuu ala pasak ndi'i doon nala fo lamanene tutui dongeng lele uluk kala!
5 Mae leo bee boe oo, o musi ndoo-ndoo ma kada makatataka aok. Makatataka nai doidosok dale. Muu tui-bengga Hala Malole fo hataholi la simbok Yesus Karistus. Ono-lau hataholi la no dale namahokok losa basa ues ndia. Boso tao kada no dale bibiak.
6 Boso mbali au, huu au fai mamateng deka-deka so. Au ia sama leo nggalaas, tehuu isin sangga basan so.a 7 Tehuu au asusua tingga-tingga, de au alaik losa too-lane so. Au tungga akandoo Yesus Karistus, fo ta singgo sudi bee uu. 8 Hatematak ia ela kada dede'ak esak, fo au ahanin. Ndia piala fo Lamatuak mbeda memak kana soa-neu basa hataholi fo lasoda lo ndoos. Ita Lamatuan ndia, na ndia mana maketu no ndoos. Ndia ta namabela seselik. Nandaa no ndia fain, na Ana fee au piala ndia. Ma ta kada au mesa nggau. Te basa hataholi mana sue Ndia, ma lahani Ndia mamain, sila hambu piala leo ndiak boe!
Paulus fee hehelu mata-matak
9 Timotius! Mai lai-lai fo tilo au dei! 10 Hatematak ia, kada au mesa nggau. Kareskes la'o neni propensi Galati neu so. Ma Titus neni nusa Dalmatia neu so boe. Tehuu Demas sue hata dae-bafok papake taak ia, de ana la'o ela au fo neni kota Tesalonika neu so.b 11 Kada Lukas mesak kana leo no au nai ia. Sangga mala Markus, fo ei dua nggei mai no'u. Huu ndia bisa tulu-fali au mata-matak kala nai ia.c 12 Au adenu Tikikus neni kota Efesus neu so.d 13 Mete ma o mai, na, boso lilii muni au badu nalusek fo au la'o elan nai Karpus uman, nai kota Troas. Ma boso lilii muni au susula nggala nakalenak nana sulak nai banda louk.e
14 Aleksander, mana tutu liti ndia, ana tao manggalauk ta faak neu au so. Elan neme naa, te neu ko Lamatuak bala ndia, tungga ndia tatao manggalaun ndia.f 15 O musi mata neuk mua hataholi ndia, huu nateme laban ita dede'a-kokolan.
16 Fai makasososak au ambadeik nai mana maketu dede'ak matan fo au asala'e au dede'ang, na, ta hambu hataholi esa nanonoo no au boe. Sila basa sala la'o ela au. Neme naa leo! Ela kada Manetualain nafalende heni sila salan nala. 17 Mae leo ndiak boe oo, tehuu Manetualain ta la'o ela au. Ana natetea au, suek au bisa uu tui-bengga Ndia Hala Malolen no ta kulan hata esa boe. Au tui-bengga leo ndiak neu basa hataholi ta Yahudi la, fo ala lamanene Hala Malole ndia. Ma au boe oo akambo'ik uma soe ina-huuk ndia mai so. 18 Neu ko Manetualain nakambo'ik au neme basa manggalauk kala sila mai. Ma Ana nakalala'ok au no sodak, neni nusa sodak uu. Nai ndia, Ndia ndia to'u palenda.
Manetualain ndia, ana seli! Au so'u koa-kiok akandondoo henin neu Ndia! Amin.
Paulus nate'e susulan
19 Boso lilii fee soda-molek neu ka'a Priskila,g no saon ka'a Akila. Leo ndiak boe neu basa Onesiforus bobonggin.h 20 Erastus bei leo nai kota Korintus. Fai makahulun au la'o ela Trofimus nai kota Miletus, huu faik ndia ana namahedi belak.i 21 Masusua fo fai makasufun bei ta mai, naa te o losa so. Ita nonoon manai iak kala, ndia: Ebulus, Pudes, Linus, ma ka'a Klaudia. Ala haitua soda-molek neu ei basa nggei. Leo ndiak boe oo no ita tolanoo Salanik fe'en nala.
22 Au amahena fo Manetualain no o nakandoo, ma Ana natudu dale malolen neu ei basa nggei.
Kada leo ndiak,
Paulus