2 Ei musi manggate hule-haladoi makandoo. Ma musi mamedak la'e-neu dede'ak kala fo ei kokolak mia Manetualain, ma hule-haladoi minik dale henuk no namemeda makasi. 3 Boso lilii hule-haladoi fee ai ma moke Manetualain soi dalak, fo ita bisa tafada hataholi dede'ak kala, fo makahulun ele nana nafunik la'e-neu Karistus. Masanenedak, au maso bui ia, huu au afada hataholi la'e-neu Karistus. 4 Hule-haladoi fo au bisa tui-bengga Hala Malole ndia no manggaledok, suek hataholi bisa lalelak neulalau.

5 Masoda neulalau nai hataholi fo bei ta namahele neu Karistus laladan. Pake neulalau tungga-tungga lelak fo Lamatuak fee ei.^b 6 Mete ma ei kokolak, na, kokolak no banggana'uk fo hataholi dalen namahoko. Boso kokolak tao ala mbela lamanene ei. Pake dede'a ndoos, fo ei bisa mataa masafali no malole, mete ma hambu hataholi natane ei.

7 Dei fo Tikikus sangga mai tui ei la'e-neu au nanggatutuu-nambadedeing. Ndia ndia, tolanook fo ai suen, fo ana ono-lau Lamatuak hataholin nala no dale katemak. Makahulun, ana nakalala'ok Lamatuak uen sama-sama no au boe.^c 8 Au adenu ndia leo ndiak, fo ana bisa neu tao natetea ei dalem, ma bisa tui ei, la'e-neu ai nai ia.^d 9 Au adenu falik Onesimus fo tungga no ndia boe. Onesimus ndia, na tolanook dale katemak fo ita suen. Ndia ndia, ei hataholi hehelim. Dua sala dei fo tui ei, basa dede'ak kala fo mana dadik lai ia so.^e

10 Aristarkus fee soda-molek neu ei. Ala kena no'u ndia no au nai bui. Barnabas tolanoon manade Markus, fee soda-molek boe. Makahulun au helu memak ei so ae, mete ma Markus mai tilo ei, na, simbok neulalaun.^f 11 Yesus, (fo tateme toke tae, “Yustus”) fee soda-molek neu ei boe. Neme basa ita nonoon nala fo takalala'ok no'u Manetualain uen, kada sila telu sala hataholi salanik, neme nusak Yahudi mai. Sila ia, latetea au daleng.

12 Ei nonoom Epafras nai ia, ma ana fee soda-molek neu ei boe. Ndia dadik Yesus Karistus atan. Ana hule-haladoi neni tean fee ei, ma noke fo Manetualain tao natea ei, tao namadai ei, ma tao ei bubuluk tebe-tebe Ndia hihiin.^g 13 Au afada memak ei ae, Epafras ndia tao ues mbilu-mbuse fee ei so, ma fee hataholi Salanik kala malai kota Laodikia ma kota Herapolis.

14 Hambu soda-molek neme Demas ma neme dotel Lukas mai, fo ita suen.^h

15 Au fee soda-molek neu tolanoo kamahelek kala malai kota Laodikia. Boso lilii fee au soda-moleng neu Ina Nimfa ma hataholi kamahelek kala fo lateme lakabubua lai ndia uman.

16 Mete ma ei basa nggei manai Kolose lees basa susulak ia so, na dei fo haitua makandoon neu hataholi kamahelek kala manai kota Laodikia, fo sila bisa lees boe. Ma ei boe oo musi lees susulak fo au haitua itak neu sala.

17 Fee nasanenedak neu Arkipus mae, “O boso lilii makalala'ok mabasa ues fo o simbon neme Lamatuak mai.”ⁱ

18 Boso lilii mae, ala bei kena au nai bui ia dalek.

Au oke fo Manetualain natudu Ndia dale malolen neu ei.

Mete leo, huu susulak ia, au lima leen unik au lima heheling.