Manetualain simbok hataholi la, huu lamahele neu Yesus Karistus
3
Tolanoo nggala ei! Mamanene neulalau! Ei dalem musi namahoko, huu ei nana mba'ak mia Karistus. Mae au sulak bali-bali leo iak, tehuu au ta mbela fee nasanenedak neu ei, fo boso ei nana kedi nalak!2 Mata neuk neu masapepekok kala, fo lakaseti hataholi lae, “Ei musi tungga sunat fo dadik tanda nae, ei ndia, Manetualain hataholin.” Naa te, Manetualain ta palenda leo ndiak! Ala sala ndia so! Tehuu mae leo ndiak boe oo, ala bei husi hataholi, sama leo busa manggalauk. 3 Ala lae Manetualain simbok hataholi huu ala sunat. Tehuu sala ndia! Ita bubuluk so tae, Manetualain simbok hataholi, huu lamahele neu Yesus. Boe ma Manetualain hataholi teteben nala, fo ndia ita mana mamahele neu Yesus! Ita takaluku-takatele neu Ndia, tungga Ndia Dula-dale Malalaon. Ita so'uk dema-demak Yesus Karistus, huu Ana soi dalak so, fo ita bisa maso dadik Manetualain hataholin. Ita ta bisa hambu nasalala'ek, huu ita tungga hataholi uen.
4 Makahulun au boe oo dudu'a sala, sama leo sila ae, hataholi bisa maso dadik Manetualain hataholin, sadi ala sunat. Naa te kada hataholi uen ndia! Mete ma sangga kokolak hataholi uen, na, au bisa kokolak koaok lena heni basan, huu makahulun au ueng tungga tebe-tebe basa hataholi Yahudi anggaman heti-heun nala. 5-6 Tungga anggama heti-heun, na au ina-ama nggala sunat au, neu faik fo au faik falu. Au ia boe oo, hataholi Yahudi isi-isik, huu au ia uma leo Benyamin, fo tititi-nonosik neme ba'i Israel mai. Au manggateng ana seli tungga tebe-tebe basa heti-heuk neme paltei anggama Farisi mai, losa ta hambu hataholi esa bisa fee salak faa boe neu au. Nakalenak bali, au manggateng ana seli tao doidoso hataholi mana tungga Karistus, huu au dudu'a ae hataholi la ia, nggali heni ita anggaman heti-heun so.a
7-8 Tehuu doo-doo boe ma au dudu'ang nasafali, neu faik fo au fali tungga Karistus. De hatematak ia, au ta koao so, ua au soda makahulung ndia, huu sila sosoan ta faa boe neu au. Fo au taok ana seli, na ndia: au bisa alelak Yesus Karistus, fo naena haak palenda au. Basa dede'a fe'ek kala, au taon leo kada kadafuk. 9 Au nau asoda nana mba'ak ua Yesus Karistus. Huu mae au tungga basa anggaman heti-heun boe oo, bei ta bubuluk Manetualain simbok au. Ma mae au taok au ndoos, na bei ta bubuluk Ana simbok au boe. Tehuu au musi amahele neu Karistus dei, bei fo Manetualain simbok au nae, “Huu Karistus koka heni o sala-singgom mala so, de o dadik malalaok so.”
10 De au hihiing leo iak: au nau alelak neulalau Karistus. Au boe nau bubuluk neulalau Manetualain koasan, fo Ana paken tao nasoda falik Yesus Karistus neme mamaten mai. Leo hambu hataholi sangga nakatoto'ak au, huu au tungga Karistus, na elan neme naa. Huu hataholi tao nakatoto'ak Karistus boe. Ma mete ma hambu hataholi sangga tao nisa au, huu au ono-lau hataholi, na, kada au simbok. Huu Karistus mate soa-neu au leo ndiak boe. 11 Ma mete ma au mate, na, neu ko Ndia boe oo tao nasoda falik au.
Ita mbalak eik fo tungga tebe-tebe Lamatuak dalan
12-13 Tolanoo nggala ei! Au ahiik tungga Karistus dala sodan, ma basa Ndia hihiin. Tehuu mete ma kokolak no ndoos, na, au bei ta tungga tebe-tebe leo ndiak. Huu ndia de au mbalak eik, huu Yesus Karistus hele nala au so, fo au tungga Ndia leo ndiak. Au sama leo hataholi fo nalaik tingga-tingga, suek bisa losa too-lane. De au alaik ndoos uni mata uu, ma ta suli dea, fo dudu'a akandoo dede'a makahuluk kala. Au lilii heni sala so. 14 Tehuu au alaik tingga-tingga akandoo losa too-lane, fo hambu piala. Au hadiang ndia, na ndia: neu ko Manetualain simbok au nai nusa sodak, huu au amahele Yesus Karistus.
15 Naa, au oke fo ei basa nggei mana moli ma maoka matea nai Karistus dalek so, bisa dalek esa mia dede'ak kala ia. Tehuu mete ma hambu dudu'ak mana fe'ek, na, ela Manetualain natudu dala kalua neulauk. 16 Tehuu mae leo ndiak, ita musi to'u tea-tea ma tao tungga basa dede'a tetebes, fo Lamatuak nanolin neu ita so.
17 Basa tolanoo nggala ei! Ei musi conto au dala sodang. Ei luma manai ndia dala sodam mala sama leo au boe. Tehuu mana beik kala, na bisa lanoli neulalau leme sila mai, fo tao leo ndiak boe.b 18 Mata neuk mia hataholi fo mana laban Karistus, ma ta simbok malole Ndia mamaten nai ai ngganggek lain. Sila dala soda hehelin, natudu sila laban Karistus. Au afada itak ei so, la'e-neu hataholi mata-aok leo sila, tehuu hatematak ia, au afada seluk no luu mana faak. 19 Neu ko Manetualain timba heni sala, boe ma Ana mbia sala leni ha'i naraka neu, huu dalen nala ta nana mba'ak lo Ndia. Kada sila to'u dede'a manggalauk kala, ma sangga dalak fo kada tao lamahoko ao-ina hehelin nala, losa langga batu lo sila manggalaun. Ala ta lameda mae. Kada ala dudu'a sama leo hataholi fo ta lalelak Manetualain.
20 Ei ta bole tao tungga sala, tehuu tao tungga ai. Huu ita maso dadik Manetualain hataholin so, ma to'u haak hataholi nusa sodak. Hatematak ia, ita tahani-tahani ita Lamatuan Yesus Karistus. Huu neu ko Ana konda fali neme nusa sodak mai, fo nasala'e nala ita neme Manetualain nasan mai. 21 Neu ko Karistus tao nasafali ita ao-inan mana noe-na'uk fo bisa maten, dadik ao-ina beuk fo ta mana matek, sama leo Ndia ao-inan fo ana seli ndia. Ana tao nasafali ita ao-inan nala, pake Ndia koasa ina-huun. Ma Ana pake koasa ndia boe, fo tao basa-basan sudi lai bee mesan, do'ok tungga Ndia palendan.