Hataholi manggalauk ana seli musi mai nakahuluk, bei fo Lamatuak Yesus fali main
2
Tolanoo nggala ei! Hatematak ia, ai sangga mafada ei la'e-neu fai hida ita Lamatuan Yesus Karistus sangga mai, boe ma ita takabubua toon.a 2 Boso lofo anak ei nana kedi nalak ma dadik masapangga, mete ma hataholi la lae, Lamatuak fali main so. Mae ala kokolak lae, ala bubuluk leme Manetualain Dulan mai do, ala lamanene leme hataholi mai do, ala hambu susulak leme ai mai, na boso mamahele sala. Te basa sila pepekok! 3 Boso fee hataholi la tao langgonggoa ei. Te hataholi manggalauk esa musi mai nakahuluk, bei fo Lamatuak Yesus fali main. Hataholi ndia, laban tebe-tebe Lamatuak losa hataholi no'uk laban tungga boe. Hataholi ndia, memak sudi selik kana! Huu ndia de ana nandaa maso neni tasi ha'ik neu. 4 Ana tao aon dema lena basa nitu lalais, ma laban basa hata fo hataholi la lakaluku-lakatele neun, losa ana neni Manetualain Uma Ina Huhule-haladoin neu, de ana so'uk aon nae, “Au ia, Manetualain!”b5 Ei bei masaneda, do taa? Fain au afada memak ei la'e-neu hataholi manggalauk ndia so, neu faik fo au bei ua ei, hetu?
6 Hatematak ia, ta hataholi manggalauk ndia, fai natudu aon, huu hambu mana makaleleek. Ma ei boe oo bubuluk hata ndia nakaleen. 7 Hatematak ia malangga dula manggalauk ndia tao naodek no nee-neek, huu bei hambu esa nakaleleen. Tehuu dei fo mana makaleleek ndia, nakambo'ik liman. 8 Boe ma hataholi manggalauk mana tao naodek ndia toda mai, de ana mulai tao uen no ledo-ledo. Tehuu nandaa no Lamatuak Yesus fafali main, Ana tao nakalulutu hataholi manggalauk ndia, nenik kada dede'a de'ek esak.c
9 Tehuu fain fo Lamatuak Yesus bei ta mai, nitu la malanggan fee koasa ina-huuk neu hataholi manggalauk ndia, fo ana bisa tao tanda heran mata-matak kala, losa hataholi la lae hetuk ana pake Manetualain koasan.d 10 No leo ndiak, na hataholi no'uk kala nana kedi nalak leme hataholi manggalauk ndia masapepekon mai. Dei fo sila laelak leme Manetualain mai. Mae Manetualain soi dalak fo nasala'e nala sala, tehuu ala timba heni Ndia maksut malolen ndia, ma tala nau lamahele hata fo tetebes. 11 Huu ndia de Manetualain kena nisa dalen nala neme hata fo ndoos, fo ela lamahele basa masapepekok kala sila. 12 No leo ndiak, de Manetualain fee huhuku belak neu sala, huu ala ta nau lamahele hata fo ndoos. Te kada ala lahiik tao manggalauk.
Hataholi kamahelek kala musi lakatataka tingga-tingga
13 Tolanoo nggala ei! Ai mambue moke makasi taa-taa neu Manetualain, huu Ana sue ei. Neu faik fo Ana bei ta nakadadadik dae-bafok ia, Ana naketun memak kana so fo nasala'e nala ei. Boe ma Ana fee Dulan tao nalalao ei, huu ei mamahele hata fo tetebes. 14 Neu faik fo ai tui Hala Malole neu ei ndia, Manetualain pake Hala Malole ndia, fo noke nala ei, fo suek ei hambu nasalala'ek ma mameda Lamatuak Yesus Karistus nula-nambun.
15 De leo iak, tolanoo nggala ei! Makatataka makandoo, ma to'u matalolole basa hata fo ai mafada ei so. Masanenedak basa hata fo ai sulak kasa so boe.
16-17 Ai hule-haladoi makandoo neu Manetualain, ita Aman, ma neu Yesus Karistus, ita Lamatuan. Ai hule fo Ala tao latetea ei dalem mala, suek ei tao basa dede'a malole la. Ai moke leo ndiak huu ai bubuluk mae, Lamatuak sue nala ita basa nggata ana seli. Huu Ndia dale malolen, de Ana ta hahae tao natetea ita dalen nala. No leo ndiak, de ita tamahena takandondoo henin neu Ndia.