Hataholi fo mana namahele neu Yesus Karistus simbo soda beuk
2
Makahulun, ei la'o lena Manetualain palendan nala, ma tao sala-singgo mata-matak. Huu ndia de, Ana taok ei sama leo hataholi mana matek so. 2 Makahulun, ei masoda tungga dae-bafok hihiin, ma tungga nitu la malanggan hihiin. Losa hatematak ia, nitu ndia bei fufudi hataholi fo laban Manetualain. 3 Makahulun, ita boe oo tasoda leo ndiak, losa sudi hata fo ita tamedan do, dudu'an do, ita tao tungga kada ita hihiin. Ita ia hataholi manggalauk sama leo hataholi fe'ek kala, huu ndia de Manetualain luli nalan seli neu ita, 4-5 ma Ana taok ita sama leo hataholi kamates boe, fo taelak neme Ndia mai. Mae leo ndiak boe oo, tehuu Ana tuda kasian neu ita, huu Ana sue nalan seli neu ita. Huu ndia de Ana natudu dale malolen, ma nadenu Yesus Karistus mai, fo fee ita soda beuk. De Manetualain nasala'e nala ita, huu Ndia dale malolen.a 6 Yesus Karistus maten, tehuu Manetualain tao nasoda falik Ndia. Boe ma Manetualain so'uk Ndia fo to'u palenda nai nusa sodak. Naa! Manetualain tao leo ndiak neu ita boe. Ana fee ita soda beuk, boe ma Ana so'uk ita, ma ita to'u palenda sama-sama to Karistus nai nusa sodak. 7 No leo ndiak, mulai neme hatematak ia mai losa dodoon neu, Manetualain natudu susuen makadotok, ma Ndia dale malolen fo ana seli ndia, huu ita tamahele neu Yesus Karistus. 8-9 Neu faik fo ei mamahele neu Karistus, Manetualain nasala'e nala ei, huu Ndia dale malolen. Ana nasala'e leo ndiak, ta huu Ana nau bala hata fo ei taok. Huu ndia dadik hadia fo Ana fee hiak neu ei, de ei ta maena to'ok fo kokolak koaok mia hata fo ei taok ndia. 10 Ita tasoda, huu Manetualain nakadadadik nala ita. Boe ma Yesus Karistus fee ita soda beuk, fo suek nai ita sodan, ma ita tao dede'a malole takandoo, fo Manetualain naketu memak kana neme makahulun mai so.Manetualain simbok no malole basa hataholi nusak kala
11 Tolanoo nggala ei! Ei bubuluk so mae, hataholi Yahudi la to'u lahele sila heti-heu sunat, ma lakadadaek ei fo ta Yahudi, huu ei ta tungga sila heti-heun! Naa te ndia kada heti-heuk la'e-neu hataholi ao-inan, ta la'e-neu hataholi dalen. 12 Neu faik fo ei bei ta mamahele neu Yesus Karistus, ei ta maena haak fo maso dadik Manetualain hataholin. Huu makahulun, ei bei ta maso nai Manetualain hehelun fo Ana mba'a memak no Abraham, ma ndia numbu-sadun nala so. Faik ndia, ei leo nai dae-bafok ia, ma ta bisa mamahena neu Manetualain, huu ei bei dadik hataholi deak, 13 fo maelak dook mima Manetualain mai. Tehuu hatematak ia, Yesus Karistus soi dalak so, fo ei bisa nana mba'ak mia Manetualain. Te Karistus maten, fo tao makasufu Manetualain dalen, suek ei bisa mole mia Ndia ma bisa dadik Ndia hataholin nala.
14 Makahulun, ai hataholi Yahudi ta bisa masoda mole mia ei hataholi nusa fe'ek. Sama leo tembok, fo tao kofe'e ita. Tehuu Yesus Karistus maten neme ai ngganggek lain, boe ma Ana tao natu'u heni tembok ndia, fo makahulun ita tamusuk, bisa tamolek dadik hataholi nusak esa. 15 Makahulun hataholi Yahudi sangga dalak, fo lasoda malole lo Manetualain, pake sila anggaman heti-heun nala. Tehuu neu faik fo Yesus Karistus maten, Ana kena ketu dala laak ndia, ma soi dala beuk, fo suek hataholi nusa Yahudi ma hataholi nusa fe'ek kala bisa lasoda malole lo Manetualain. No leo ndiak, basa sala nana mba'ak so, dadik leu hataholi nusa beuk, fo lasoda lo mole-damek.b 16 De Karistus maten neme ai ngganggek lain, fo tao hataholi nusa kaduak fo mana musuk kala dadik leu esa, ma no falik kasa leni Manetualain leu. Huu Karistus koka heni basa hata fo makahulun dadik to'ok fo ala lamusuk kala.c 17 Ana neni dae-bafok ia mai, fo neni Hala Malole fee hataholi Yahudi, sama-sama lo hataholi fe'ek kala nae, “Makahulun ei masoda mamusuk, tehuu hatematak ia, hambu dalak so, fo ei bisa masoda mole-dame esa no esa.”d 18 De ai hataholi Yahudi ma ei hataholi ta Yahudi sama-sama hambu dalak, fo teni ita Aman Manetualain teu, huu Yesus soi dalak fee ita basa nggata so. Ma Manetualain Dula-dale Malalaon boe oo, natudu dalak neu ita basa nggata.
Yesus Karistus hataholin nala sama leo uma huhule-haladoik
19 Huu Yesus Karistus uen ndia, de ei ta hataholi Yahudi, ta dadik hataholi deak so bali, fo ta maena haak faa boe. Hatematak ia, ei maena haak dadik lau-inggu nusa sodak, huu ei dadik Manetualain bobonggin so. 20 Ndia conto leo Manetualain sangga nambadedei uma esa. Ana tao batu netes, fo ndia Yesus Karistus. Boe ma Ana tao fanderen, fo sila Ndia mana kokolan ma nadedenun nala. Basa boe ma Ana nakatotodok batu la neu fanderen sila lain. Batu la sila, na ndia ita basa nggata, fo mana maso dadik Ndia bobonggin so. 21 Uma ndia nambadeik tea-tea, huu batu la sila nana nakatotodok no malole lai batu netes sila lain. Ma uma ndia doo-doo na ana boe namadema, losa dei fo hataholi leni ndia leu, fo hule-haladoi neu Manetualain. 22 De hatematak ia, Manetualain tao nala ei hataholi ta Yahudi, sama leo batu so, sama-sama mia ai hataholi Yahudi boe. Manetualain nakatotodok nala ita basa nggata, fo dadik neu Ndia Dulan mamana leleon.