La'e-neu ata no malanggan
6
Ata see fo namahele neu Lamatuak Yesus, na musi fee hada-holomata neu ndia malanggan, fo suek hataholi deak kala ta hambu dalak fo kokolak latuda Manetualain naden, ma dudu'a lakadadaek ita nanonolin.2a Mete ma ata malanggan namahele neu Lamatuak Yesus, na, ata sila ta bole dudu'a lakadadaek kana, huu malanggan ndia namahele neu Lamatuak Yesus boe. Mae talo bee boe oo, ala musi ono-lau neulalau lenak bali neu sila malanggan, huu sila dua sala kamahelek no'u, de ala musi lasue ao.
Nanonoli kasalak, ma nggadi malole
2b Timotius! Manoli basa sila, ma matetea salanik kala dalen nala, fo tao tungga basa sila. 3 Ita nanonoli ndoon ndia, natudu dala sodak fo tungga Manetualain hihiin. Hataholi fo mana fee nanonoli fe'ek neme ia mai, na ala timba heni Lamatuak Yesus Karistus nanonoli ndoon so. 4 Hataholi mata leo ndiak ndia, koao, tehuu langga uten louk! Sila hedin nala ndia, kada lahiik sangga dede'ak, ma lasisimbo bafak la'e-neu kada dede'a de'ek. Basa ia la, tao lala hataholi la dale hedi, lahuu, tao laboboo hataholi fe'ek nade malolen, ma ala neo hiak hataholi fe'ek. 5 Hataholi mata leo ndiak, kada lambue tao naodek taa-taa. Sila dudu'an nala manggalauk. Ala ta bubuluk bee ndia neulauk so bali. Ala dudu'a lae, mete ma ala tungga anggama heti-heun, na, ala bisa lamasu'i.
6 Tehuu tungga teteben, mete ma hataholi nasoda fo tao namahoko Manetualain dalen, de nameda dai no hata fo sila enan, na, ndia nanalan ina-huuk, sama leo ala dadik kamasu'ik so.
7 Masaneda neulalau! Neu faik fo bonggi ita, ita ta teni hata esa boe neni dae-bafok ia mai. Ma ita mate, ita ta teni hata-hata kalua teme dae-bafok ia mai boe. 8 De sadi hambu nana'ak, ma balo'a mana daik, na dai ndia so!
9 Tehuu hataholi see fo lahiik lamasu'i, lofo anak hambu soba-douk mata-matak kala, ma nana mba'ak no dede'a manggala'uk no'uk, huu dudu'a kada hata. Dudu'a leo ndiak neni soe ma lakalulutu sila sodan nala. 10 Te sue doik ndia, na dadik neu huu-okak neu hataholi tao manggalauk mata-matak kala. Hambu hataholi luma lasuu lalan seli sangga doik leo ndiak, losa ala heok dook leme sila namahehele teteben mai. No leo ndiak, na sila mesak kasa lakalulutu sila sodan nala.
To'u tea-tea nanonolik, fo o simbo malak ndia so
11 Timotius! O ia, Manetualain enan. De makadodook muma basa manggalauk kala sila mai. Masoda mua ndoos. Tungga basa Manetualain hihiin. Mamahele makandoo neu Yesus Karistus. Sue basa hataholi la. Makatataka nai toto'ak dale. Masoda malole mua basa hataholi la. 12 Makatataka fo makalala'ok basa nanonolik kala sila, fo ita tamahelek kala. Manetualain ba'e fee o sodak ta mana basak so. Ma o mafada o namahehelem leo ndiak nai hataholi no'uk kala matan so. De to'u tea-tea sodak ndia.a 13-14 Hatematak ia, au oke o fo mba'a heheluk leo iak: tao tungga basa Lamatuak Yesus palendan. Boso la'o lena palenda esa boe, suek hataholi la, ta hambu o salam. Tao tungga basa sila no tetebes, losa ita Lamatuan Yesus Karistus fali main. Au oke o helu leo ndiak neu Manetualain matan, te Ndia mana fee samanek neu basa kasodak kala. Au boe oo oke o helu leo ndiak neu Yesus Karistus matan boe, te Ndia ndia, nafada no manggaledok nai nggubenol Pontius Pilatus matan.
15 Lamatuak Yesus fo manai lain seli ndia, Ndia mana to'u koasa!
Ndia ndia, Mane Ina-huuk neme basa manek kala mai.
Ma Ndia ndia, Malangga Ina-huuk neme basa malanggan nala mai.
Nandaa no fain,
Manetualain tao nanggaleledo dede'ak kala ia.
16 Kada Ndia mesak kana ta mana matek.
Ana nasoda nai manggaledok dale fo hataholi ta nakatataka sulin.
Ta hambu hataholi esa boe bisa nita Ndia.
Basan fee hada-holomata neun!
Basa koasa nai Ndia liman losa dodoon neu!
Leo ndiak leo! Amin!
La'e-neu hataholi kamasu'ik kala
17 Mafada hataholi kamasu'ik kala malai dae-bafok ia, fo boso koao, ma boso kada lamahena neu sila hata-heton nala. Huu basa hata-heto la sila, neu ko mopo sala. Malolenak ala lamahena neu Manetualain, fo Kasodak losa dodoon neu. Huu Ndia ndia mbo'a fee ita, basa hata fo ita paluun, fo suek ita tameda tita sodak ia namahokon. 18 Mafada sala fo pake sila hata-heton nala neu tatao malole. Ala musi manggate tao tatao malole. Ala musi lalengga sila dalen nala, fo tulu-fali hataholi fe'ek kala, ma lahiik ba'e baba'e-babatik fo Manetualain ba'e fee sala. 19 No leo ndiak, na lakaduduluk lala hata-heton nala, fo dadik neu netes matea soa-neu sila sodan nala nai mbila-binesak. No leo ndiak, ala tao lala sodan nala kasosoak, neu faik fo Lamatuak fali main.
Paulus nate'e susulan
20 Timotius! Manea matalolole basa hata fo Manetualain fee o ia so. Boso tungga seseok mua mana kokola lou-latak kala. Boso tamba o sulu tepam, ma kokolak fo ta neni hada-holomatak neu Manetualain. Masanenedak bou! Hambu hataholi luma taok aon nala malelak kala. Naa te sila ‘malelan’ ndia, huu-okan taa. Boso muu masisimbo bafak mua sala. 21 Hambu hataholi luma lamahele nanonoli pepekok kala sila, losa heok lasadea la'o ela sila namahehele teteben neu Manetualain.
Au hule fo Manetualain natudu dale malolen neu ei basa nggei.
Soda-molek,
Paulus