Mahehele fo simbok Lamatuak mamain
5
Naa, tolanoo nggala ei! Ai ta paluu sulak mafada mae, Lamatuak mamain ndia, la'e-neu li'u hida do, bulak fain hida, 2 huu ei basa nggei bubuluk Ndia mamain ndia, kada kaiboik, sama leo na'o mamain nai le'odaek.a 3 Hataholi no'uk langgatuuk ndoo-ndoo, uda-ani taa, kada kaiboik ala hambu soe. Ma Ndia mamain ndia sama leo ina kailus, te kada kaiboik nameda bonggi. Neu faik fo basa ia la dadi so, na, ita ta bisa timba henin bali. Lamatuak fafali main leo ndiak boe.4-6 Tolanoo nggala ei! Boso losak Ndia mamain ndia sa'e la'e ei, sama leo na'o mai nai fatiladak, nandaa no ei sunggu mamanee. Boso leo ndiak! Ita ta tasoda nai makiuk dale bali, sama leo hataholi fe'ek fo mana sunggu kamaneek kala. Te ita kamahelek kala neu Yesus tasoda nai manggaledok dale so, de tahani fo simbok kana ma tanea neulalau ita sodan nala. Basa dede'ak kala ia, ei bubuluk kasa so! 7 Hataholi sunggu nai le'odaek, ma hataholi mafuk nai le'odaek boe. 8 Ei boso tao leo ndiak, te ita ia tasoda nai manggaledok dalek so. Ei musi manea neulalau ei sodam mala. Mete ma ei mamahele makandoo neu Lamatuak, ma masue ao, na, sama leo soldadu mana pake babaa kalak. Ma mete ma ei mamahena makandoo neu Lamatuak Yesus, fo mana makambo'ik ei mima Manetualain nasan mai, na, sama leo soldadu mana lalaa langgan nenik solangga besik.b
9 Manetualain ta hele nala ita, fo hambu Ndia huhukun. Te Ana hele nala ita fo hambu nasalala'ek, huu ita tamahele teu Yesus Karistus, fo naena haak palenda ita. 10 Ana mate nggati ita so. De neu faik fo Ana fali main, na ita tasoda takandoo to Ndia, mae ita mate so do, bei tasoda.c 11 Huu ndia de pake au dede'a-kokolang ia, fo kokoe-nanasi, ma esa natetea esa, sama leo ei tataon neme makahulun mai ndia so.
Paulus fee nanonolik neu salanik kala malai Tesalonika
12 Basa tolanoo nggala ei! Fee hada-holomata neu ina-ama malangga nggalei la. Sila ndia tao ues mbilu-mbuse fee ei. Sila ndia fee nasanenedak neu ei, suek boso tuda. 13 Tia-toba sala minik ei susuem mala, huu sila tao ues tingga-tingga soa-neu ei. Masoda mole-dame esa no esa.
14 Tolanoo nggala ei! Ai sangga fee nasanenedak dede'ak luma bali leo iak: mafada mbela-tua la fo tao ues tebe-tebe. Matetea mana ma'a-malek kala dalen nala. Masala'e mala hataholi kadi'i anak kala. Ma nggale loak mia basa hataholi la.
15 Boso bala manggalauk no manggalauk. Tehuu masusua fo tao kada tatao neulauk taa-taa neu basa hataholi la. Boso tao malole neu kada ita hataholi hehelin nala, tehuu hataholi fe'ek boe.
16 Tao ei dalem namahoko nakandoo. 17 Hule-haladoi leledo-le'odaen. 18 Mae susa do, namahokok, na moke makasi neu Manetualain. Te Manetualain nahiik basa hataholi la fo mana tungga Yesus Karistus leo ndiak boe.
19 Boso makalelee Manetualain Dulan uen. 20 Mete ma tolanook esa nae, ana simbo heheluk neme Manetualain mai, na, boso makadadaek ndia kokolan! 21 Te ei musi palisak neulalau kokolan ndia, suek bubuluk mae dede'ak ndia huun tebe-tebe neme Manetualain mai do taa. Mete ma tetebes, na tunggan leo. 22 Ma heok mima basa dede'a manggalauk kala sila mai.
Paulus nate'e susulan
23-24 Au hule-haladoi oke Manetualain tao nalalao ei dalem mala, ma basa ei sodam mala. Ndia ndia, tao ita bisa mole-dame esa to esa. No leo ndiak, na neu faik fo ita Lamatuan Yesus Karistus fali main, ei bisa mambadeik miu Ndia matan, no ei ao-inam mala malalaok, ma dalem mala malalaok, ta no sala-singgok esa boe. Tetebes! Lamatuak Yesus noke nala ei dadik miu Ndia hataholin nala. Ana helu nuni ei no malalaok mini Manetualain matan miu. Ma dei fo Ana tao natetu, hata fo Ana kokolak ia.
25 Tolanoo nggala ei! Boso lilii hule-haladoi fee ai nai ia.
26 Au oke fo ei haitua soda-molek neu basa Manetualain salanin nala malai ndia.
27 Au oke unik Lamatuak Yesus naden, fo ei lees au susulang ia neu basa salanik kala.
28 Au hule neu ita Lamatuan Yesus Karistus, fo natudu dale malolen neu ei basa nggei.
Kada leo ndiak.
Soda-molek,
Paulus