Mata neuk mia hataholi mana fee nanonoli kasalak kala
4
Manetualain Dulan nafada ledo-ledo nae, dei fo salanik luma timba heni hata fo ita tamahelek. Boe ma leu tungga nanonoli kasalak neme nitu la pepekon mai. 2 Hataholi fo mana mai fee nanonolik kasalak kala leo ndiak, kokolak fe'ek, tehuu tao fe'ek. Memak hataholi masapepekok! Dale kadi'i anan nala katema ndoos so. 3 Ala lanoli hataholi fo boso sao. Ma ala laluli nana'ak mata-matak boe. Naa te tungga ndoon, na Manetualain tao basa nana'ak kala sila, fo mete ma hataholi kamahelek kala la'a, na loke makasi neu Ndia. Huu ala bubuluk nanonolin ndoos! 4 Basa hata fo Manetualain nakadadadik kala sila, memak malole. De boso maluli mata-matak! Hataholi la musi simbok basa sila, ma loke makasi neu Manetualain, 5 huu Manetualain Dede'a-kokolan ma ita huhule-haladoin nala, tao basa nana'ak sila dadik malalaok.Lamatuak Yesus hataholi mana tao ue malolen
6 Timotius! Tao masanenedak basa dede'ak kala ia, neu ita tolanoo kamahelen nala. Mete ma o tao leo ndiak, na, o dadik Yesus Karistus hataholi mana tao ue malolen. Manetualain Dede'a-kokolan tao nala o mamahele Ndia, ma tao o bubuluk nanonolik bee ndia tetebes. O to'u mahele Manetualain Dede'a-kokolan nala so. Ndia sama leo nana'ak fo ana tao natea o aom. 7 Boso nggali heni fai no tutui lou-latak, fo ta natutik no Manetualain. Boso mbali ina lasik kala tutuin nala sila fo naluli mata-matak kala. Malolenak mateme o aom fo suek masoda tungga Manetualain hihiin nai basa dede'ak lala'en.
8 Mateme aok fo tao ao-inak balakai, na ndia malole.
Tehuu sosoan kada faak.
Mateme aok fo masoda tungga Manetualain hihiin,
ndia sosoan no'uk.
Ndia kasosoak
ta kada nai soda dae-bafok hatematak ia,
te nai soda mana maik boe.
9 Dede'a-kokolak kala ia tetebes! De mbedan neu o dalem, fo boso lilii henin. 10 Ita tamahena neu Manetualain, fo Mana masoda nakandondoo henin. Ana nau nasala'e nala basa hataholi la, tehuu neu kada ita fo mana mamahele neu Ndia. De ita tao ues tingga-tingga, ma tasusua tingga-tingga.
11 Manoli hataholi basa ia la. Ma madenu sala fo tungga basa nanonolik kala sila. 12 Boso mbo'i hataholi la dudu'a lakadadaek o, huu o bei muli-soluk. O musi dadik conto neu hataholi kamahelek kala, tungga o dede'a-kokolam, o heo-hilum, o dala susuem neu hataholi, o namahehelem neu Yesus Karistus, ma o soda malalaom. 13 Ei bei mahani au mamaing, na boso lilii lees Manetualain Hala Malolen, neu hataholi kamahelek kala. Tao matetea dalen nala, ma manoli matalolole sala.
14 Makalala'ok matalolole baba'e-babatik fo Manetualain fee o so, fo o simbo malan neu faik fo malangga salanik kala hule-haladoi, ma tao liman nala leu o langgam. Faik ndia boe lafada Manetualain hehelun la'e-neu o sodam ma o uem. De boso nggali heni baba'e-babatik fo o hambuk ndia so. 15 Makalala'ok basa dede'ak kala sila no manggatek! Ela basa hataholi la lita lae, o sodam ma o uem, boe natea. 16 Manea fo o masoda mua ndoos makandoo. Ma manea fo o fee nanonolik mua ndoos makandoo boe. Mete ma o masoda leo ndiak, na, neu ko Manetualain soi dalak fee o ma hataholi mana mamanene o, suek ei makambo'ik mima basa dede'a manggalauk kala mai.