2 Tesalonika
Paulus susula kaduan
fee salanik kala malai Tesalonika
Soda-molek
1
Soda-molek neme au mai, Paulus, ma au nonoo nggala, Silas ma Timotius.Susulak ia, ai haituan fee basa ei salanik kala malai kota Tesalonika. Ei ndia hele aom fo tungga Manetualain ita Aman, ma tungga Yesus Karistus, ita Lamatuan.a 2 Ai hule fo Ala latudu Sila dale malolen nala leu ei, fo suek ei bisa masoda mia sodak, mole ma ndoo-ndoo.
Paulus noke makasi neu Manetualain
3 Tolanoo nggala ei! Ai mandaa moke makasi taa-taa neu Manetualain, huu ei mamahele neun, ma ei masue ao esa no esa so. 4 Huu ndia de ai tui Manetualain salanin nala sudi lai bee la'e-neu ei. Ai tui mae, ei makatataka makandoo nai ei namahehelem, mae hataholi fe'ek kala tuni-ndeni tao doidoso ei.
5 Basa ia la latudu lae, dei fo Manetualain naketu ei dede'am mala no ndoos. Te doidosok fo hatematak ia ei lembak ndia, tao nala ei mandaa dadik neu Ndia lau-inggun nala. Ndia ndia, ei Manem. 6 Boso bii, te Manetualain ndia, ndoos. Kada mete leo! Mate'en te Ana bala hataholi fo mana tao doidoso ei. 7 Ma Ndia boe oo fee ei hahae mima doidosok, fo ei lembak ndia. Ndia tao leo ndiak neu ai boe.
Basa ia la dadi, neu faik fo Lamatuak Yesus konda mai, sama-sama no ata nusa sodan nala fo manai lain seli. 8 Ala konda mai lo ha'i mana mbila ina-huuk. Boe ma Ana fee huhukuk neu see, fo tala nau lalelak Manetualain, ma tala nau tungga Lamatuak Yesus Hala Malolen. 9 Ana fee huhuku belak nalan seli, neu basa sala, losa lakalulutuk lalan seli, ta no mana basak. Ana husi heni sala leme matan mai, fo ta lameda Ndia koasa mandela-masa'an so bali.b 10 Tehuu neu faik fo Ana mai ndia, basa hataholi kamahelek kala so'u botik naden, ma fee hada-holomata neun. Dei fo ei boe oo nai hataholi kamahelek kala sila laladan, huu ei simbo mala Hala Malole ndia so, fo fai maneuk kala ai mafada ei so.
11 Huu ndia de ai hule-haladoi leledo-le'odaen fee ei, fo suek Manetualain taok memak ei mandaa dadik Ndia hataholin nala. Ai hule fo Ana fee koasa neu ei, suek ei bisa tao basa hata neulauk tungga hata fo ei maketun mae taon, ma hata fo ei mamahelen. 12 Mete ma ei masoda no tatao leo ndiak, na, dei fo hataholi la so'u dema-demak Lamatuak Yesus naden. Ma ei hambu kokoak boe, huu ei tunggan. Basa ia la, leme ita Aman Manetualain dale malolen mai, ma leme Lamatuak Yesus Karistus dale malolen mai.