3 Ei ia, Manetualain hataholi malalaon boe. De boso masoda manggenggeok! Mae dudu'a manggenggeok boe oo, bosok! Boso tao eok mua hataholi fo ta o saom! Boso balena'o! 4 Boso kokolak manggenggeok! Ma boso kokolak mabalok! Huu Manetualain hataholin ta nandaa kokolak leo ndiak. Malolenak ei kokolak kada malole, ma moke makasi neu Manetualain. 5 Masanenedak neulalau! Manetualain ta simbok hataholi fo nasoda manggenggeok, ma hataholi fo tao eok no hataholi fo ta ndia saon! Ala ta bisa maso dadik Karistus hataholin, ma Manetualain ta dadik sila Manen. Manetualain boe oo, ta simbok hataholi balena'o, huu ala seti heni Ndia, ma so'uk dema-demak dede'a fe'ek kala.

6 Boso ei nana tao namanggonggoak neme hataholi masapepekok mai fo lae, “Boso masoda malalaok!” Te neu ko Manetualain luli hataholi fo nasoda ta tungga Ndia hihiin. 7 Huu ndia de, ei boso nana mba'ak mia hataholi mata-ao leo ndiak. 8 Makahulun, ei sama leo hataholi mana masoda nai makiuk, huu ei ta malelak Manetualain. Tehuu hatematak ia, Ana nakonda Ndia manggaledon so, fo tao ei dadik Ndia anan nala. Huu ndia de, ei musi masoda nai Ndia manggaledon. 9 Hataholi mana nasoda nakandoo nai manggaledok dale, na ana tao dede'a malole, nasoda ndoos, ma kokolak ndoos. 10 Sangga dalak, fo tao mamahoko Manetualain dalen, huu Ndia ndia naena haak palenda ita. 11 Boso mba'a aok mia hataholi fo nasoda nai makiuk dale. Huu sila tataon ndia, sosoan ta faa boe. De ei musi ka'i sala, ma buka matudu sila salan nala. 12 Huu hata fo ala taon no nafufunik, manggenggeon seli, losa ita tameda mae, mete ma sangga takokola. 13 Au fee conto leo iak: mete ma hataholi tao nanggaledo buas manai makiuk dale, na, neu ko hataholi bisa nita buas ndia no ledo-ledo. 14 Leo ndiak boe, mete ma ita tao manggaledo dede'a manggalauk, fo hataholi taon, na, ana bisa bubuluk nae, dede'ak fo ana taok ndia, manggalauk. Hambu sosodak esa nae,

15 Huu ndia de, mete neulalau ei sodam, fo boso ei sama leo hataholi nggoak. Malolenak pake neulalau dudua-a'afik neme Manetualain mai. 16 Hatematak ia, hataholi no'uk tao dede'a manggalauk lakandoo. De mete ma hambu faik fo tao dede'a malole, na, taon leo. Boso mahani bali!^b 17 Dudu'a neulalau, fo bubuluk ita Lamatuan hihiin, fo boso ei mamanggoa.

18 Boso mafuk, te dei fo nininuk ndia heti ei, fo ei tao dede'a ta malole la. Tehuu buka ei dalem, fo suek Manetualain Dula-dale Malalaon heti ei. 19 No leo ndiak, na dei fo ei makokola esa no esa pake dede'a-kokolak neme Manetualain Susula Malalaon mai, neme sosodak fo koa-kio Ndia, ma neme sosodak fo ei hambun neme Ndia Dula-dale Malalaon mai. Ma mete ma soda, na, boso kada nai bifi dook. Tehuu koa-kio Manetualain neme ei dalem mai. 20 Huu Yesus Karistus dadik ita Lamatuan, ma Amak Manetualain tao dede'ak no'uk fee ita so, de ita toke makasi takandondoo henin neu Ndia.^c

21 Ei basa nggei musi mamanene esa no esa. Huu no leo ndiak, na ei matudu hada-holomata ma bii neu Yesus Karistus.

22 Sao inak kala! Ei musi mamanene ei saom mala, sama leo ei mamanene ei Lamatuam Yesus Karistus. 23 Huu touk ndia, sama leo sao inak malanggan. Ma Karistus boe oo, Malanggan neu Ndia hataholin nala. Huu Ana soi dalak fo ala hambu nasalala'ek.^d 24 Huu ndia de Karistus hataholin nala musi lamanene neu Ndia. Leo ndiak boe, sao inak kala musi lamanene neu sila saon nala, nai basa dede'ak.

25 Leo ndiak boe, sao touk kala! Ei musi sue ei saom mala, sama leo Karistus sue Ndia hataholin nala, losa Ana fee aon, fo mate nggati sala.^e 26 Ana tao leo ndiak, fo ala dadik malalaok nai Manetualain matan, huu ala tungga Ndia Dede'a-kokolan, ma ala hambu salanik so. 27 Yesus Karistus hataholin nala sama leo mana kabin inak boe, fo nana papakek mana'a hiak so, huu mana kabin touk sangga mai nala ndia. Leo ndiak boe, Karistus sangga mai nala Ndia hataholin nala. Huu ndia de, ala musi lasoda neulauk, ma malalaok, losa ta hambu salak faa boe.

28 Leo ndiak boe, sao touk kala! Ei musi sue ei saom mala, sama leo ei sue ei ao-ina hehelim. Huu mete ma sao touk sue ndia saon, na, ndia ndandaan nae, ana sue ndia ao-ina hehelin. 29 Ta hambu hataholi binci ndia ao-ina hehelin. Tehuu ana nakaneni ma nakaboi neulalaun, sama leo Karistus nakaneni neulalau Ndia hataholin nala, 30 huu ita ia, sama leo Ndia ao-ina hehelin. 31 Nai Manetualain Susula Malalaon nana sulak nae, “Huu ndia de, touk musi la'o ela ndia ina-aman, fo neu leo dalek esa no ndia saon, huu dua sala nana mba'ak dadik esa so.”^f 32 Manetualain Dede'a-kokolan fo ana seli, nana natuduk neme makahulun mai so, la'e-neu sao touk-sao inak susuen. Tehuu hatematak ia, ita boe bubuluk tae, Dede'a-kokolak ndia boe, natudu la'e-neu Karistus susuen neu Ndia hataholin nala. 33 De sao touk musi sue ndia saon sama leo ana sue ndia ao-ina hehelin. Ma sao inak musi fee hadak neu ndia saon.