Paulus noke salanik kala malai Tesalonika fo hule-haladoi fee sala
3
Basa tolanoo nggala ei! Boso lilii hule-haladoi fee ai. Hule-haladoi suek Lamatuak Hala Malolen bisa nakambela no lai-laik, ma hataholi la sudi lai bee, ala fee hada-holomata neu Hala Malole ndia, sama leo neu faik fo ei simbok Hala Malole ndia. 2 Ma Hule-haladoi boe fo suek ai makambo'ik mima mana tao naodek kala, ma neme hataholi manggalau fe'ek kala mai, te ta basa hataholi la lamahele Hala Malole ndia.3 Lamatuak to'u nahele Ndia Kokolan. De Ana bisa natetea ei dalem mala, ma nanea ei neme manggalauk mai. 4 Ma ai boe oo mamahele mae, Lamatuak Yesus neu ko fufu'a ei dalem mala boe, losa ei tungga hata fo ai mafadak ndia so. Ma neu ko ei tao tungga makandoon leo ndiak.
5 Ai mamahena Lamatuak Yesus nalangga ei, fo suek ei malelak mae, Manetualain sue ei. Ma ei boe oo malelak mae, ei mabe'i makatataka nai doidosok dale, sama leo makahulun Karistus nakatataka nai doidoson dale.
Basa hataholi la musi tao ues, fo boso mbela-tua
6 Basa tolanoo nggala ei! Au afada memak ei no Lamatuak Yesus Karistus naden bou! Ei boso miu makabubua mia hataholi kamahelek fo mbela-tua la sila. Te tala tungga ai conton neme ai tao ues tingga-tingga. 7 Ei basa nggei bubuluk mae, ei musi tungga natutuduk neme ai sodan mai nai fai makahulun, fo ai bei leo mia ei. Ai ta ngganggali heni fai no sosoa taak. Ei mita aom mala so. 8 Ai tao ues mbilu-mbuse leledo-le'odaen, fo suek boso ai tao mambela ei. Ai boe oo bei ta simbo mitak, hataholi nana'an no belin taa. 9 Ai ia, Lamatuak hataholi mana tao uen. De ai maena haak fo ai moke sudi hata neme ei mai. Tehuu ai ta nau pake haak ndia. Ai ia, nau dadik natutudu malole, fo suek ei tungga. 10 Fain ai la'o ela heti-heuk neu ei so, fo nae, “See tana tao ues, na ta bole na'a.”
11 Ai hambu halak lae, luma leme ei mai, landolok lafeok, ma tala nau tao ues. Kada ala lambue leu seseok hataholi dede'a hehelin. 12 Hataholi mata leo ndiak kala, ai masanenedak kasa no Lamatuak Yesus Karistus naden, fo ala hahae landolok. Malolenak ala mulai tao ues, fo sangga nana'ak no sila mbuse titi hehelin nala.
13 Basa tolanoo nggala ei! Ei boso hahae tao hata fo malole baa!
14 Ei tanda matalolole hataholi fo ta nau tungga hata fo ai sulak nai susulak ia. Makadodook mia sala, fo ela ala mae aon nala. 15 Tehuu boso suli sala sama leo ei musum mala. Manoli-mafada sala no banggana'uk, leo ei tolanoo hehelim mala.
Paulus nate'e susulan
16 Lamatuak ndia, Mane Mole. Au hule fo Ana ba'e fee ei Ndia molen nai basa dede'ak lala'en. Au amahena, Lamatuak sama-sama no ei taa-taa.
17 Dede'a de'e mate'ek ia, au sulak unik au lima heheling, fo suek ei bubuluk mae, susulak ia tebe-tebe neme au mai. Basa susula fe'ek kala, au tao sala leo ndiak boe.a
18 Au hule fo ita Lamatuan Yesus Karistus natudu dale malolen neu ei basa nggei.
Susulak ia losa kada ia,
Paulus