1 Tesalonika
Paulus susula kaesan
fee salanik kala malai kota Tesalonika
Paulus asa haitua soda-molek
1
Soda-molek neme au mai, Paulus, ma au nonoo nggala, Silas ma Timotius.Ai haitua susulak ia fee basa ei salanik kala malai kota Tesalonika. Ei ndia maketu aom, tungga Manetualain, ita Aman, ma tungga Yesus Karistus, ita Lamatuan.
Ai hule fo Manetualain natudu dale malolen neu ei, fo suek ei bisa masoda mia sodak, mole ma ndoo-ndoo.a
Paulus noke makasi, huu hataholi Tesalonika la lamahele lakandoo
2 Ai moke makasi taa-taa neu Manetualain, huu ei namahehelem. Leledo-le'odaen ai hule-haladoi fee ei basa nggei. 3 Ai masaneda taa-taa neu ues fo ei taok ndia, huu ei mamahele neu Lamatuak, ma suen. Ei mahele makandoo tao ues sila, huu ei mamahena neu Lamatuak Yesus Karistus. Ai mini taa-taa basa dede'ak kala sila, neni ita Aman Manetualain matan neu.
4 Tolanoo nggala ei! Ai bubuluk Manetualain sue ei, ma hele nala ei dadik miu Ndia bobonggin nala. 5 Fai maneuk kala, ledo-eik ai mini Tesalonika neti, ai tui-bengga ei la'e-neu Manetualain Hala Malolen. Faik ndia, ei pasa ndi'i dook fo mamanene neulalau ai kokolan. Ta kada ei mamanene, tehuu ei boe oo mita matam Manetualain koasan neme Ndia Dula-dale Malalaon mai. De ndia tao nala ei mamahele tebe-tebe Manetualain Hala Malolen. Faik ndia, ei mita matam ai nanggatutuu-nambadedein, ma ai tao talo bee, fo suek ei bubuluk tebe-tebe Manetualain dalan. 6 Huu ei maketu malan tungga Manetualain hihiin, de ei masoda tungga ai conto dala sodan, ma masoda tungga Lamatuak Yesus conto dala sodan. Tehuu ledo-eik ei simbok mala Hala Malole ndia, hambu hataholi luma lakatoto'ak ei. Mae leo ndiak boe oo, ei ta matanggongga faa boe, huu Dula-dale Malalaok tao namahoko ei dalem mala.b
7 No dalak ndia, ei matudu dalak neu basa hataholi kamahelek kala malai propensi Makedonia, ma propensi Akaya. 8 Ma ta kada nai ele. Te Manetualain Hala Malolen boe oo, natanggelak so neme ei malai Tesalonika ndia losa sudi bee neu. De ai bei nau kokolak hata bali, te basa hataholi la lamanene ei namahehelem mala neu Manetualain so. 9 Sudi nai bee hataholi la tui-bengga lae, fai maneuk kala ei malengga dalem mala, de simbok ai no malole. Boe ma ei nggali heni sosonggom mala, de miu tungga seluk Manetualain fo Kasodak ma Ndoos. 10 Sila tui-bengga boe lae, ei mahani Manetualain Anan Yesus neme nusa sodak mai. Fai maneuk kala hataholi la tao lisan, tehuu Manetualain tao nasoda falik kana. Ledo-eik Manetualain sangga huku hataholi la, na, dei fo Lamatuak Yesus nakambo'ik ita teme Manetualain nasan mai.