Lamatuak Yesus hataholin nala musi lasoda dadik leu esa, sama leo ala dadik Ndia aon
4
Au akalala'ok au Lamatuang uen so, losa au dadik hataholi bui. De hatematak ia, au kokoe ei, fo masoda mia mandaan ma ndoos tungga Manetualain hihiin, huu Ndia noke nala ei so, fo dadik Ndia hataholin. 2 Huu ndia de, ei musi masoda mia dale taidaek, ma masoda malole esa no esa. Ei musi nggale loak, ma bubuluk esa no esa, masoda masue ao no ndoos. Mete ma neme ei mai, hambu mana sangga dede'ak no ndia nonoon, na, boso mambeda dalek.a 3 Masusua tingga-tingga, fo masoda mole esa no esa, huu Manetualain Dulan mba'a ei dadik esa so. 4 Huu Yesus Karistus hataholin nala dadik esa so, sama leo Ndia ao-ina hehelin. Ma sila basa sala boe simbok Manetualain Dulan fo kada esak. Ma basa sala lamahena kada neu Manetualain, huu Ana noke nala sala, fo dadik Ndia hataholin.5 Ita Lamatuan fo naena haak palenda ita, kada esak;
Ita namahehelen, kada dalak esak,
fo bisa mole-dame to Ndia.
Ma ita basa nggata simbok salanik,
fo dadik nana mba'ak to Ndia.
6 Manetualain, kada esak,
ma ita Aman, kada Ndia.
Kada Ndia mesak kana palenda ita basa nggata.
Kada Ndia mesak kana sama-sama no ita basa nggata.
Ma kada Ndia mesak kana nasoda nakandoo nai ita basa nggata dalen.
Karistus fee ues mata-matak, suek Ndia hataholin nala boe latea
7 Tehuu Yesus Karistus ba'e fee Ndia koasan neu ita so, suek ita esa-esak takalala'ok Ndia uen. 8 Huu ndia de, Manetualain Susula Malalaon nae,
“Ana hene neni mamana madema neu,
fo Ana natati nai ndia losa Ana senggi.
Basa de Ana neni falik hataholi nana kenak no'un seli,
ma Ana baba'e hadia fee hataholi la.”b
9 (Masaneda dede'a de'ek fo nae, “Ana hene”. Mete ma Ana hene, na ndia ndandaan nae, makahulun Ana konda nitak neni dae-bafok mai so. 10 De Hataholi fo mana konda mai ndia, na ndia Karistus. Huu Ana hene fali neni nusa sodak neu, suek bisa nakaneni basa hata malai lalai ma malai dae-bafok.) 11 Karistus ndia fee koasa neu Ndia hataholin, suek lakalala'ok ues fo Ana ba'e fee sala. Hambu luma Ana fee sala koasa fo dadik Ndia nadedenun, luma dadik Ndia mana kokolan, luma dadik mana hoo neu Ndia hataholin nala, luma dadik malelak mana fee nanonolik neu Ndia hataholin nala ma luma bali dadik mana maneni Hala Malole nai mamana beuk kala. 12 Esa-esak simbo ndia uen, fo tao natetu Karistus hataholin nala, suek basa sala bisa lakalala'ok Ndia uen. No leo ndiak, ita basa nggata fo tamahele neu Yesus Karistus, boe tatea 13-14 losa ita basa nggata tamahele to dalek esa boe. Ma ita basa nggata talelak tebe-tebe Manetualain Anan. Ita ta leo kakana kadi'ik bali, huu ita tungga Ndia dalan so, ma dadik hataholi fo mana daik, mana dudu'a naluk, ma mana nasoda tungga basa Ndia hihiin. Mete ma ita tasoda leo ndiak so, na, ita ta sama leo kamba nana sobo mbanak, fo helan sudi bee neu, na kada ana tungga. Huu mete ma hambu mana masapepekok kala mai fee nanonolik la'e-neu dede'a pepekok, na, ita ta tao tungga dede'a pepekok ndia so bali. 15 