4
Tolanoo susue nggala ei! Huu basa sila, de au oke fo ei masoda ndoos makandoo, ma boso maeok. Au dokodoe tilo ei. Huu ei mesa nggei dadik neu au ueng buna-boan. Ei tao mala au daleng namahoko. Ma au bisa botik au langgang, huu ei.Lamatuak nau tao natea ita dalen, mete ma ita tasoda ndoos takandoo
2 Au oke ina kaduak kala sila, fo ndia Yodia ma Sinteke, fo boso lasisimbo bafak bali. Ala musi mole, fo lasoda malole esa no esa. Huu dua sala Lamatuan ndia, kada esak, de ala nana mba'ak esa no esa.
3 Nonoo mana tao ues! Au oke fo o makaneni tolanoo ina kaduak kala sila, losa ala malole. Huu makahulun, ala tao ues tingga-tingga, fo tulu-fali au, fo lafada hataholi la'e-neu Manetualain Hala Malolen. Ala tao ues leo ndiak no'u lo Klemens, ma nonoo fe'en nala boe. Basa sala naden nana sulak so, nai Lamatuak susula nadek hataholi la, fo neu ko lasoda no'u lo Ndia nai nusa sodak.
4 Huu ei maso dadik Lamatuak hataholin, de ei dalem musi lamahoko leledo-le'odaen. Au afada seluk bali: tao ei dalem mala lamahoko lakandoo!
5 Ei boe oo musi dale malole mia basa hataholi. Ma boso lilii, Lamatuak Yesus fafali main deka-dekak so. 6 Mete ma ei hambu toto'ak, na, ei boso bii hata esa boe. Tehuu hule-haladoi, fo moke Manetualain tulu-fali ei nai basa dede'ak kala. Ma basa hata fo ei mokek ndia, na, boso lilii so'uk ei dalem fo moke makasi neu Ndia. 7 Mete ma ei tao leo ndiak, na, dei fo Manetualain tao ei dalem ndoo-ndoo. Memak hataholi ta bisa bubuluk tebe-tebe dale ndoo-ndoo, fo ita hambun neme Manetualain mai. Huu ei mamahele neu Yesus Karistus, de Manetualain tao ei dalem ndoo-ndoo, ma nau nanea fo ei dalem ma ei dudu'am boso kalambua.
8 Tolanoo nggala ei! Ndia nggoen leo iak: boso dudu'a madabak. Tehuu manea dudu'am, fo dudu'a dede'ak fo nandaa no Manetualain dalen, ma dudu'a dede'a malole fo tao namahoko hataholi dalen. Ei musi dudu'a ndoos ma malalaok. Dudu'a dede'ak fo tetebes, ma malole. Sangga dalak fo hataholi fe'ek bisa hambu hada-holomata. Sangga dalak, fo so'uk dede'a malole. Ma boso hahae dudu'a basa dede'a malole la ia. 9 Au anoli ei so, fo tungga Manetualain dala sodan. Ei musi conto au sodang, ma tao tungga basa hata fo au kokolak ma tao itak. Mete ma ei tao leo ndiak, na, Manetualain tao natea ei dalem, fo ei dalem ndoo-ndoo, ma bisa masoda mia mole.
Paulus noke makasi, huu ala tulu-fali ndia
10 Au oke makasi ma au koa-kio Manetualain, huu ei ta lilii au. Memak au bubuluk, makahulun ei masaneda au, tehuu bei ta hambu lelak fo tulu-fali au. 11 Au ta maksut oke hata esa boe. Huu au alelak tao amahoko ua hata fo manai au. De au ameda ta to'a itak hata esa boe. 12 Au asoda itak unik lima louk. Au boe oo asoda itak ua sudi hata fo mana sasik. Au ameda teik kio, ma teik nanggadila so. Nai dede'ak sudi hata, au alelak hata fo hataholi bei ta lalelak, fo bisa akatataka asoda. 13 Au bisa lemba basa dede'ak kala, huu Karistus tao natea au!
14 Mae leo beek boe oo, au oke makasi, huu ei matudu ei dale malolem, ma tulu-fali au nai au toto'ang dale so. 15 Makahulun, neu faik fo au la'o ela propensi Makedonia, fo uu tui-bengga Lamatuak Hala Malolen nai mamana fe'ek kala, kada ei manai kota Filipi, tulun au ongkos. Salani fe'ek kala, na taa. Tehuu ei bubuluk tutuik ndia so. 16 Conto leo, neu faik fo au nai kota Tesalonika boe, ei haitua doik la'i esa do dua, fo tulu-fali au.a 17 Hatematak ia, au ta ahiik sangga oke sudi hata bali neme ei mai. Huu au nau fo Lamatuak bala fee baba'e-babatik neu ei, huu ei dalem malole neu au. 18 Au simbo ala basa tulu-falik ndia so neme Epafroditus mai, fo ei haituan neu au. Ndia dadik baba'e-babatik soa-neu au, de losa hatematak ia, au ta to'a hata bali. Ndia boe sama leo tunu-hotu kaboo menik, fo hataholi hotun suek nakaluku-nakatele neu Manetualain. Ma Manetualain simbok no malole fefeek ndia, huu fefeek ndia tao namahoko Ndia dalen.b
19 Manetualain fo au akaluku-akatelek ndia, kamasuin seli. Ma Ndia bubuluk ei paluum. Dei fo Ana natudu dale malolen, ma fee Ndia baba'e-babatin fo ana seli neu ei, huu ei nana mba'ak mia Yesus Karistus. 20 De ela ita so'u dema-demak Amak Manetualain naden nakandondoo henin losa dodoon neu. Te ndia tetebes!
Paulus nate'e susulan
21 Au haitua soda-molek fee basa hataholi mana tungga Yesus Karistus malai kota Filipi.
Au nonoong malai ia boe oo, haitua soda-molek fee ei.
22 Basa hataholi kamahelek malai kota Roma ia boe oo haitua soda-molek.
Leo ndiak boe, no tolanoo mana tao ues nai mane ina-huuk uma manen. Ala haitua soda-molek fee ei.
23 Au oke fo ita Lamatuan Yesus Karistus, natudu dale malolen neu ei basa nggei.
Au susulang losa kada ia,
Paulus