Paulus neni Hala Malole fee hataholi ta Yahudi la
3
Huu Manetualain ta tao fe'e hataholi Yahudi no hataholi ta Yahudi, de Ana nadenu au, Paulus, fo au afada Yesus Karistus Hala Malolen neu ei ta Yahudi manai kota Efesus. Au akalala'ok au ueng ndia, losa au dadik hataholi bui so. 2 Neu ko ei bubuluk boe mae, Manetualain nadenu au, huu Ana nau natudu dale malolen neu ei. 3 Memak makahulun Manetualain bei ta nafada hataholi, la'e-neu hata fo Ana naketun soa-neu hataholi ta Yahudi so. Tehuu hatematak ia Ana nafada dede'ak ia neu au. Ma ia ndia au sulak kana keke'uk-keke'uk fee ei. 4 Mete ma ei lees basan so, na, ei bisa bubuluk boe Manetualain maksut la'e-neu Yesus Karistus, fo Ana bukan neu au so. 5 Makahulun ele, hataholi bei ta bubuluk Ndia maksut. Tehuu hatematak ia, Ana pake Dulan so, fo nafada Ndia maksut neu mana kokolan, ma nadedenun nala. 6 Huu neme makahulun mai, Manetualain naketun so leo iak: mete ma hataholi ta Yahudi lamahele neu Yesus Karistus Hala Malolen, na, sila boe oo bisa maso dadik Manetualain anan nala, sama leo hataholi Yahudi la. Huu ndia de hatematak ia, ita basa nggata dadik neu bobonggik esa so, ma ita bisa simbo sama-sama baba'e-babatik neme ita Aman Manetualain mai.7 Manetualain natudu dale malolen, ma hele nala au dadik Ndia nadedenun. Ma Ndia boe oo, fee koasan neu au, fo au akalala'ok Ndia uen. 8 Neme basa Manetualain hataholi kamahelen nala mai, na au ia, hataholi kadi'i anak nalan seli. Mae leo ndiak boe oo, tehuu Manetualain hele nala au, fo akalala'ok Ndia uen fo ana seli ndia. Ana nau fo au uu afada hataholi ta Yahudi la, la'e-neu Karistus dale malolen fo ta mana basak. 9 Huu mulai neme Manetualain nakadadadik dae-bafok ia mai, Ndia maksut nadenu Karistus mai no nafufunik. Tehuu hatematak ia, Ana nau fo au fee basa hataholi bubuluk, la'e-neu Ndia maksut ndia. 10 Huu Ndia maksut ndia, malelan seli. Ma Ana nau pake Ndia hataholin nala, fo natudu Ndia malelan neu basa koasa ma basa mana palenda malai lalai. 11 Neu faik fo Ana bei ta nakadadadik dae-bafok ia, Ana naketun so, fo sangga soi dalak, fo nasala'e nala hataholi. Huu ndia de, Ana pake ita Lamatuan Yesus Karistus, fo tao tungga leo ndiak. 12 Huu ndia de, ita fo tamahele neu Yesus Karistus so, boso bii mai kokolak to Manetualain bali. Huu Ana nau simbok ita, sudi nai faik bee.
13 Masanenedak baa! Au doidoso, huu au ono-lau ei hataholi ta Yahudi. Mae leo ndiak boe oo, ei dalem mala boso ma'a-male. Huu au lemba doidosok ia, fo suek ei simbo ndia malolen.
Paulus hule-haladoi noke makasi neu Manetualain
14 Ledo-eik au dudu'a la'e-neu Amak Manetualain dale malolen fo ana seli ndia, boe ma au sendek fo au oke makasi neun. 15 Huu basa bobonggik malai dae-bafok ma malai nusa sodak Aman ndia Ndia.
16 Au hule-haladoi fo Ana fee baba'e-babatik makadotok neu ei, tungga Ndia dale malolen fo ana seli.
Ma au boe oo hule fo Ana nakonda Dulan ma koasan, fo suek ei dalem dadik matea.
17 Au hule fo Yesus Karistus nasoda nai ei dalem, huu ei mamahele makandoo neu Ndia.
Ma au hule-haladoi boe, fo ei masoda nana mba'ak mia Ndia susuen, sama leo ai huuk fo natea, huu okan tola losa dook nai dae dale.a
18-19 Au hule-haladoi boe, fo ei mia basa Manetualain hataholin nala, bisa bubuluk no'u Karistus susuen, fo hataholi ta bisa uku nalan. Huu susuek ndia ina-huun seli, loan seli, deman seli ma no'un seli!
Au hule-haladoi boe, fo ei bisa mameda Ndia susuen, losa susuek ndia tao nahenu ei dalem, ma ei sodam.b