Soda-molek neme au mai, Paulus. Manetualain so'u nala au dadik uu Yesus Karistus nadedenun so. Huu Manetualain nasala'e nala ita teme ita sala-singgon nala mai, de ita tamahena neu Lamatuak Yesus, fo mana fee ita tasoda takandondoo henin to Ndia.

Timotius! O sama leo au ana heheling so, huu au ndia atudu dalak, fo o mamahele muu Karistus. Au hule-haladoi neu Manetualain, ita Aman, ma Yesus Karistus, ita Lamatuan, fo latudu Sila dale malolen nala ma namemeda kasian neu o, ma fee o masoda mua sodak, mole ma ndoo-ndoo.^a

3 Fain, ita dua nggata teme kota Efesus no'u. Neu faik fo au sangga uni propensi Makedonia uu, au akaseti o, fo o mahani nai Efesus. Faik ndia, hambu hataholi luma tao lasapangga salanik kala, ma fee nanonolik dede'a ta ndoos sala. De au oke fo o muu ka'i sala, fo ala hahae, suek boso fee nanonolik lakandoo leo ndiak. 4 Ala ngganggali heni fai no kada lasisimbo bafak, tui tutui dongeng lele uluk, ma landali maak la'e-neu numbu-saduk kala fo ta mana ketuk. Dede'a mata leo ndiak kala kada tao nala hataholi la lahuu, ma tao sodan nala ta tungga namahehelek neu Manetualain.

5 Au fee nanoli-nafadak neu o, fo ela leo bee na o manoli hataholi kamahelek kala, suek lasoda lasue ao. Ala lasoda tao leo ndiak neme dalen nala neulauk, dudu'an ndoos, ma namahehelen matea.

6 Tehuu hambu mesen luma heok dook ma la'o ela nanoli-nafadak ndia so. Boe ma ala ngganggali heni fai, leu lasisimbo bafak, ma kada labalok kala. 7 Ala latudu aon nala lae, sila ndia, mesen fo mana fee nanonolik la'e-neu ba'i Musa Heti-heun nala. Ala taok aon nala leo mese ina-huuk, tehuu tala bubuluk hata fo ala fee nanonolik kala sila isin.

8 Ita basa nggata bubuluk tae, basa ba'i Musa Heti-heun nala, malole! Sadi ita takalala'ok kana tungga Manetualain maksut teteben. 9 Manetualain ta fee Heti-heuk kala sila neu hataholi la fo sodan ndoos so. Tehuu nana sulak fee hataholi fo mana tao naodek, tala nau lamanene palenda, sodan dook neme Manetualain mai, lahiik tao manggalauk, tala mbali Manetualain, tala lahiik tao lamahoko Manetualain ma fee hada-holomata neu Ndia, mana makanisak, mana tao nisa ina-ama bonggin nala. 10 Heti-heuk kala sila nana sulak fee hataholi fo sao ta no hadak, touk sao touk ma inak sao inak, mana humu hataholi fo sangga doik, mana masapepekok, mana sakasii pepekok, ma basa hataholi mana mahiik laban nanonoli ndoos. 11 Nanonoli ndoos sila, leme Manetualain Hala Malolen mai, fo Ana feen neu au. Manetualain ndia, ana seli. Hataholi nandaa so'u dema-demak Ndia.

12 Au oke makasi no'uk neu ita Lamatuan Yesus Karistus, huu Ana hele nala au dadik hataholi namahehelen, ma fee au bebe'i-balakaik, losa au bisa akalala'ok Ndia uen. 13-14 Naa te makahulun, au ateme kokolak aboboo fo atuda Yesus naden, ma tao doidoso hataholi mana tungga Ndia dala sodan. Au ahiik tuni-ndeni sala ma tao akalulutu sala. Au manggalaung leo ndiak, huu faik ndia au ta bubuluk hata fo au taok ndia, ma au bei ta amahele neu Yesus Karistus. Tehuu Ana ta lilii heni au, ma Ana natudu susuen neu au.^b Nakalenak bali, Ana natudu taa-taa dale malolen neu au! Ana fee baba'e-babatik mana sasik neu au, fo suek au bisa amahele teas neun, ma bisa sue hataholi la, sama leo Ana sue au.

15 Ita tateme tamanene so lae, “Yesus Karistus konda mai nai dae-bafok ia so, fo nasala'e nala hataholi mana tao salak kala.” Memak tetebes leo ndiak! Neme basa hataholi mana tao salak kala sila, na au ndia manggalaung nai lain seli. 16 Mae au manggalaung leo ndiak, tehuu Manetualain naketun tana huku au. Tehuu Ana nau pake au dadik conto, fo atudu Yesus Karistus nggale loan neu hataholi manggalauk manai lain seli, leo au ia. No leo ndiak, na hataholi fe'ek kala fo mana tao salak kala, bisa lamahele neun, fo hambu sodak lakandondoo henin lo Ndia boe.

18 Timotius ana susuek! Au sangga afada hata, fo o musi makalala'ok nai o uem mala. Basa ia la, tungga hata fo Manetualain mana kokolan nala lafada memak la'e-neu o aom so. Mete ma o tungga dede'a de'ek sila no malole, na o leo soldadu esa, fo mana matati malelak laban basa manggalauk kala sila. 19 To'u matetea o namahehelem neu Karistus. Ma manea fo o dalem malalaok nakandondoo henin. Hambu hataholi fe'ek kala ta nau lamanene sila dale nafafadan so bali, de tao nakalulutu sila namahehelen nala, sama leo ofak nakalulutuk huu ana hala neu batu ina-huuk. 20 Himeneus no Aleksander asa, sama leo ndiak so! Huu ndia de au fee sala leu nitu la malanggan. Au tao leo ndiak, fo dadik nanonolik neu sala suek ala hahae tao lakalulutu Manetualain naden.