Paulus nasaneda uen manai Tesalonika
2
Tolanoo nggala ei! Ei basa nggei bubuluk, neu faik fo ai neti makalala'ok Manetualain uen nai Tesalonika ndia, ai mbusen ta titi neu dae no sosoa taak. 2 Ei boe oo masaneda neu faik fo ai bei ta mini Tesalonika miu ndia, te hataholi malai kota Filipi, lakatoto'ak ma tao doidoso ai so. Tehuu Manetualain natetea ai dalen nala, de ai mambalani tui-bengga Ndia Hala Malolen neu ei, mae hataholi no'uk kala tala nau lo ai.a 3 Faik ndia, ai mini Hala Malole neu ei nai Tesalonika, te ai ta mini nanonoli pepekok. Ai ta neti tao manggonggoa do, mapuputak ei.4 Taa! Makahulun ai neti mia dale ndoos. Manetualain mesak kana nadenu ai mini Hala Malole ndia neu ei. Ai ta sangga tao mamahoko hataholi, tehuu tao mamahoko Manetualain, huu Ndia ndia uku-sudi ai dalen nala nae, ndoos do, pepekok.
5 Ei bubuluk mae, ai ta masapepeko, nakalenak bali ta sangga nanalak sen esa dua, neme ei mai. Manetualain bubuluk ai dalen nala boe. 6 Ai makalala'ok ues ia, ta sangga kokoak neme hataholi dae-bafok mai, mae neme ei mai do, neme hataholi fe'ek mai. 7 Ai ia, Karistus nadedenun nala. De ai maena haak fo tao ai aon nala leo hataholi ina-huuk kala, te ai ta nau soso'u ai aon nala leo ndiak. Faik ndia, ai tao ai aon nala sama leo kakana anak kala, neu ei laladam mala.b Ai boe oo matudu susuek neu ei, sama leo ina bonggik ko'o-ifa anan boe. 8 Ai ta kada neti tui-bengga Hala Malole neu ei, te ai fee ai ao katematuan nala boe, huu ai sue mala ei seli.
9 Tolanoo nggala ei! Neu ko ei bei masaneda, ai tao ues mbilu-mbuse leledo-le'odaen, fo suek ai sangga aon ai nana'a-nininu hehelin nala. Neu faik fo ai mini Hala Malole neu ei, ai ta nau tao masambute ei. 10 Neu faik fo ai sama-sama mia basa ei kamahelek kala malai ndia, ai masoda no dale malalaok, masoda tungga kada ndoon, ma ta tao salak hata esa boe. Ei basa nggei mita matam, ma Manetualain nita leo ndiak boe. 11 Ei bubuluk mae, ai makaneni ei basa nggei, sama leo ama bonggik nakaneni anan nala. 12 Matak leo ai matetea ei basa nggei dalem mala, tao nasanenedak ei, ma kokoe ei suek masoda tungga Manetualain hihiin, fo tao mamahoko Manetualain dalen. Te Ndia ndia dadik Manek, de noke nala ei so, suek dadik neu Ndia bobonggin nala, ma hambu hada-holomata no'u mia Ndia boe.
Manetualain naue nai ei dalem mala
13 Ai ta hahae moke makasi neu Manetualain, huu neu faik fo ei mamanene Hala Malole neme ai mai, te ei ta simbok hataholi dae-bafok dede'a-kokolan, tehuu Manetualain Dede'a-kokolan. Ndia mesak kana naue nai ei kamahelek kala dalem mala.
14 Tolanoo nggala ei! Ei bei fo mulai tungga Manetualain dalan, te ei nusa isim mala lakatoto'ak ei so. No dalak ndia, ei mia hataholi la fo lamahele neu Yesus Karistus malai propensi Yudea, sama-sama mameda mita toto'ak, te sila hambu toto'ak neme sila hataholi Yahudin nala mai boe.c
15 Hataholi Yahudi luma tala mbali Manetualain hihiin. Huu ndia de neu faik fo Manetualain nadenu mana kokolan nala leni sila leu, boe ma ala tao doidoso sala ma tao lisa sala. Leo ndiak boe, ala tao lisa Lamatuak Yesus. Hatematak ia ala lasanggak dalak fo timba heni ai taa-taa boe. Ala musu lo basa hataholi la, de Manetualain ta hii sala.d 16 Ala lakalelee mata-matak kala, suek ai ta bole mini Manetualain Hala Malolen neu hataholi nusa fe'ek kala bali. Hataholi Yahudi la sila ta nau Manetualain nasala'e nala hataholi fe'ek kala. No dalak ndia, ala boe tao tamba sila salan nala makadotok. Huu ndia de Manetualain luli, de Ana huku sala.
Paulus nahiik natonggo seluk no salanik kala malai Tesalonika
17 Tolanoo nggala ei! Mae hatematak ia no nakasetik ita basa nggata leo takadodook, tehuu kada dook tungga mata susulik, te ta dook nai dalek. Ai mambue sangga dalak, fo mete ma bisa, na, ai miu tilo seluk ei bali, huu ai dalen dokodoe nalan seli nau matonggo mia ei. 18 La'i no'uk au sangga uu tilo ei, te nitu la malanggan nambue nakalelee au dalang nakandondoo henin. 19 Ei bubuluk, hatina de ai sangga miu tilo ei? Ndia, huu ai mamahena ei. Ei ndia tao mamahoko ma tao ina-huu ai dalen nala. Te see bali fo to'u nahele Lamatuak Yesus naden, mete ma ei taa! Neu faik fo Lamatuak fali main, na ai bisa botik langgak huu ei. 20 Memak tetebes! Ei ndia tao mala ai dalen nala latea ma lamahoko.