2
Ei mana leo nai kota Kolose, sila mana leo lai kota Laodikia, ma sila fo bei ta latonggo litak lo au. Mamanene neulalau! Au nau fo basan bubuluk au tao ues tingga-tingga fee ei ma fee sila. 2 Au maksut tao atea sila basa sala dalen, fo sila boe bisa nana mba'ak dadik esa, huu sila lasoda lasue ao. Boe ma ala lamahele, huu sila bubuluk tebe-tebe Manetualain maksut, fo makahulun nana nafunik. Nana nafunik ndia, na ndia Karistus! 3 Mete ma ei nana mba'ak dadik dalek esa mia Karistus, bei fo Ana fee basa dudu'ak fo ei paluu, ma nanoli ei pake dudu'ak fo tao dede'a malole. Dudu'ak kala ia, sama leo hata pusaka mabeli.4 Au afada ei basa dede'ak kala ia, fo suek boso hambu hataholi mai pepeko nala ei, no bafa mamina. 5 Memak au dook ua ei. Mae leo ndiak, tehuu au ta lilii heni ei, huu au daleng nana mba'ak no ei. Ma au amahoko, huu au bubuluk ei masoda no mandaan, ma ei bei to'u tea-tea ei namahehelem neu Karistus.
Ita fo nana mba'ak to Karistus, hambu sodak tetebes
6 Huu makahulun ei simbo Yesus Karistus dadik ei Lamatuam so, de hatematak ia, ei musi mamanene makandoo neu Ndia. Huu Ndia ndia bei dadik ei Lamatuam fo naena haak palenda ei. 7 Mete ma ei masoda nana mba'ak no Ndia leo ndiak, na, ei sama leo ai huuk fo tamba natea, huu ndia okan tola losa dook neni dae dale neu. Ma ei sama leo uma matea, huu nana nambadedeik nai fanderen matea lain. Ei matea makandoo nai ei namahehelem, sama leo ei manoli mitak so. Suek ei dalem henuk no makasi, huu basa dede'ak fo Manetualain tao fee ei so.
8 Mata neuk, suek ei boso tungga hataholi fe'ek fo pake hataholi dudu'an, fo noo ei heok mima dala ndoos mai. Ma boso tungga hataholi nanonoli malelan fo ta no netes. Huu sila nanonolin ndia, kada neme hataholi dudu'an, ma neme dae-bafok heti-heun nala mai. Tehuu nanonolik kala sila, ta laoka nai Karistus dalek.
9 Basa hata fo manai Manetualain ao-inan, ndia boe oo nai Karistus ao-inan dale. Ma Karistus dadik hataholi sama leo ita boe. 10 Huu ei nana mba'ak mia Karistus, ma dadik neu Ndia hataholin, de Ana tao ei dadik mana daik. Huu Ndia koasan lena heni basa koasa ma basa mana to'u palenda, mae malole do manggalauk.
11 Neu faik fo sunat, hataholi Yahudi la kee heni ‘mamaen’ lou mbedan, fo dadik neu tanda nae, sila ndia, Manetualain hataholin. Neu faik fo ei maso dadik Karistus hataholin, ei boe oo hambu ‘sunat’. Ndia maksut leo iak: sunat ia, na ta la'e-neu hataholi kee heni ao-inak loun, tehuu la'e-neu Karistus kee heni dede'a manggalauk neme ita dalen mai. Fo ndia, dede'a manggalauk fo ita hii taon, huu ita ia, hataholi.
