Heti-heuk soa-neu mana dadik malangga salanik
3
Hataholi lae, “Mete ma hataholi esa nau dadik malangga salanik, na, ana hele nala ues esa, lolen ana seli.” Dede'ak ndia memak tetebes! 2 Malangga salanik sodan musi naden malalaok. Dalen katemak, no kada saon esak. Heti nalelak aon. Dale banggana'uk. Hataholi la fee hadak neun. Nahiik soi lelesun fo simbok hataholi mana maik kala. Ma nabe'i nanoli hataholi fe'ek kala. 3 Boso mana mafuk. Ma boso lima laik neu hataholi. Mandaan ndia, hataholi mana dale malole, mana mahiik mole, ma ta mana dale hedi doik. 4 Ana musi heti uma-loon no malole. Anan nala musi feen hadak ma lamanenen boe. 5 Mete ma hataholi ndia tana heti nala uma-loo hehelin, na neme bee mai, ana bisa heti nala Manetualain salanin nala?6 Malolenak hele mala hataholi fo ana tungga Lamatuak Yesus dook so. Boso so'u malangga salanik fo bei fo namahele Lamatuak Yesus, huu hataholi leo ndiak lofo anak koao. Boso losak Manetualain hukun sama leo Ana huku nitu la malanggan, huu ndia mana koaok. 7 Mete ma nau hele mala malangga salanik, na, sangga hataholi fo naena nade malole no hataholi deak so boe. No leo ndiak, na ana ta paluu mae hata-hata. Ma nitu la malanggan ta bisa natudan.a
Hataholi mana tulu-fali malangga salanik
8 Leo ndiak boe oo no hataholi mana tulu-fali malangga salanik. Sila musi hataholi fo naden nala malole, maan nala ta kafalek, ta mana mafuk kala, ma boso hataholi mana mahiik nanalak lena-lenak. 9 Dalen nala musi malalaok, ma ala musi to'u lahele Manetualain nanonolin, fo Ana natudun neu ita hataholi kamahelek kala so. 10 Palisak neulalau sila sodan, ma sila uen. Mete ma hataholi ta hambu sila salan nala, na, bei fo so'u sala fo tulu-fali malangga salanik kala.
11 Leo ndiak boe oo no sila sao inan nala.b Sila ndia, musi inak fo lasoda lo mandaan ma laena nade malole. Boso mana tao laboo hataholi fe'ek naden. Ala musi lanea lalelak aon nala, ma hataholi la boe oo bisa lamahele sala.
12 Mana tulu-fali malangga salanik kala boe oo, musi touk dalen katemak neu kada sao inak esak. Ndia boe oo musi heti nalelak ndia uma-loon no malole, ma heti nalelak anan nala boe. 13 Mete ma ala ono-lau salanik kala no malole, na, neu ko hataholi la boe oo fee hadak neu sala. Ma sila tamba lambalani, de tala bii kokolak la'e-neu sila namahehelen neu Yesus Karistus.
Ita namahehelen huun
14-15 Timotius! Au amahena ta dook so bali, te au bisa mai tilo o. Leo au hambu nakale'ok, fo dook bei fo au mai, na susulak ia losa nakahuluk, neu o limam so. Au sulak susulak ia, fo au afada o ae, Manetualain bobonggin nala musi lasoda leo beek. Boso lilii henin mae, Manetualain masodak losa dodoon neu. Ndia hataholin nala, sama leo uma fo naena netes ma dii inak matea fo toba nahele Manetualain nanonoli teteben.
16 Manetualain buka dede'a nana nafunik fo ana seli neme ita namahehelen mai so. Ndia huun leo iak:
Karistus mai nai dae-bafok ia so.
Ana pake hataholi mata-aon sama leo ita.
Manetualain Dulan boe natudu nae,
Yesus ndia, Hataholi dale ndoos.
Ma Manetualain ata nusa sodan nala lita Ndia boe.
Manetualain so'u Ndia neni nusa sodak neu,
de so'u dema-demak Ndia.
Ndia Tutuin nakambela losa basa hataholi nusak kala nai dae-bafok katematuan so.
Sudi nai bee, hataholi la lamahele Ndia so.
Ita tamahele leo ndiak boe!