3
Manetualain fee ei soda beuk so, sama leo Ana tao ei masoda fali no'u mia Karistus. Hatematak ia Karistus nanggatuuk nai mamana nana hadak nai Manetualain boboa konan. Huu ndia de, ei musi dudu'a dede'ak kala, fo mana tao namahoko Manetualain dalen.a 2 Dudu'a makandoo la'e-neu dede'ak kala fo Manetualain hiin. Boso mbali dede'ak kala fo kada tao namahoko hataholi dalen. 3 Huu ei mate tungga boe, neu faik fo Karistus maten. De ei soda beum ndia, ndoo-ndoo, huu nana mba'ak no Karistus so, fo sama-sama no Manetualain nai nusa sodak. 4 Karistus nasoda nai ei dalem, ma Ndia boe oo, tao nala ei masoda ndoos. Dei fo neu faik fo Ana fali main, na ei sadu no'u mia Ndia boe. Basa sila, ana seli!Soda mata-ao laak, ma soda mata-ao beuk
5 Huu ndia de, ei musi nggali heni ei hihii tao manggalaum mala. Conto leo: mahiik tao maeok no hataholi fo ta o saom; mahiik tao dede'a manggenggeok kala; mahiik tao tungga o ao-mbaa nasuun; mahiik tao dede'a manggalauk mata-matak; ma mana masetik, fo kada o nau basan dadik neu o enam (naa te ndia sama leo o songgo, huu o so'u dema-demak dede'a fe'ek, fo seti heni Manetualain). 6 Dede'ak kala sila tao lala Manetualain luli nalan seli, losa Ana nau fee huhukuk neu basa hataholi, fo tala nau lamanene Ndia. 7 Makahulun, ei masoda leo ndiak boe, huu ei dalem nana mba'ak no dede'a manggalauk kala sila.
8 Tehuu hatematak ia, ei musi nggali heni ei namemeda mahiik tao basa manggalauk. Conto leo: mahiik luli; dale matobik; mambeda dalek; kokolak tao maboboo hataholi nade malolen; ma bafa manggenggeok. 9-10 Ma ei masapepeko esa no esa. Huu ei nggali heni ei dalem fo mahiik tao manggalauk, ma la'o ela ei dala soda laam so.b
Ma hatematak ia, ei nggati henin so, fo pake dale beuk. Ndia sama leo hataholi nggali heni balo'a laan fo manggenggeok kala, fo pake balo'a beuk fo malalaok. Manetualain ndia nakadadadik nala ei. Ma hatematak ia, Ana tao ei boe malelak Ndia, ma doo-doo te, tao ei dadik mata-aok esa leo Ndia.c 11 Nai soda beuk dalek ia, ita ta mete hataholi neme sila lou dean mai tae, sila ndia hataholi Yahudi do; hataholi ta Yahudi do; hataholi mana sunat do; hataholi ta mana sunat do; hataholi nusa dea do; hataholi hada taak;d ata do; ta ata. Ndia ta penting! Tehuu penting ndia, mete ma sila nana mba'ak no Karistus, ma mete ma Ndia nasoda nai sila dalen.
12 Manetualain hele nala ei so, huu Ana sue ei. Ndia maksut, fo ei dadik Ndia hataholi malalaon, suek fe'e neme hataholi basa faik mai. Huu ndia de, ei musi dadik hataholi dale malole, dale neulauk, dale taidaek, dale banggana'uk, ma nggale loak. 13 Ei musi nggale loak ma malelak esa no esa. Mete ma neme ei mai, hambu mana sangga dede'ak no ndia nonoon, na, boso mambeda dalek. Tehuu ei musi lilii heni salak ndia ma fee ambon neu ndia, sama leo Manetualain lilii heni ei salam so.e 14 Masanenedak huu susuek ndia, penting lena basan. De ei musi pake susuek nai ei dalem, sama leo hataholi pake balo'as nai ndia aon. Huu susuek ndia, sama leo abas, fo ita tenun dadik temak fo lolen seli. Ndia nana mba'ak no ita fo dadik teu esa.
15 Ita bisa mole to Manetualain, huu Karistus. De ei musi fee Karistus molen ndia heti ei dalem boe. Manetualain nau fo ei basa nggei masoda mole esa no esa, huu ei basa nggei nana mba'ak dadik neu ao-inak esa. Ma ei dalem musi nameda makasi nakandoo, huu Ndia mesak kana hele nala ei so.
16 Karistus Dede'a-kokolan nala musi heti ei dalem, ma ei sodam boe. Dede'a-kokolak kala sila, sama leo hata mabeli fo Ana feen neu ei. Ala latudu dalak fo ei bisa bubuluk dede'ak no'uk, tungga Manetualain dudu'an. De ei bisa pake sala, fo manoli ma tao masanenedak ei esa no esa. Mete ma manoli ei hataholim mala, na, boso manoli no hala belak, tehuu pake dale malole fo henuk no namemeda makasi. Pake koa-kiok neme Manetualain Susula Malalaon, koa-kiok neme Dula-dale Malalaok, ma koa-kiok fo ei dula aom, fo souk koa-kiok neu Manetualain. 17 Ei ia, dadik Yesus Karistus nadedenun so. De masanenedak, huu basa ei kokolam ndia, pake Ndia naden. Ma basa ei taok, pake Ndia naden boe. Boe ma boso lilii tao basa-basan, pake ei Lamatuam Yesus Karistus naden. Ma moke makasi makandoo neu Ndia Aman Manetualain.f
Hataholi salanik kala musi lasoda talo bee, esa no esa?
18 Sao inak kala ei! Ei musi mamanene ei saom, huu ndia nandaa neu hataholi fo mana tungga Yesus Karistus.g
19 Sao touk kala ei! Ei musi sue ei saom, ma boso tuni-ndeni ndia, fo tao dalen hedis.h
20 Kakanak kala ei! Ei musi mamanene ei ina-amam mala nai basa dede'ak lala'en, huu ndia tao namahoko Manetualain dalen.i
21 Ina-ama la ei! Boso mambue makanete ma tao belak neu kakanak kala, fo boso dalen nala kulan ma lambeda dalek neu ei.j
22 Hataholi mana tao ues! Nai dae-bafok ia, ei musi tao tungga ei malanggam nai basa dede'ak lala'en. Boso kada sangga matak neu ledo-eik ala memetek ei. Tehuu masusua fo tao mamahoko sala taa-taa. Tao basa dede'ak kala no ndoos, huu ei bubuluk mae, Manetualain memetek ei. 23-24 Ei tao sudi hata, na tao ues no teteben ma mana boi-boik. Ei musi tao ues sama leo ei tao ues fee ei Lamatuam Yesus Karistus, tehuu ta fee hataholi. Huu ei ono-lau Ndia. Ma dei fo Ana fee ei nggadi ma pusaka. 25 Tehuu mete ma ei tao ues ta no ndoon, dei fo Ana huku ei. Huu Ndia ndia, ndoos ma ta mana mete matak.k