Dala sodak fo maneni namahokok neu Manetualain dalen
4
De leo iak, tolanoo nggala ei! Ai kokoe ei, suek ei sodam mala tao mamahoko Manetualain dalen, sama leo hata fo ai manoli ei so. Memak ei sodam mala tungga basa sila so. Tehuu huu ita dadik teu Lamatuak Yesus bobonggin nala so, de ai moke fo ei boe masusua tao tingga-tingga bali. 2 Ei basa nggei bubuluk so, hata fo ai manoli ei ndia, pake Lamatuak Yesus palendan. 3 Manetualain hihiin leo iak: masoda no malalaok! Boso masoda no manggenggeok, de boso masala mua see fo ta o saom. 4 Ei musi heti malelak ei ao-inam mala fo masoda no malalaok, suek hataholi la fee ei hada-holomata.a 5 Boso tungga ao-mbaak hihiin, sama leo hataholi fo ta mana malelak Manetualain. 6 Boso sangga nanalak do masala mia hataholi fo sama-sama mamahele neu Manetualain. Te Manetualain ndia, Lamatuak fo dei fo Ana bala basa manggalauk leo ndiak kala. Basa ia la, ai mafada ei bali-bali, ma fee nasanenedak memak neme makahulun mai so. 7 Te Manetualain noke nala ita so, fo dadik neu Ndia hataholin nala. Ndia maksut, na ita musi tasoda to malalaok, ma ta manggenggeok, sama leo mana hohonggek kala. Ta leo ndiak! 8 Huu ndia de see ta tungga nanonolik ia, na ana ta kada timba heni ai, te ana timba heni Manetualain boe, huu Ndia ndia fee Dula-dale Malalaon neu ei so.9 Au ameda ta sulak seluk bali fee ei la'e-neu masue ao tolanook no tolanook, na huu Manetualain fee nanonolik so nae, ei musi masue ao esa no esa. 10 Ai mamanene so lae, ei sue basa tolanook kala malai propensi Makedonia ndia. Tehuu tolanoo nggala ei! Hatematak ia, ai moke fo ei sue hataholi fe'ek kala lena bali. 11 Masusua fo ei bisa masoda ndoo-ndoo. Boso miu seseok mia hataholi fe'ek dede'a hehelin, te kada esa-esak nakaneni ndia dede'a hehelin. Ei musi tao ues fo sangga nana'a-nininuk minik ei lima hehelim mala. Boso mamahena hataholi fe'ek. Ai fee memak nasanenedak ia neu ei neme makahulun mai so. 12 Mete ma ei masoda leo ndiak, na, ei ta tao mamabela hataholi fe'ek. Mete ma hataholi fe'ek fo ta mana mamahele neu Karistus lita ei soda mala leo ndiak, na, neu ko ala lae, “Wei! Memak hataholi fo mana tungga Lamatuak Yesus, ala lasoda tungga ndoon tebe maa!”
La'e-neu Lamatuak Yesus fafali main
13 Tolanoo nggala ei! Hatematak ia au sangga afada dede'ak esa, suek ei bubuluk tebe-tebe la'e-neu hataholi mana matek kala. Ita bubuluk tae, hataholi mana matek kala, neu ko ala lasoda fali. De mete ma Lamatuak hataholin luma mate sala, na, ei boso dale hedi, sama leo hataholi ta mana bubuluk dede'ak ia. 14 Ita bubuluk tae, Yesus mate, boe ma Manetualain tao nasoda falik kana. Naa! Mete ma leo ndiak, na, Manetualain boe oo tao nasoda falik basa hataholi kamahele mana matek kala. Ma Ana nakabubua nala basa sala sama-sama lo Lamatuak Yesus.
15-17 Neu Lamatuak Yesus fafali main, Ana konda neme nusa sodak neni dae-bafok mai, na dei fo hambu hala malii fee palenda. Basa ndia, na Manetualain ata nusa sodan nala malanggan fee palenda fo ala fuu to'ik. Boe ma Lamatuak hataholin mana matek kala lasoda fali. Bei fo sila lo ita bei kasoda kamahelek kala, nana so'uk neni ko'as teu, fo sama-sama teu soluk Lamatuak Yesus mamain. Basa ndia, na ita basa nggata tasoda takandoo to Ndia.b