Tehuu kada ita kokolak neulalau tungga hata fo ndoos neu ita tolanoon nala, huu ita sue sala. Ma mete ma ita tasoda leo ndiak nai basa dede'ak lala'en, na, ita dadik mata-aok esa leo Karistus. Huu Ndia ndia, ita Malanggan fo mana heti ita. 16 Ma ita ia, sama leo Ndia aon. Mete ma hataholi lima-ein ma idu-bafan nala tao ues tulu-fali tungga esa-esak uen, na, ndia aon boe natea. Leo ndiak boe no Karistus hataholin nala. Mete ma ita tasue ao, ma tatulu-fali, na, ita basa nggata boe oo tamba tatea.c
La'o ela dala soda laak, fo tungga dala soda beuk
17 Mamanene neulalau hata fo au sangga kokolak hatematak ia, huu au Lamatuang mesak kana nafada au. Boso ei masoda sama leo hataholi fo ta nalelak Manetualain bali. Te hata fo ala taon tungga kada sila nggoan. 18 Ala la'o lasalak, sama leo hataholi mana la'ok nai makiuk. Ala lasoda laelak lo Manetualain, huu sila langga batuk, ma tala nau mbali Ndia. 19 Ala ta mae lalelak. Huu ndia de, ala tungga kada sila hihiin, ma lasoda manggenggeok. Tehuu ala ta lameda dai boe.
20 Tehuu Karistus dala sodan fo ei manolik ndia so, ta leo ndiak! 21 Hata fo ei manolik la'e-neu Yesus Karistus ndia, memak nanonoli ndoos. Neu ko ei mamanenen so! 22 De la'o ela ei dala soda laan! Te mete ma ei masoda manggenggeok tungga hataholi hihiin, na, ei nana kedi nalak nakandoo ndia so. Ei ta maena haak nai ndia so.d 23 Tehuu elan fo Manetualain tao ei dalem, ma ei dudu'am dadik beuk, 24 suek ei dadik hataholi beuk, tungga Ndia mata-aon. Huu ndia de, ei musi matudu dale beuk, fo malalaok ma ndoos.e
25 De hatematak ia, hahae masapepeko leo! Kokolak tetebes esa no esa, huu ita basa nggata nana mba'ak dadik esa so, sama leo aok esa fo kaei-limak, ma kaidu-bafak.f 26 Mete ma luli, na, boso losak ei tao salak. Malolenak ei mole leo! Boso mambeda nasak losa ledo tesa!g 27 No leo ndiak, na, nitu la malanggan ta bisa fufudi-o'odo nala ei. Boso feen hambu dalak faa boe! 28 Hataholi nateme namana'o, na, hahae leo! Malolenak hataholi leo ndiak tao ues neulalau nenik ndia lima hehelin, fo suek ana bisa baba'e ndia uen buna-boan neu hataholi kasian nala. 29 Mete ma kokolak, na, boso kokolak manggalauk, mae kada dede'a de'ek esa boe! Malolenak, kada kokolak malole. Ma fee nanoli-nafadak neu hataholi, fo tebe-tebe tulu-fali sala, ma tao matea dalen nala. 30 Boso tao Manetualain Dula-dale Malalaon dalen hedis, huu ndia nai ei dalem. Ma Ana kee-dede nala ei so nae, ei ia, Manetualain enan. Ndia Dulan boe oo tanggon nae, dei fo losa dae-bafok fai babasan, Manetualain nasala'e nala ei, fo ei masoda makandondoo henin mia Ndia. 31 De boso mambeda dalek mia hataholi fe'ek! Boso mamenggu nisik mia hataholi! Boso mamananasa aok! Boso maule! Boso kokolak maboboo hataholi naden! Ma boso tao dede'a manggalau fe'ek kala! 32 Tehuu malolenak ei masue ao, ma tao dede'a malole esa no esa. Ei musi mafalende heni hataholi salan, ma fee ambon neu ndia, sama leo Manetualain koka heni ei salam so, huu ei nana mba'ak mia Karistus so.h