Hataholi kamahelek kala lakabubua, na ita musi tao talo bee?
2
Makasososan, au oke ei hule-haladoi fee basa hataholi la. Ei miu masale Manetualain, na hule fo Ana tulu-fali basa hataholi malai toto'ak dale. Ma moke makasi, huu Ana tao malole soa-neu sila basa sala so. 2 Hule-haladoi leo ndiak boe, fee basa manek kala ma basa malanggan nala. No leo ndiak, ita basa nggata bisa tasoda to mole ma ndoo-ndoo, tungga Manetualain hihiin. Ita boe tasoda tandaa to hataholi fo mana makaluku-makatele neu Ndia. 3 Hule-haladoi mata leo ndiak tao namahoko Manetualain dalen, de Ana simbok no malole. Ndia ndia, nasala'e nala ita. 4 Ana nau fo basa hataholi la hambu nasalala'ek, ma bubuluk dede'ak bee ndia tetebes. Fo ndia:5 Manetualain, kada esak.
Ma hambu lelete kada esak fo nakamomolek Manetualain no ita hataholi. Lelete ndia, Yesus Karistus.
Ma Yesus ndia, hataholi sama leo ita.
6 Ana fee aon fo soi nala ita basa nggata teme ita sala-singgon nala mai.
Nandaa no ndia fain, Manetualain buka ledo-ledo Hala Malole ndia, fo nafada basa hataholi la. 7 Boe ma Ana hele nala au dadik Ndia nadedenun so, suek au la'o uu afada hataholi ta Yahudi la sudi lai bee, ma anoli sala fo suek lamahele Lamatuak Yesus boe, ma lasoda tungga dala ndoos. Hata fo au afadak ia, tetebes leo ndiak. Au ta pepeko.a
8 Au hihiing leo iak: sudi nai bee mesan, mete ma ei makabubua fo hule-haladoi, na ei dalem mala musi malole esa no esa. Boso mahinda nasak esa no esa. Boso masisimbo bafak. Mete ma so'uk limak fo hule-haladoi, na, ei dalem mala musi malalaok.
9-10 Leo ndiak boe neu inak kala. Au nau fo ala heti lala aon nala no malole, ma ala pake balo'as fo nandaa. Boso tao heo-hiluk, fo tao hataholi la pasak matan nala leu sala, huu ala pake langga buluk namata-ao mata-matak kala, do ala pake balo'a mabeli fo ta kalela hadak, do heo-hiluk lena-lenak pake lilo mbilas-lilo fulak, ma mutiara la. Te mana tao inak kala dadik mana'a hiak, na sila dalen nala malalaok, ma tao kada dede'a malole. Ndia nandaa no inak fo mana nakaluku-nakatele neu Manetualain.b 11 Mete ma salanik kala lakabubua fo lamanene nanonolik, na, inak kala tungga heti-heuk boe fo pasa neulalau ndi'i dook, fo lamanene tebe-tebe nanonolik ndia. Boso ala lakukutuk, ma boso langgilo. 12 Tungga au, na ta nandaa inak kala soso'uk aok fo palenda touk kala, ma lanoli sala. Malolenak inak kala kada bendoo. 13 Huu Manetualain nakadadadik Adam nakahuluk. Basa ndia, bei fo Hawa.c 14 Ma nitu la malanggan ta kedi nakahuluk Adam, tehuu inak dei. Mulai neme faik ndia mai, hataholi la'o lena Manetualain heti-heun.d 15 Tehuu mae leo ndiak boe oo, inak kala bisa hambu masodak, huu ala bonggi anak. Sadi lamahele tebe-tebe neu Karistus, lasue ao, lasoda lo dale malalaok, ma lasoda lo mandaan.e