Hataholi la tatao manggalaun nala nai fai babasan
3
Timotius! Fai deka-deka no dae-bafok fai babasan, na ndia doidoson no'un ana seli. Au afada memak o leo ndiak. 2 Faik ndia, hataholi la kada sue sila ao hehelin nala ma kada dale hedi doik. Ala koao, ma lahiik dudu'a lakadadaek hataholi fe'ek. Ala kada kokolak lakadadaek lalan seli. Ta nau lamanene ina-ama. Ta nau loke makasi. Ta kalela hadak. Ta hii dede'ak la'e-neu Manetualain. 3 Ta sue lalelak hataholi. Ta nau mole-dame lo hataholi. Ala lahii tao laboo hataholi nade malolen. Ta bisa lakatataka lala aon nala. Manggalaun ana seli. Ta hii hata fo malole. 4 Ala hii se'o heni nonoon nala. Ta dudu'a naluk. Ala taok leo hataholi malelak, naa te taa. Ala hii tungga kada ao-mbaak nasuun lena heni tungga Manetualain hihiin. 5 Ala heo-hilu leo hataholi mana tungga anggama, naa te louk. Manetualain koasan ta nai sila dalen nala. Boso deka-deka mua hataholi leo silak kala!6 Hataholi leo silak kala leni hataholi uman leu, na lamata neulau hiak, suek fufudi inak bee fo dalen nala ta matea, ma lofo anak nana fufudi nalak. Inak mata leo ndiak kala lasoda lemba salak makadotok, ma ala tungga ao-mbaa kasuun mata-matak. 7 Ala lamanene mese beuk mai fee nanonoli dede'a beuk, na ala latungga dea leu ndia so. Tehuu ta lalelak litak bee ndia tetebes, ma bee ndia sala. 8 O masaneda la'e-neu Yanes no Yamres tutuin, hetu?a Faik ndia, dua sala laban ba'i Musa. Mese beuk mana maik hatematak ia, sila tataon leo ndiak boe. Ala laban nanonoli ndoos. Sila dudu'an nala ta malole so, ma namahehelen nala ta tungga ndoon. 9 Mese mana pepekok mata leo ndiak kala tala bisa lakatataka lala dook. Doo-doo te hataholi la bubuluk nggoan nala! Sama leo fai makahulun hataholi la bubuluk Yanes no Yamres masapepekon nala!
To'u tea-tea nanonolik, fo o simbo malak ndia so
10 Timotius! O bubuluk basa au sodang so. O bubuluk basa hata fo au anoli o so. O bubuluk au dala sodang. O bubuluk au maksut. O bubuluk hata fo au amahelek. O mita aom, au nggale loang neu hataholi la, ma au susueng neu sala. Ma o bubuluk talo bee de au akatataka nai au doidosong dale. 11 O bubuluk mae ala habo lakamiminak au, ma au lemba doidosok mata-matak kala. Au hambu doidosok leo ndiak nai kota Antiokia, Ikanium, ma Listra. Tehuu mae leo ndiak boe oo, Manetualain mbo'i heni au uma basa sila mai.b 12 Memak, basa hataholi la fo lamahele leu Yesus Karistus, ma lahiik lasoda malalaok tungga Manetualain hihiin, na neu ko hataholi la tao doidoso sala. 13 Ma nakalenak bali, hataholi manggalauk ma mana masapepekok kala boe tao manggalauk lakandondoo henin. Ala kedi latuda hataholi fe'ek, naa te sila nana kedi nalak boe.
14 De o musi to'u mahele nanonolik fo o simbo malam ndia so. Ma hata fo o mamahelek ndia, tungga makandoon. Te ndia ndia tetebes! O bubuluk tebe so, hetu? See ndia nanoli o basa ndia! O bisa mamahele sala!c 15 Mulai neme o bei kadi'in mai, o manoli Manetualain Susula Malalaon isin so. Susulak kala sila latudu dala sodak. Ndia soi dalak fo bisa masoda mua Manetualain nai nusa sodak, huu o mamahele Yesus Karistus. 16 Basa hata fo nana sulak nai Susula Malalaok ndia, memak Manetualain mesak kana fee hataholi la sulak kasa. Susulak ndia sosoan sila ia: nanoli hataholi hata fo tetebes, natudu hataholi salan, hela no falik hataholi neni dala ndoos neu, ma nanoli hataholi nasoda basa faik tungga kada Manetualain hihiin. 17 No leo ndiak, na Susula Malalaok ndia, memak bisa tao nahehele Manetualain hataholin nala sodan, fo suek labe'i tao basa ue malole.