12 Neu faik fo ala salani ei lenik oe, ndia sama leo ei nana natoik no'u mia Karistus. Boe ma ei hambu soda beuk boe, sama leo Ndia hambu soda beuk boe. Ei hambu leo ndiak, huu ei mamahele mae, Manetualain pake Ndia koasan ana seli, fo tao nasoda falik Yesus Karistus, neme Ndia mamaten mai. Ndia boe oo, pake koasa ndia fo tao ues nai ei dalem.a
13 Makahulun, ei sama leo mana matek so, huu ei maena sala-singgok mata-matak, ma ei bei ta maso dadik Manetualain hataholin. Mae leo ndiak, tehuu Ana koka heni basa ei sala-singgom mala, ma fee soda beuk neu ei, sama leo Ana tao nasoda falik Karistus.b 14 Teteben, na ita musi hambu huhukuk, huu ita la'o lena Manetualain heti-heun nala so. Tehuu Ana koka heni ita huhukun nala so, neu faik fo ala mbaku Karistus nai ai ngganggek lain.c d 15 Nai ndia, Ana senggi koasa makiuk kala, ma basa mana palenda no manggalauk. Boe ma Ana nakamamaek kasa nai hataholi no'uk matan. Ndia sama leo soldadu mana senggi natatik, fo fali de la'ok lafeok latudu sila musun fo nana senggik kala sila so.
16 Mete ma hataholi sangga tao natuda ei la'e-neu anggama Yahudi heti-heun nenik nana'a-nininuk, na, boso mbali sala. Ma mete ma hataholi sangga tao dede'ak no ei, la'e-neu fai-fai malole do, feta bula beuk do, heti-heu fai hahae tao ues, na, boso mamanene sala.e 17 Dede'a mata leo silak kala, ta penting! Huu dede'ak kala sila kada sama leo salaok kala, fo dei fo mopo heni sala. Tehuu Karistus ndia, na isi-isik. Ndia ndia, leo nakandoo.
18 Mete ma hataholi sangga tao natuda ei, huu ei ta tungga heti-heuk fo sila mesak kasa taon, na, boso mamanene sala. Te mete ma ei mamanene sala, na, ei ta bisa simbok dede'a malole la, fo Manetualain nau fee ei. Tehuu mata neuk baa! Huu memak hambu hataholi mana nahiik sangga dalak fo tao natuda ei. Ala nau fo ei musi tao makadadaek ei ao-inam, ma songgo Manetualain atan nala lai nusa sodak, huu ala lae hetuk hambu me'is fo natudu sala leo ndiak. Ala taok sila ao-inan malolen lena heni hataholi fe'ek kala. Naa te ta leo ndiak! Huu sila dudu'an nala kada sama leo hataholi basa faik. 19 Sila ta nana mba'ak no Karistus. Naa te Ndia ndia Malanggan. Ma Ndia hataholin nala, sama leo Ndia aon fo Ana hetin. Ana tao hataholin nala boe latea, pake Manetualain koasan. No leo ndiak, ala dadik sama leo uak ma duik fo nana mba'ak matea fo ala latulu-falik esa no esa, losa ao katemak bisa tao ues no malole.f
Mete ma ita nana mba'ak to Karistus, ita hambu soda beuk
20 Ei mate no'u mia Karistus so. De ei ta nana mba'ak mia koasa makiuk kala so nai dae-bafok ia. Hatina de, ei bei tungga makandoo dae-bafok heti-heun mata-matak kala? Ala lae leo iak: 21 “Boso to'u ia; boso mi'a ndia; boso mafaloe ia.” 22 Tehuu heti-heuk kala sila, kada hataholi taon, fo ala lanolin neu hataholi la. Naa te heti-heuk kala sila kada heti dede'ak kala fo dei fo mopo henin! 23 Leo hataholi bisa tao tungga heti-heuk kala sila, ala lae hetuk dei fo hataholi fee hada-holomata neu sala, ma ala taok sila malelan seli, hataholi malalaok tetebes, hataholi dale taidaek, hataholi nakahehedik ao-ina hehelin, ma mana songgo fo manggaten ana seli. Naa te, taa! Heti-heuk kala sila ta bisa heti tao malole hataholi dudu'an, ma hataholi dalen fo nahiik tao manggalauk!