Timotius heo-hilun neu salanik kala
5
Touk fo lasin lena o, boso ka'in no hala belak. Pake dede'a banggana'uk, sama leo kokolak mua o ama bonggim. Ma mete ma hataholi teun nai o daek, na, fufu'a dalen nala, ma tao sala leo o tolanoo bonggim mala. 2 Leo ndiak boe oo no inak fo lasin lena. Kokolak mua sala, sama leo o kokolak mua o ina bonggim. Mete ma kokolak mua inak fo teun nai o daek, na, tao sala leo o feto bonggim. O dalem musi malalaok mua sala.La'e-neu ina falu la
3-5 Ina falu la fo bobonggin nala ta lakaboin, na salanik kala musi tulu-fali sala. Tehuu ina falu fo bei kaumbu-anak, na sila ndia musi lakaboin. Manoli sala fo ala bala lalelak ndia mbuse titin neu sala. No leo ndiak, na ala ono-lau Manetualain, ma tao namahoko Ndia dalen. Tehuu ina falu fo tebe-tebe nasoda mesak kana, ma ta no sudi see so bali, na makaboin. Ana kada namahena neu Manetualain. Leledo-le'odaen ana hule-haladoi noke tulu-falik neme Manetualain mai. De salanik kala musi lakaboi ina falu mata leo ndiak kala.
6 Tehuu ina falu fo kada nahiik nasoda no seteleek, na mae bei nasoda boe oo, tehuu ndia sodan belin ta so, sama leo hataholi mana matek so.
7 Fee nasanenedak neu basa salanik kala la'e-neu tulu-fali ina falu hata taak kala, suek hataholi deak kala ta bisa kokolak lakalulutu sila nade malolen nala.
8 Tehuu mete ma hataholi ta nau nakaboi ndia bobonggi hehelin, nakalenak ndia uma isi hehelin, na, ndia sama leo ana nggali heni ndia namahehelen neu Manetualain. Ndia manggalaun lena heni hataholi fo ta nalelak Manetualain.
9 Mete ma sangga so'u ina falu fo tulu-fali malangga salanik, na, ndia heti-heun leo iak: ndia teun ta bole kulan neme teuk nee hulu mai; fai makahulun dalen katemak no kada saon esak; 10 hataholi la lalelak kana, huu ana nateme tao malole neu hataholi fe'ek kala; ana nakaboi natalolole anan nala; ana nalengga dalen taa-taa fo ono-lau hataholi fe'ek kala; ana tao ues sudi hata no dale hiik fo ana tulu-fali hataholi kamahelek kala; ana nahiik tulu-fali hataholi mana hambu toto'ak kala; ma mana nahele taa-taa fo tulu-fali la'e-neu dede'a malole.
11 Boso so'u ina falu muli-soluk fo tulu-fali salanik kala. Boso losak ao-mbaan nasuu, de nahiik sao seluk bali. No leo ndiak, na sila fain ta so bali, fo ono-lau latalolole salanik kala. 12 Mete ma sila fain ta fo ono-lau salanik kala, na, ndia sama leo ala lakalulutu sila hehelun nai Manetualain matan. Dei fo hataholi la soli salak neu sala. 13 Boso losak ala mulai mbela, boe ma lambue maso kalua hataholi la uman nala, fo latui lou-latak tao laboboo hataholi naden nala. Ma manggalaun lena heni ndia bali, na ala lahiik seseok hataholi fe'ek dede'an, ma ala kokolak dede'ak fo ta mandaak. 14 Malolenak ina falu bei muli-soluk kala sao seluk bali, fo ela ala bonggi, ma lakaneni sila uma-loo hehelin nala. No leo ndiak, de hataholi la mana musu lo ita, tala hambu to'ok fo tao laboo ita naden nala. 15 Ina falu muli-soluk kala luma lasalak kala so, losa lahiik tungga nitu la malanggan dalan.
16 Mete ma ina kamahelek bobonggin esa, dadik ina falu so, na, inak kamahelek ndia musi tulu-fali ina falu ndia. Boso ela salanik kala tanggon ndia. Suek salanik kala bisa tulu-fali ina falu fe'ek kala, fo memak ta laena sudi see so bali.
La'e-neu malangga salanik kala
17 Hataholi fo mana nalangga salanik no malole, na ei musi fee hada-holomata lenak neun, ma bae ndia nggadin no mandaan. Nakalenak soa-neu hataholi fo mana tao ues mbilu-mbuse fo tao nanggaleledo Manetualain Dede'a-kokolan, ma nanoli ei la'e-neu dala soda ndoon. 18 Sama leo nana sulak nai Manetualain Susula Malalaon nae, “Mete ma pake sapi fo heheta hade de'en neme mbulen mai, na, boso pole mahele bafan, fo suek ana bisa na'a boe.” Ma nana sulak bali nae, “See tao ues, na ana nandaa hambu nggadi.”a
19 Mete ma hambu hataholi luma kalaak hataholi fo mana nalangga salanik, na, boso simbok kana leo ndiak dei! Musi hambu sakasii dua do telu fo tutui nala sama, na bei fo simbok malan fo palisak kana.b 20 Mete ma o ka'in tehuu ana bei nasoda nakandoo no salak ndia, na ka'in neu salanik kala matan. No leo ndiak, na hataholi fe'ek kala, ta lambalani tao tungga salak leo ndiak.
21 Makalala'ok basa heti-heuk kala ia neu salanik kala. Boso mete matak, ma boso mamabela seselik. Au fee ues ia neu o limam nai Manetualain ma Yesus Karistus matan. Ata nusa sodak fo Manetualain hele nala sala so, dadik sakasii boe!
22 Boso hailai so'u hataholi dadik malanggan. Palisak matalololen makahuluk dei. Mete ma so'u sadi ndaa hataholi, basa boe ma hataholi ndia tao salak, na, ei boe oo lemba mala natataak ndia, huu ndia tatao-nono'in. De manea o aom fo malalaok makandoo.
23 Au amanene o teim hedis nakandondoo henin. Malolenak mulai hatematak ia o seseok oe no anggol oek faa, fo dadik akidook. Boso kada minu oe hiak.
24 Mete neulalau! Hambu hataholi luma salan nala nana nita memak. Ala bei ta losa mana maketu dede'ak matan, tehuu basa hataholi la bubuluk sila salan nala so. Tehuu hambu hataholi fe'ek boe oo, dook bei fo salan nana nitak. 25 Leo ndiak boe oo no hataholi mana tao malole la. Luma nana nita memak. Tehuu hambu fe'ek kala tao malole no nafufunik. Mae leo ndiak boe oo, hata fo ala taok ndia, ta dook te nana nitak boe. Ta bisa nafuni dede'a malole.