Ita mana tungga Karistus, musi tasoda sama leo soldadu fo mana tungga nakandoo ndia malanggan
2
Ana Timotius, au ana susueng! Yesus Karistus ndia, dalen malole. Hatematak ia o nana mba'ak mua Ndia so, de Ana nahehele natetea o. De kada o musi simbon leo! 2 Makahulun, au anoli o la'e-neu Manetualain dala soda ndoon neme hataholi no'uk kala matan so, de lamahele lae nanonolik ndia tetebes. Hatematak ia, au oke o fo basa hata fo o mamanenem neme au mai ndia so, na o muu manoli seluk kana leo ndiak bali neu hataholi la fo o bisa mamahele sala. Hataholi la sila musi labe'i lanoli seluk nanonolik ndia neu hataholi fe'ek kala bali.3 Ita basa nggata ia, sama leo Yesus Karistus soldadun nala. De ita lemba no'u doidosok, leo Ndia boe. Huu o ia soldadu neulauk, de musi lemba tungga o baba'em. 4 Soldadu fo mana makalala'ok Ndia uen, na ta bole neu seseok bali no dede'a fe'ek. No leo ndiak, na ana bisa tao namahoko ndia malanggan.
5 Ha'i natutuduk fe'ek neme nakasusudik mai. Mete ma ita tungga nakasusudik, na, musi tungga heti-heun. Mete ma taa, na, kada deak muu leo! Te o ta senggi so. Leo ndiak boe oo, mete ma ita sangga takalala'ok Lamatuak uen, na, musi tungga heti-heun.
6 Mete hataholi mana tao osi lutu boe. Ana tao ues mbilu-mbuse nai ndia osin. Huu ana tao leo ndiak, de ndia ndia hambu nakahuluk osi ndia buna-boan. 7 Dudu'a neulalau natutuduk kala sila. Neu ko Manetualain fee o bubuluk basa sila.
8 Dudu'a neulalau neu Yesus Karistus. Ndia, mane Dauk numbu-sadun. Ana mate so, tehuu Manetualain tao nasoda falik kana. Dede'ak ndia dadik neu Hala Malole fo au uu tui-benggan sudi nai bee. 9 Huu au uu tui-bengga Hala Malole ndia, de au hambu doidosok leo iak. Nakalenak bali, ala mba'a au lenik tali besi, sama leo au ia hataholi manggalauk. Tehuu ala ta bisa lakalelee lala Manetualain Hala Malolen. 10 De au ahehele lemba doidosok mata-matak kala. Sadi Manetualain hataholin nala fo Ana hele nala sala so, bisa hambu nasalala'ek. Dei fo Manetualain so'u dema-demak kasa lakandondoo henin, huu ala dadik Yesus Karistus hataholin nala. 11 Dede'a-kokolak kala ia memak tetebes:
“Mete ma ita simbok tae, Karistus mate nggati ita,
na, ndia sama leo ita mate la'o ela soda laak boe,
basa dei fo ita tasoda no'u to Ndia boe.
12 Mete ma ita takatataka nai doidosok, sama leo Karistus,
na, dei fo ita boe oo tanggatuuk to'u palenda no'u to Ndia.
Tehuu mete ma ita talelesi Ndia,
na, Ndia boe oo nalelesi ita.a
13 Mae ita dalen ta katemak toon,
tehuu Ndia dalen katemak nakandoo no ita,
huu Ndia ta bisa pepeko. Hata fo Ana kokolak, na neu ko Ana tao natetun.”
Hataholi mana tao ues fo Manetualain koa sala
14 Fee nasanenedak neu hataholi kamahelek kala, fo boso ala lilii heni basa dede'ak kala ia. Madenu sala no Manetualain naden, fo ala hahae lasisimbo bafak la'e-neu dede'a de'ek ndandaan, te Manetualain mana nitak. Huu basa sila sosoan ta faa boe. Kada lakalulutu hataholi fo mana namanenek dudu'an nala. 15 Masusua matalolole fo tao o aom leo hataholi mana tao ues fo nandaa hambu kokoak neme Manetualain mai. Hataholi leo ndiak, ta paluu mae, huu ana tao uen no malole so. O musi dadik hataholi mana manoli Manetualain Dede'a-kokolan ndia no ndoos. Te Ndia Dede'a-kokolan ndia tetebes! 16 Heok dook mua kokolak fo huu-okan taa, ma neme kokolak fo ta mana neni hada-holomata neu Manetualain. Kokolak leo ndiak kada tao hataholi boe tao manggalauk. 17 Sila kokola manggalaun ndia, ala nama leo hedi kangker ia. Himeneus no Filetus kokolan nala sama leo ndiak. 18 Dua sala fee nanonolik lae, basa hataholi mana matek kala lasoda fali so. Tehuu ndia ta tetebes! No leo ndiak, de ala heok dook leme nanonoli ndoos mai so. Hata fo ala lanolik kala sila, lakalulutu hataholi luma namahehelen nala.
19 Tehuu netes fo Manetualain nambadedei nalan ndia ta natanggongga. Nai netes ndia lain nana sulak nae, “Lamatuak nalelak Ndia hataholin nala” ma “Hataholi fo mana nakaluku-nakatele neu Manetualain, na musi heok dook neme manggalauk mai.” Netes ndia, na ndia Manetualain hataholin nala.b
20-21 Ha'i natutuduk neme hataholi kamasu'ik uman. Hambu bua mata-matak kala. Hambu luma nana taok neme lilo mbilas ma lilo fulak mai. Tehuu luma hambu leme ai ma dae manu-teik mai. Bua neulauk neme lilo la mai, maumak pake sala nai feta-dote. Tehuu bua basa faik, na maumak mae pake sala neu hataholi la matan. Leo ndiak boe oo, neu hataholi. Mete ma hambu hataholi nakadodook aon neme manggalauk mai, na, ana sama leo bua neulauk kala. Maumak hii pake buas ndia, huu ndia neni kasosoak fo tao ue malole mata-matak kala.
22 Hataholi muli anak kala lofo anak nana ikak, huu sila ao-mbaa kasuun. Tehuu Timotius, o musi manea aok neulalau, fo boso tungga ao-mbaa kasuun leo ndiak. Masusua fo tao tatao malole. Mamahele makandoo neu Lamatuak. Masoda no susuek ma mole-dame mua basa hataholi la. Basa hataholi fo lamahele leu Lamatuak ma mana masoda no dale malalaok, lahiik kada tao malole lakandoo. De Timotius, o musi masoda leo sila boe baa! 23 Au afada seluk bali! Boso muu seseok, ma masisimbo bafak mua dede'a huu-oka taak. Huu basa sila, kada tao hataholi la lahuu. 24 Hataholi la fo mana tao ues fee Lamatuak, ta landaa dadik hataholi mana tao nahuuk. Tehuu ala musi tao malole lo basa hataholi la. Ala musi lanoli lalelak hataholi la. Ala musi laena nggale loak neu hataholi mana sangga dede'ak kala. 25 Ala musi lanoli neulalau neu hataholi mana laban sila. No leo ndiak, na see bubuluk nae, Manetualain bisa tuka sila dalen nala, fo ala fale dalen nala, ma simbok hata fo ndoos. 26 No leo ndiak, dudu'an nala langgaledo seluk bali, boe ma bisa lakambo'ik leme nitu la malanggan mai, te ana mba'a sala so, suek ala tungga kada ndia hihiin.