Paulus naketun nadenu Timotius neni kota Tesalonika neu
3
1-2 Sadi ei bubuluk, neu faik fo ai la'o ela ei, na ai hihiin ta ndia. Basa ndia, na ai mahiik miu tilo ei, te ta bisa. Doo-doo boe ma ai ta makatataka mala dook so, huu ndia de ai maketu malan fo madenu Timotius neti. Tehuu au ma Silas kada mahani nai kota Atena. Timotius ndia, na ai tolanoon ma ai nonoo tao uen, fo ai eik esa sama-sama makalala'ok Yesus Karistus Hala Malolen. Ai madenun neti nanoli ei, ma tao natetea ei dalem mala, suek ei namahehelem mala boe tamba natea neu Manetualain.a 3 No leo ndiak, na mete ma hambu toto'ak boe oo, ei ta matanggongga boe. To'u mahele ei namahehelem mala. Te ei bubuluk mae, hataholi fo namahele neu Karistus, neu ko hambu toto'ak leo ndiak. 4 Makahulun ai bei sama-sama mia ei, ai masanenedak ei so mae, hataholi fo mana namahele neu Lamatuak Yesus, neu ko hambu toto'ak mata-matak kala. Hatematak ia basan dadi leo ndiak so, hetu!5 Huu au dale hedi alan seli soa-neu ei nanggatutuu-nambadedeim mala, de au adenu Timotius neni Tesalonika neti, suek ai bisa bubuluk, ei bei mamahele makandoo neu Lamatuak, do taa. Te au bii, boso losak nitu la malanggan neti fufudi nala ei so, fo ei heok masadea la'o ela Lamatuak. Mete ma ana dadi leo ndiak, na, ai mbuse titi makahulun, titi neu dae no sosoan taa!
Timotius fali so, de neni halak neme salanik kala malai kota Tesalonika mai
6 Hatematak ia, Timotius fali neme Tesalonika mai so, ma neni halak, fo tao nala ai mamahoko. Ana tui nae, ei mamahele makandoo neu Karistus, ma ei masue ao esa no esa makandondoo henin. Boe ma ana tui nae, ei boe oo dokodoe ai taa-taa, de mahiik matonggo mia ai, sama leo ai boe, fo mahiik matonggo mia ei.b
7-8 Tolanoo nggala ei! Mae ai nai ia mameda belak, huu hambu toto'ak makadotok sudi neme bee mai, tehuu Timotius tutuin ndia tao nala ai mamahoko malan seli. Huu hatematak ia ai bubuluk so mae, ei namahehelem mala matea neu Lamatuak nakandondoo henin.
Paulus hule-haladoi fee salanik kala malai kota Tesalonika
9 De ai moke makasi no'un seli neu Manetualain no dale namahokok, huu ei tungga mahelen. 10 Leledo-le'odaen, ai hule-haladoi taa-taa, fo mete ma bisa, na, ai bei bisa matonggo mia ei bali. Ai nau fee nanonolik fo tao matetu ei la'e-neu Manetualain dala sodan.
11 Ai mamahena neu Manetualain, ita Aman, ma Yesus Karistus, ita Lamatuan, fo soi dalak losa ai bisa miu matonggo mia ei bali. 12 Ai hule neu Manetualain, fo Ana tao ei esa sue esa lena-lenak bali. Ma ei boe oo sue basa hataholi la, sama leo ai sue ei boe. 13 No leo ndiak, na Manetualain natetea ei dalem mala, fo masoda no ndoos ma dale malalaok, losa faik fo Lamatuak Yesus fali main no hataholin nala, na, ei mambadeik nai ita Aman Manetualain matan, ta lemba salak hata esa boe.